Уæрæсейы цы хæрзаудæн фонд уæвынад кæны «Спорт сабырадæн», зæгъгæ, уый фæрцы нæ республикæйы Алина Кабаевайы номыл арæзт æрцыд спорткомплекс «Олимп».

Ацы объект арæзт æрцыд Аивадон гимнастикæйы абсолютон чемпионкæ, дыууæ хатты дунейы чемпионкæ æмæ Европæйы фондз хатты чемпионкæ Алина Кабаевайы хъæппæрисæй. Ивгъуыд аз «Олимп» йæ дуæрттæ байгом кодта цытджын æгъдауæй. Залмæ бахизгæйæ зæрдæйæн æхцондзинад хæссы йæ аивдзинад. Залы алыварс дарæсивæн хатæнтæ. Дыккаг уæладзыджы дыууæ бассейны, цалдæр залы, сæ алыварс трибунæ, спортивон мадзæлттæм кæсджытæн. Хъæбысхæсты алы хуызæн дæр ис йæхи зал, йæхи дарæсивæн. Æртыккаг уæладзыджы та ис уазæгдон, цæмæй дзы цæрой, ерыстæм-иу цы спортсментæ æрцæуой сæ тренертимæ, уыдон.

Мах фæуазæг стæм спортивон комплекс «Олимп»-мæ, цæмæй лæмбынæгдæр базонгæ уæм, ныртæккæ уым цы секцитæ ис, уыдоны архайдимæ. Йæ директор Табуты Роберт радзырдта, сæ куыст куыд цæуы æмæ рæстæгæй-рæстæгмæ цы ныхдуртыл фембæлынц, уыдæтты тыххæй.

«Олимп» официалонæй байгом 2016 азы 10-æм октябры. Уæд нæ республикæмæ цы цытджын уазджытæ æрцыд, уыдон ‘хсæн уыд Алина Кабаева дæр. Уый банысан кодта, зæгъгæ, ахæм спортивон арæзтад нæй, æгæрыстæмæй, Цæгат Кавказы дæр, фæстæ ни-цæмæй лæууы, Олимпион Сочийы арæзт чи æрцыдысты, уыцы спортивон комплекстæй. Æмæ, æцæгдæр, арæзт æрцыд, æгас Ирыстоны адæм сæрыстыр кæмæй сты, ахæм арæзтад. «Олимп» кæд 10-æм октябры гом æрцыд, уæддæр чысыл фæфæстæ кодта йæ куыст, уымæн æмæ хъуамæ скъуыддзаг æрцыдаид, ам цы секцитæ архайдзæн, уыдонæн æнæмæнгхъæуæг инвентарь балхæныны фарст. Ардæм кусынмæ цы тренертæ ист æрцыдысты, уыдон спорткомплексы къухдариуæгадмæ æрбавдыстой куысты нывæзт, цæмæй куысты рæстæджы мацы цухдзинæдтæ æййафой. Цалынмæ уыцы фарстатæ скъуыддзаг кодтам, уæдмæ ацыд рæстæг дæр. Ныр махмæ арæх вæййы ерыстæ, цыран активон хайад райсынц нæхи хъомылгæнинæгтæ».

Спорткомплекс кæд аив æмæ бирæфункционалон у, уæддæр арæзтады рæстæджы аразджытæ æруагътой техникон згъуыдтæ æмæ цадæггай  аиуварс цыдысты. Ныр ам, Табуты Роберт куыд зæгъы, афтæмæй тренировкæтæ кæнынц 600 сабимæ æввахс хицæн æмæ хицæн секциты.

– Ныртæккæ махмæ цы секцитæ архайынц, уыдонæй иууыл стырдæр хъусдард здæхт цæуы спортивон æмæ эстетикон гимнастикæмæ. «Олимп»-æн йæ баконды фыццаг бонæй ам тренировкæ кæнынц гимнасткæтæ. Уыдон раздæр тренеровкæ кодтой спортивон скъолайы зæронд бæстыхайы. 2008 азы августы хæсты фæстæ Алина Кабаева нæ горæтмæ куы æрцыд, уæд бацыд, гимнастикæйы секцитæ кæм цыдысты, уыцы спортивон скъоламæ. Пырх спортивон зал ахæм уавæры куы федта, раст уæд сфæнд кодта спортивон зал саразын Ирыстоны гимнасткæтæн. Ныртæккæ махмæ цы спортивон секци ис, уырдæм цæуы 150 сабийы. Ивгъуыд аз 1-æм июны Сывæллæтты хъахъхъæныны боны цытæн хуссарирыстойнаг гимнасткæтæ райстой хайад аивадон гимнастикæйæ Мæскуыйы цæуæг. “Хæрзаудæн фестиваль – 2016”-ы. Зæгъын хъæуы уый æмæ ахæм фестивалмæ аивадон гимнастикæйы федерацийы минæвæрттæ Хуссар Ирыстоны сывæллæтты фæхонынц æппынæдзух. Вæййы сын æнтыстытæ дæр.

