Республикæ Хуссар Ирыстоны делегаци Хицауады Сæрдар Джуссойты Константины сæргълæудæй активон хайад исы Петербурджы 26-æм æхсæнадæмон экономикон форумы хъуыддагон программæйы мадзæлтты. Форум райдыдта 5-æм июны æмæ аххæсдзæн 8-æм июнмæ.
Делегацийы сконды сты Уæрæсейы Федерацийы Республикæ Хуссар Ирыстоны æххæстбарджын минæвар Гасситы Знауыр, Хицауады Сæрдары хæдивæг – финансты министр Тадтаты Дзамболат, экономикон рæзты министр Хъотайты Сæрмæт, Уæрæсейы Федерацийы Республикæ Хуссар Ирыстоны базарадон минæвар Гогинов Таймураз, РХИ-йы гом акционерон æхсæнад «Акционерный Сбербанк»-ы правленийы директор Бекъойты Сослан.
«Петербурджы æхсæнадæмон экономикон форум – 24»-йы фæлгæтты раздæр банысангонд бадзырдтæм гæсгæ, къухтæ æрфысдзысты базарадон-экономикон, зонадон-техникон æмæ культурон-гуманитарон фадгуыты æмгуыст кæныны тыххæй Ульяновскы областы сразыдзинæдыл, афтæ ма фидар æрцыд Ленинграды областы æнгæс сразыдзинады реализацийы фæдыл план. Уыцы сразыдзинадыл къухтæ æрфыстæуыд ивгъуыд аз.
Хуссарирыстойнаг делегацийæн фембæлдтытæ уыдзæн Уæрæсейы регионты хицауиуæгад æмæ хъуыддагон æмæхсæнады минæвæрттимæ.
«Петербурджы æхсæнадæмон экономикон форум раззагон экономикон фарстатыл уынаффæ кæнынæн егъау фæзуат у. Хуссар Ирыстонæн тынг ахсджиаг у Уæрæсейы экномикон тыгъдадимæ интеграци адарддæр кæнын, хъуыддагон партнерты къорд ауæрæх кæнын, республикæмæ инвесторты æрбацыдæн уавæртæ саразын. Уырны мæ Петербурджы æхсæнадæмон экономикон форумы хайадист махæн уыдзæн æнтыстджын», – загъта Хуссар Ирыстоны Хицауады Сæрдар Джуссойты Константин.
ССАРДТОЙ БЕСЛÆНЫ ТРАГЕДИЙЫ АМÆТТÆГТЫ РУХС НОМ
5-æм июны Хуссар Ирыстоны Хицауады Сæрдар Джуссойты Константин æмæ Республикæ Цæгат Ирыстон – Аланийы Сæргълæууæг Сергей Меняйло Петербурджы æхсæнадæмон экономикон форумы делегаттимæ иумæ ссардтой Беслæны трагедийы амæттæгты рухс нæмттæ.
Церемонийы хайадисджытæ дидинджытæ сæвæрдтой «Детям Беслана»-йы цырты раз æмæ цырæгътæ ссыгътой Мады Майрæмы аргъуаны.
Беслæны трагедийы амæттæгты тыххæй цырт сарæзтæуыд 2007 азы æмæ уæдæй нырмæ арвылаз дæр уым фæуадзынц фыдохы митингтæ уыцы трагедийы фæмардуæвджыты мысынæн.
КЪУХТÆ ÆРФЫСТОЙ СРАЗЫДЗИНÆДТЫЛ
«Петербурджы æхсæнадæмон экономикон форум – 24»-йы фæлгæтты 6-æм июны къухтæ æрфыстæуыд Республикæ Хуссар Ирыстон æмæ Ульяновскы областы ‘хсæн базарадон-экономикон, зонадон-техникон æмæ культурон гуманитарон фадгуыты æмгуыст кæныны тыххæй сразыдзинадыл.
Документыл сæ къухтæ æрфыстой РХИ-йы Хицауады Сæрдар Джуссойты Константин æмæ Ульяновскы областы губернатор Алексей Русских.
Дыууæ фарсы дæр банысан кодтой, цæттæ кæй сты æнæниздзинад хъахъхъæнын, культурæ, спорт, туризм, сæудæджерады фадгуыты æмгуыст кæнынмæ, инвестицион архайд, ахуырадон организациты зонадон-техникон æмæ партнерон ахастытæ фидар кæнынмæ.
