Зары æрцæугæ трагедийæ 30 азы кæй рацыд, уый фæдыл фыдохы мадзалы хуызы Хетæгкаты Къостайы номыл Паддзахадон драмон театры æвдыст æрцыдис спектакль «Фæстаг æвдисæн».
20 майы ахæм спектаклы равдыстæн ис символикон нысаниуæг. Уымæн æмæ ацы пьесæйы дзырд цæуы ирон адæмы æндæр трагикон цаутыл – 20-æм æнусы 20-æм азты гуырдзиаг лæгсырдтæ Хуссар Ирыстоныл туджы зæйтæ куы рауагътой, уыцы хабæрттыл. Хъыгагæн, уæды азты бирæ фылдæр адæм ныццагъды ис фашистты æмæ уæйгæнджыты къухтæй, сæ нымæц сын бæрæг дæр ничи скодта, æмæ абоны онг дæр дунеон æмæхсæнад геноцидыл нæ нымайы уыцы æнæаххос сабырцæрæг адæмы тугкалд.
Ацы спектаклы премьерæ кæд ацы аз январы мæйы уыд, уæддæр афтæ тынг бахъардта театрдзаутæм, æмæ та ныр дæр зал адæмæй байдзаг ис. Спектаклы хайад исынц æрмæст бынæттон артисттæ нæ, фæлæ ма Тæбæхсæуты Балойы номыл Цæгат Ирыстоны Паддзахадон академион драмон æмæ Паддзахадон дыгурон драмон театрты артисттæ дæр – æдæппæт 70 архайæгæй фылдæр. Уымæй уæлдай ма ацы спектаклмæ æрбахуыдтой цалдæр ролы ахъазынмæ скъоладзуаты æмæ ХИПУ-йы театралон факультеты студентты дæр.
Спектакль «Фæстаг æвдисæн»-æн ис егъау историон æмæ хъомыладон нысаниуæг, нæ кæстæр фæлтæртæн стыр ахъаз фæуыдзæнис бирæ зонындзинæдтæ райсынæн. Уый фæдыл Мидхъуыддæгты министрады къухдариуæгады бафæндыд сæ арфæйаг куыстæн сын исты хуызы саргъ кæнын. Театрмæ фæуазæг сты Мидхъуыддæгты министры хæдивæг Кокойты Тарзан æмæ милицийы рæнхъон скондимæ куысты фæдыл управленийы сæргълæууæг Джиоты Созыр. Уыдон спектаклы фæстæ зæрдæбын арфæйы ныхæстæ загътой артисттæн, авторæн æмæ спектакль сæвæрынмæ йæ хайбавæрд чи бахаста, æппæт уыдонæн. Кокойты Тарзан банысан кодта, зæгъгæ, ацы диссаджы пьесæ афтæ тынг бахъардта адæймагмæ, ахæм тæлмæнтæ ныл ныууагъта, æмæ та сног сты ирон адæмы риссагдæр хъæдгæмттæ.
«Спектаклы мидис фатау аныхстис нæ зæрдæты, нæ зæрдæтæ нын банкъуысын кодтой нæ иууыл судзаггагдæр æмæ æвирхъаудæр хабæрттæ. 2022 азы 20 май нæ зæрдæты баззайдзæнис, арф фæд ныууадздзæнис театрдзаутыл. Ӕз сæрыстыр дæн актерты хъазтæй, куыд хорз ралæвæрдтой сæ хъайтарты фæлгæндзтæ, уымæй. Ӕцæгæйдæр нæм рагæй фæстæмæ курдиатджын фæсивæд ис, уæлдайдæр та актерон дæсныйады. Мæ зæрдыл æрлæууынц поэт Дзуццаты Хадзы-Мураты ныхæстæ Тæбæхсæуты Балойы тыххæй:
Мах дæуæн æмдзæгъд кæнæм бирæ, бирæ.
Дæумæ нæ уарзтæн нæй кæрон
Ӕмæ зæгъæм нæртон поэт Шекспирæн
Отелло мавр нæу, Отелло у ирон».
Мидхъуыддæгты министрады майдан «100 лет милиции»-йæ хорзæхджын æрцыд Республикæ Хуссар Ирыстоны аивæдты сгуыхт архайæг æмæ спектакль «Фæстаг æвдисæн»-ы режиссер-æвæрæг Дзуццаты Тамерлан. Майдан «За боевое содружество»-йæ та хорзæхджын æрцыдысты пьесæйы автор Остъаты Алан, РХИ-йы адæмон артист Гаглойты Артур, РХИ-йы сгуыхт артист Куымæридтаты Батрадз æмæ театры артист Мамиты Григори. Уымæй уæлдай ма Кады грамотæтæй хорзæхджын æрцыдысты авд адæймаджы.
Нæ баззадысты рохуаты Цæгат Ирыстоны артисттæ дæр. Бæстæйы Президенты Барамындмæ гæсгæ «Республикæ Хуссар Ирыстоны адæмон артист»-ы ном лæвæрд æрцыд Паддзахадон дыгурон драмон театры артист Хамыхъоты Дзамботтæн æмæ Тæбæхсæуты Балойы номыл Цæгат Ирыстоны Паддзахадон академион драмон театры артисттæ Хъæцмæзты Лазар æмæ Цæриаты Валерийæн. Уымæй уæлдай ма «Республикæ Хуссар Ирыстоны сгуыхт артист»-ы ном лæвæрд æрцыд Паддзахадон дыгурон драмон театры артисттæ Хъаллбегаты Фатимæ æмæ Хъамболты Зæлинæйæн. Спектаклæн иттæг хорз музыкæ бацæттæ кæныны тыххæй композитор Плиты Муратæн Президенты Барамындмæ гæсгæ лæвæрд æрцыд «Республикæ Хуссар Ирыстоны аивæдты сгуыхт архайæг»-ы ном.
ДЖИОТЫ Алыксандр
Comments are closed, but trackbacks and pingbacks are open.