Фыдыбæстæ хъахъхъæнæджы бон, 23 февраль… Æмæ йæ кæд нæ хъахъхъæдтой ирон адæм? Райдай суанг 19-æм æнусы Герман æмæ Туркимæ хæстæй æмæ фæу абоны онг. Æрмæст Фыдыбæстæйы Стыр хæсты мингай хæстонтæ сæ сæртæ æрхастой нæ бæстæйы сæраппонд. Уæдæ чысылнымæц адæм уæвгæйæ, хæсты хъæбатыртæ махæй фылдæр кæмæ ис.
Ныр дæр та Украинæйы сæрмагонд операцийы рæстæджы фæстæ нæ баззадысты. Цалдæр мæймæ дзы Ирыстоны лæппутæй сæ цард радтой 190 адæймаджы. Уый официалон бæрæггæнæнтæм гæсгæ. Ныртæккæ тохы быдыры Ирыстонæй ис 7500 хæстоны.
Рагæй фæстæмæ алыхуызон хæстыты сæ цард цы фæлтæртæ радтой, уыцы хъæбатырты ном ссарынæн æрæджы, Фыдыбæстæ хъахъхъæнæджы боны цытæн, Ирон академион-драмон театры сценæйыл, Æппæтуæрæсейон инвалидты æхсæнады хъæппæрисæй, арæзт æрцыд концерт-мысæн изæр.
Сценæмæ схызт Инвалидты æхсæнады сæрдар Бетрозты Ритæ æмæ зæрдæбын арфæ ракодта ахæм мадзал чи бацæттæ кодта, уыдонæн. «Фыдыбæстæйы сæрыл сæ цард цы бирæ фæлтæртæ радтой, уыдоны ном рох никуы уыдзæн æмæ сæ кæддæриддæр рæсугъдæй мысдзыстæм. Ахæм мысæн мадзæлттæн ис стыр патриотон æмæ хъомыладон нысаниуæг. Уыдон нал хъæуынц чи нæ уал ис, уыдоны. Уыдон хъæуынц сæ фæстæ цы фæлтæрты ныууагътой, уыцы фæсивæды». Уый фæстæ æхсæнады сæрдар Арфæйы фыстæджытæй схорзæхджын кодта Ирон драмон театры аивадон разамонæг Уалыты Гивийы, Беслæны администрацийы Сæргълæууæг Тæтæраты Вадимы æмæ ирон дзаумæттæ хуыйыны æрмдæсны Дзаккойты Ритæйы, рæзгæ фæлтæры хъомыладон куыстмæ се стыр бавæрæн бахæссыны тыххæй.
Концерт фыццаг байгом кодта Рахисфарсы районы, алыхуызон конкурстæ æмæ фестивалты лауреат, цалдæр Гран-прийы уæлахиздзау, ансамбль «Зæринæ», йæ аивадон разамонæг Хъайтмазты Мæдинæ. Уыдон акафыдысты «Нарты зæхх», «Симд», «Чызджыты кафт», «Зилгæ кафт», «Цыгайнаг кафт», «Дыгурон кафт» æмæ æндæртæ. Уымæй дарддæр ма дзы сæ аивад равдыстой Карсанаты Мæхæмæты доулистты ансамбль «Ритмы гор», зарæггæнджытæ Хъайтмазты Мæдинæ, Хадыхъаты Аллæ, Джихаты Роман, Къуындыхаты Мурат, Гуццаты Нодар, Туаты Руслан, Дзитойты Ингæ æмæ Эльбрус, Æгаты Алена, Хетъеты Станислав, Дзæхаты Зæлинæ…
Уыцы бонты ма бæрæгбонон мадзæлттæ цыдысты республикæйы бирæ рæтты. Удæгас дидинджытæ æмæ веноктæ æвæрд æрцыд хæстон цыртдзæвæнтæ æмæ мемориалтыл.
Республикæйы Сæргълæууæг Сергей Меняйло Хицауады хæдзары фембæлд алы фæлтæры хæстонтимæ. Уæрæсейы Президент Владимир Путины Барамындæй майдан «За отвагу»-йæ хорзæхджын æрцыд Украинæйы хæстон операцийы архайæг Епхия Жоржикашвили.
Республикæйы Сæргълæууæджы Барамындæй «Ирыстоны Намысæн»-æй хорзæхджын æрцыдысты Украинæйы хæстон операцийы архайджытæ Хъаныхъуаты Владимир æмæ Кодзырты Олег.
«Ирыстоны Намысæн»-æй ма хорзæхджын æрцыдысты Афганистаны хæсты хъæбатыртæ Хъабанты Тамерлан, Гутнаты Владимир æмæ Жажиты Витали.
Кады грамотæтæ ма райстой 58-æм æфсады афицертæй иу къорд.
Цалынмæ нæ хорз адæмтæн, нæ хъæбатыртæн кад кæнынхъом стæм, уæдмæ дунейы фарнæн сæфæн нæй.
ДЖУСОЙТЫ Нинæ
Comments are closed, but trackbacks and pingbacks are open.