Уæд Хуссар Ирыстоны цы æрцыдис, уый æнæнхъæлæджы нæ уыдис. Хуссар Ирыстоны скуынæг кæныны хъуыддаг биноныгæй цæттæ кодта гуырдзиаг разамынад æмæ æрбафсæрстой бирæнымæц æфсад æмæ нырыккон хæстон  техникæимæ, Ирыстоны «æнæсæттон адæмы» кæронмæ скуынæг кæнынмæ.

Гуырдзыстоны гарзджын тыхтæ уæрæхма-сштабон хæст райдайыны хæдагъоммæ, 6-æм августæй 7-æм августмæ æхсæвы сæфсæрстой Цхинвалы районы Дменисы хъæумæ. Хъæубæсты æхстой хæцæнгæрзты æппæт хуызтæй. Ракодтой сын стыр зиæнттæ дæр. Æрцыд дзы удызиæнттæ. Уыцы-иу рæстæджы æхстой Сарабукъы хъæумæ дæр. Фæндыд сæ бæрзæндтæ бацахсын æмæ ууылты Дзауы коммæ ныххизын.

Ирон сахъ лæппутæ сæхиуыл хæцыдысты. Се ‘хстытæн сын 40 минуты дæргъы дзуапп нæ лæвæрдтой. Гъе, фæлæ куыннæ æмæ куыннæ æнцадысты, уæд уыдон дæр æхсын райдыдтой…

7 августы райсомæй Гуырдзыстоны гарзджын тыхтæ æхсын райдыдтой горæт Цхинвалы цæрæн кварталтæм. Æхсгæ та бындуронæй кодтой Никозы хъæуæй. Æхстыты фæстиуæгæн фыццаг зиæнттæ æрцыд Цæрæн массивыл.

7-æм августы ма Гуырдзыстоны гарзджын тыхтæ тынг æхстой Цхинвалы районы Къостайыхъæумæ дæр. Стыр зиæнттæ ракодтой хъæубæстæй бирæты хæдзæрттæн, уыдис дзы уды зиæнттæ æмæ цæфтæ, акодтой дзы амынæтты.

Гъе, фæлæ дзы хъуыддæгтæ уый фæстæ уыд. 7-æм августæй 8-æм августмæ æхсæвы сæ æхсынæй æппындæр нæ банцадысты. Уæлдай тынгдæр та æхстытæ скарз сты 8-æм августы æмæ уый фæстæ бонты, цалынмæ нæм æххуыс фæзынд, уæдмæ. Æгæрон стыр зиæнттæ ракодтой горæтæн. Иу хæдзар нæ разынд, зиан кæмæн нæ бакодтой. Фæлæ уæд иууыл стырдæр зиæнттæ æрцыд Остъайы фырты уынджы 16, 18, 19, 20, 33, 34 æмæ 35-æм хæдзæрттæн.

Сталины уынджы спортскъолайы дæллаг фарс цы хæдзар ис, уымæн дæлæрдыгæй къулыл сæмбæлд снаряд 3-аг æмæ 4-æм уæладзгуыты къулыл æмæ йæ батыдта. Цалдæр фатеры дзы цъыбыртты сыгъд баисты. Сталины уынджы 100-æм хæдзары дæлæрдыгæй къулыл сæмбæлд 4 снаряды æмæ йæ фегæмттæ кодта. Тагъд станцы уæлхæдзар ныппырх. Ныппырх сты 65 æмæ 58, 57, 53, 51, 49, 47-æм хæдзæрттæ. 19-æм хæдзар та цъыбыртты сыгъд бацис.

Тельманы уынджы 89-æм бирæуæладзыгон хæдзары фыццаг уæладзыджы дыууæ хатæны къултæ батыдтой дæлæрдыгæй фарс. Гъе, фæлæ дзы хъуыддæгтæ уыцы хæдзарæй суанг Исахъы уынджы онг æрцыд. Куыд уынгæн йæ уæллаг фарс, афтæ дæллаг фарс дæр хæдзæрттæ иууылдæр цъыбыртты сыгъд баисты. Мидхъуыддæгты министрады уæллаг фарс дæр цыппар хæдзары пырх æмæ сыгъд æрцыдысты. Афтиагæн дæр ракодтой стыр зиæнттæ. Ныппырх йæ уæллаг фарс сывæллæтты цæхæрадонæн. Ныппырх сты æмæ басыгъдысты Парламенты хæдзар, Мæскуыйы уынгыл универмаг, Паддзахадон университет. Вокзалгæрон уынджы бæстыхæйттыл дæр бирæ рæтты сæмбæлд снарядтæ æмæ сын стыр зиæнттæ ракодта. Пырх æмæ дæрæн æрцыд Профцæдисты хæдзар дæр. Уыцы  ран, йæ хæдразмæ, хæст сытынг ис. Абон дæр ма агъуыстмæ бахизæны æвдисæн лæууы танчы мæсыг.

Ленины уынджы хæдзæрттæ дæр æвыдæй нæ баззадысты. Зонад-иртасæн институты къулыл сæмбæлд снаряд æмæ йæ батыдта. 11, 14, 15 æмæ 17-æм хæдзæрттæ тынг ныппырх сты. Стыр зиæнттæ рачындæуыд 19-æм хæдзарæн дæр. 24-æм æмæ 41-æм хæдзæртты къултæ батыдта. Стыр зиæнттæ рачындæуыд республикон библиотекæйæн, 62, 66, 88, 95, 97, 99, 101, 107, 113 æмæ 115-æм хæдзæрттæн. Цъыбыртты сыгъд баисты 116, 118 æмæ 120-æм цæрæн хæдзæрттæ. Бынтон ныппырх 5-æм астæуккаг скъолайы уæлхæдзар. Цалдæр раны снарядтæ сæмбæлдысты йæ къултыл дæр. Стыр зиæнттæ ма ракодтой 143, 147 æмæ æндæр цæрæн хæдзæрттæн.

Гæззаты Вадимы уынджы 6, 7, 9, 10-æм, 12-æм хæдзæртты уæлхæдзæрттæ ныппырх сты. 13, 15 æмæ 17-æм хæдзæрттæ цъыбыртты сыгъд баисты. Дзабиты Геннадийы уынджы цъыбыртты сыгъд баисты 72, 74, 76 æмæ æндæр хæдзæрттæ дæр. Октябры уынджы 118-æм хæдзары уæллаг фарс басыгъдысты фатертæ.  Уыдон сты, æдæппæт чи ныппырх, уыцы бæстыхæйттæн сæ иу хай. Абон уыцы пырх хæдзæртты бынæтты, иу стæмтæй дарддæр, сырæзтысты ног, райдзаст хатæнтимæ бæстыхæйттæ, фæлæ кæд 10 азы рацыд, уæддæр нырма йæ хъæдгæмттæн хос кæны нæ горæт.

Стыр Уæрæсейы æххуысæй азæй-азмæ ивы йæ хуыз, рæсугъдæй-рæсугъддæр кæны. Абон тас нал у ахæм æбуалгъдзинæдтæй æмæ хъуамæ архайæм нæ цард бонæй-бон рæсугъддæр кæныныл.

Бестауты Валя

Comments are closed, but trackbacks and pingbacks are open.