«Æддагон бастдзинæдты рæзт, хъуыддагон партнерон ахастытæ аразын у Хицауады ахсджиагдæр хæслæвæрдтæй сæ иу. Уый ахъаз у республикæйы сæрмагонд потенциалы рæзтæн, экономикæйы бæрæггæнæнты рæзтæн, Хуссар Ирыстоны инвестицион хæрзвадатдзинад фæхуыздæр кæнынæн. Мах фæнд кæнæм Ульяновскы областы Хицауадимæ агросæудæджерадон комплексы, туризмы, сæудæджерады проекттæ реализаци кæнын, кæрæдзийы культурон æмæ ахуырады фæлтæрддзинадимæ зонгæ кæнын. Уыцы хъуыддаг хæларадон ахастыты ракæндзæн ног æмвæзадмæ, фæхъæздыгдæр кæндзæн нæ регионты культурæ», – загъта Джуссойты Константин.
Хицауады сæргълæууæг фехъусын кодта, зæгъгæ, радон къахдзæф уыдзæн, дыууæфарсон сразыдзинады реализацийы плæнттæ аразыны тыххæй иумæйаг кусæгон къорд саразын.
Ульяновскы областимæ сразыдзинадыл къухтæ æрфыстæуыд Республикæ Хуссар Ирыстон æмæ Уæрæсейы Федерацийы ‘хсæн Хæлардзинад, æмкуысткæнынад æмæ кæрæдзийæн æххуысы тыххæй æмæ дыууæ паддзахады ‘хсæн Æмцæдисад æмæ интеграцийы тыххæй бадзырдты фæлгæтты.
ФИДАР ÆРЦЫД СРАЗЫДЗИНАДЫ РЕАЛИЗАЦИЙЫ МАДЗÆЛТТЫ ПЛАН
6-æм июны ма Петербурджы æхсæнадæмон экономикон форумы фæзуатыл фидар æрцыд, 2024-2025 азтæн базарадон-экономикон, зонадон-техникон æмæ социалон-культурон фадгуыты 2023 азы Хуссар Ирыстоны æмæ Ленинграды областы хицауадты ‘хсæн арæзтæрцæуæг сразыдзинады реализацийы мадзæлтты план.
Æмкуысткæнынады планыл сæ къухтæ æрфыстой Республикæ Хуссар Ирыстоны Хицауады Сæрдар Джуссойты Константин æмæ Ленинграды областы губернатор Александр Дрозденко.
Александр Дрозденко банысан кодта, зæгъгæ, Ленинграды областы Хицауад цæттæ у Хуссар Ирыстонимæ æмкуысткæнынадмæ.
«Мах нæ къухтæ æрфыстам алыварсон æмкуысткæнынадмæ здæхт планыл. Уый у фыццаг къахдзæф Хуссар Ирыстонимæ æххæстмасштабон бастдзинæдтæ аразынмæ. Мах цæттæ стæм æмкуысткæнынадмæ æрмæст экономикæйы фадыджы нæ, фæлæ культурæ æмæ ахуырады фадгуыты дæр. бузныг хуссарирыстойнаг коллегæтæн, инвестортæн уавæртæ саразыны тыххæй нæ проект «Зеленый коридор»-ы проекты фарс кæй рахæцыдысты, уый тыххæй», – бахахх кодта Александр Дрозденко.
Къухтæ æрфыссыны официалон церемонийы фæстæ дыууæ фарсы лæмбынæг æруынаффæ кодтой дыууæфарсон сразыдзинады реализацийы планыл.
Джуссойты Константин куыд банысан кодта, афтæмæй планы нысан æрцыдысты республикæйы размæцыды приоритетон фадгуыты кæрæдзийы фæлтæрддзинадимæ зонгæ кæныны тыххæй конкретон мадзæлттæ.