Табуты Роберт куыд зæгъы, афтæмæй сабитæ разæнгардæй цæуынц ленк кæныны секцимæ. Цыппæрæм хатт уагъд æрцыд нæ республикæйы чемпионат ленк кæнынæй. Фæстаг хатт ерыстæ цыд ленк кæныны ахæм стилæй, куыд брас. Раздæр та ерыстæ уагъд æрцыдысты фæсонтыл ленк кæнынæй, сæрибар стилæй æмæ баттерфляйæ. Ерысты хайад райстой 190 сабийæ фылдæр. Æнтыстытæ сабитæн сæ къухы æфты  нæ республикæмæ Уæрæсейæ хуынд специалист Евгения Терлеевайы фæрцы. Йæ архайды фæрцы спорты ацы хуыз ссис иттæг популярон.

Тренер йæхæдæг райгонд у, фыццаг ахуыры аз нæ сывæллæттæн ахæм æнтыстытæ кæй ис, уымæй.

Табуты Роберты ныхæстæм гæсгæ, бокс æмæ уæгъдибар хъæбысхæст дæр сты тынг популярон, уыдоны дæр архайы фæйнæ сæдæ сывæллоны.

– Армспорт æмæ нæм уæззау атлетикæйæ къаддæр сывæллæттæ цæуы – фæйнæ 16. Хъавæм ноджы æндæр секцитæ бакæнын дæр. Стыр æхсызгонæй мæ фæнды фехъусын кæнын – цыдæриддæр «Олимп»-ы секцитæ ис, иууылдæр сты æнæаргъæй, – зæгъы Табуйы фырт.

Спортивон комплекс «Олимп»-ы ма секцитæй дарддæр  архайы фитнес зал дæр æмæ спортсментæн хинайæнтæ, кæцытæ сты фидгæ. Комплексы территорийыл ис спортивон инвентары магазин. Афтæ ма хæрæндон, кæцыйы ис сихор бахæрæн дæр. Уый арæзт æрцыд экономикон райрæзты министрады уынаффæмæ гæсгæ. Ардыгæй цы æфтиæгтæ цæуы, уыдон хардз æрцæуынц сæрмагондæй спортсментыл.

Нæ фарстæн, ома, «Олимп»-ы цы спортсментæ архайы, уыдон ерыстæм арæх ацæуынц, – загътаТабуты Роберт.

– Цас арæхдæр хайад исой нæ сывæллæттæ ерысты, уыйбæрц пайдадæр у спортсменæн. Спорткомплекс «Олимп»-ы бæстыхайæ хъуамæ хизой фидæны чемпионтæ. Уыимæ иумæ ма мæ фæнды, цæмæй спортыл хæст уой гæнæнуæвгæйæ фылдæр сывæллæттæ. Банысангонд нывæзт сæххæст кæнынæн бахъæудзæн уæлæмхас финанстæ агурын. Мæнмæ афтæ кæсы æмæ уый тыххæй хъуамæ спортивон комплекс «Олимп»-æн хъуамæ уа йæхи сæрмагонд хыгъд, – зæгъы спорткомплексы директор Табуты Роберт.

«Олимп» бакæныны рæстæджы Алина Кабаевайы фæндиаг нæ сабитæн уыд: «Мæн тынг фæнды, цæмæй ацы спортивон комплексæй рацæуой Европæйы, дунейы æмæ Олимпион хъазты чемпионтæ». Хуыцау зæгъæт, цæмæй ацы ныхæстæ хъуыддаджы сæххæст уой.

Уазæгты Марфа

Comments are closed, but trackbacks and pingbacks are open.