«Ноджы иу къахдзæф сарæзтам Ленинграды областимæ æмкуысткæнынады рæзтмæ. Сразыдзинады реализацийы план æнхъæвзы дывæрсыг интересты къорд актуалон фарстатыл. Махæн ахсджиаг сты экономикæмæ раст инвестицитæ, сæудæджерады фадыджы æмкуысткæнынады, хъæууон хæдзарады, туризмы, ахуырады, экономикæйы реалон секторы, инвестицион политикæйы культурæйы æмæ инновацион архайды рæзтæн ахъаз чи сты, ахæм мадзæлттæ», – банысан кодта Джуссойты Константин.
Планмæ бахастæуыд энергетикæйы, арæзтады, транспорты, цæрæнуатон-коммуналон хæдзарады, агросæудæджерадон комплексы, фæсивæдон политикæйы, физикон культурæ æмæ спорты, æнæниздзинад хъахъхъæныны, социалон лæггæдты, ахуырады, туризмы, культурæ æмæ аивады рæзты тыххæй конкретон мадзæлттæ.
План сарæзтой Хуссар Ирыстон æмæ Ленинграды областы профилон ведомствотæ.
ДЖУССОЙТЫ КОНСТАНТИН ФЕМБÆЛД ГЕОРГИ МУРАДОВИМÆ
6-æм июны Джуссойты Константин фембæлд Республикæ Хъырымы Министрты Советы Сæрдар, Уæрæсейы Федерацийы Президенты цур Республикæ Хъырымы минæвар Георги Мурадовимæ.
Джуссойты Константин æмæ Георги Мурадов уынаффæ кодтой базарадон-экономикон, зонадон-техникон æмæ культурон фадгуыты æмкуыст кæныны тыххæй сразыдзинады реализацийы дарддæры къахдзæфтыл.
Ацы сразыдзинадыл дæр къухтæ æрфыстæуыд ивгъуыд азы, Петербурджы æхсæнадæмон экономикон форумы фæзуаты.
«Нæ хæс у Уæрæсеимæ æмкуысткæнынад дарддæр дæр рæзын кæнын, товарæрзылд фæфылдæр кæнын, кæрæдзийы фæлтæрддзинадимæ зонгæ кæ-нын.
Республикæйы къухдариуæгад, Президент Гаглойты Аланы сæргълæудæй, алыварсонæй дæр хæцы ацы хъуыддаджы фарс æмæ мах дæр фадæттæ агурæм нæ разылæууæг хæслæвæрдтæ аскъуыддзаг кæныны тыххæй», – банысан кодта Джуссойты Константин.
ХУССАРИРЫСТОЙНАГ ДЕЛЕГАЦИ ХАЙАД ИСЫ ПЛЕНАРОН РАБАДТЫ
Хуссарирыстойнаг делегацийы уæнгтæ Хицауады Сæрдар Джуссойты Константин, Хицауады Сæрдары хæдивæг – финансты министр Тадтаты Дзамболат æмæ экономикæйы министр Хъотайты Сæрмæт хайад райстой Петербурджы æхсæнадæмон экономикон форумы пленарон рабадты. Мадзалы хайад райста Уæрæсейы Федерацийы Президент Владимир Путин дæр.
Пленарон рабадт цымыдисон у федералон министртæ æмæ регионты къухдариуæггæнджытæн, фыдыбæстæйон бизнесы минæвæрттæн, хицауиуæгады алыгъуызон органтæн, фæсарæйнаг амалиуæггæнджытæн.
Ацы аз Петербурджы æхсæнадæмон экономикон форум цæуы «Экспофорум»-ы конгрессон-равдыстыты центры.
Йæ сæйраг нысан у æмбар æмæ кæрæдзийæн æххуысы бындурыл хъуыддагон æмкуысткæнынад.
Форумы сæйраг темæ та у «Бирæполярондзинады бындур – размæцыды ног центры рæзт».
Нæ уацх.
Ацы æрмæджытæ дæр бакæс:
Форум фæахъаз уыдзæн, цæмæй уæрæсе æмæ хуссар ирыстоны æфсымæрон бæстæтæ æнтыстджынæй размæ цæуой
Æнтыстджын экономикон форум
Петербурджы æхсæнадæмон экономикон форумæй
Хуссар Ирыстоны делегаци Петербурджы æхсæнадæмон экономикон форумы
РХИ-йы Парламенты делегаци хайад исы «Парламентаризмы рæзты» II дунеон форумы
