Уый уыд хæдахуыр артистты арæхстдзинад

  Ирон адӕмы уарзон хъӕбул, генион поэт, йӕ раттӕг адӕмы ӕнувыд фырт ӕмӕ сӕ барты сӕрыл иузӕрдион тохгӕнӕг Хетӕгкаты Къоста алы фӕлтӕрӕн дӕр у мысинаг, стыр аргъ ын кӕнынц йӕ ӕнӕмӕлгӕ сфӕлдыстад ӕмӕ бакӕнгӕ хъуыддӕгтӕн. Поэты райгуырды боныл кадимӕ сӕмбӕлынц Иры дзыллӕ, цытджын ӕгъдауӕй йын банысан кӕнынц йӕ юбилей. Афтӕ уыд 1989 азы дӕр, уӕд Къостайы райгуырдыл сӕххӕст 130 азы ӕмӕ Ирыстоны алы адӕймаг дӕр стыр разӕнгардӕй ӕмбӕлд кадджын бӕрӕгбоныл, уыцы зӕрдылдаринаг бонмӕ йӕхи цӕттӕ кодта развӕлгъау.

Афтӕ уыд Цхинвалы районы Къостайыхъӕуы дӕр. Уӕд районы Культурӕйы хайад (йӕ сӕргълӕууӕг Тадтаты Юзӕ), клубы сӕргълӕууӕг Плиты Ирӕ ӕмӕ бынӕттон хӕдархайгӕ адӕмон театры коллектив сфӕнд кодтой поэты ӕнӕмӕлгӕ уацмыс «Фатимӕ»-мӕ гӕсгӕ, Н. Козловы фыст пьесӕйӕ спектакль бацӕттӕ кӕнын ӕмӕ уый театрдзауты размӕ рахӕссын. Кӕй зӕгъын ӕй хъӕуы, ахӕм вазыгджын хӕс ӕнтысгӕйӕ сӕххӕст кӕнын ӕмӕ йӕ сценӕйыл равдисын ӕнцон нӕ уыд. Уый домдта бирӕ тых ӕмӕ хъару бахардз кӕнын. Режиссер йӕ зӕрдӕ дардта ӕмӕ хӕдахуыр артисттӕй алкӕй арӕхстдзинад ӕмӕ ӕвзыгъддзинад рахатгӕйӕ, рольтӕ адих кодта тынг хорз, ӕмӕ уымӕ гӕсгӕ алчи дӕр баууӕндыд йӕ тыхтыл ӕмӕ ӕдзухдӕр хъуыды кодтой сӕ саразгӕ фӕлгæнцтӕ ирддӕрӕй равдисыныл, сценӕмӕкӕсджыты зӕрдӕтӕ куыд хуыздӕр барухс кӕной, ууыл уыд сӕ архайд.

Куыд адӕмон театры уӕды азты хайадисӕг, афтӕ хъуыды кӕнын, ӕвзонг артисттӕ уыцы цауыл куыд зӕрдиагӕй сӕмбӕлдысты, уый. Цыбыр рӕстӕгмӕ рольтӕ адих кодтой ӕмӕ ӕрӕвнӕлдтой репетицитӕм. Ӕвӕрӕг – режиссер уыд, ныртӕккӕ дзӕнӕттаг, Мӕхъиты Дарикъо, нывгӕнӕг-декоратор – Плиты Анзор, тохты эпизодтӕ ӕвӕрӕг та Хъӕцмӕзты Лазар. Ноджыдӕр ма йӕ зӕгъын, спектаклыл хӕдахуыр артисттӕ кӕй куыстой уӕхскуӕзӕй, алы репетицимӕ дӕр цыдысты рӕстӕгыл ӕмӕ сын бантыст сӕ хъайтарты миддуне ӕххӕстӕй райхалын. Спектаклы сӕйраг- Фатимӕйы роль ахъазын хӕсгонд ӕрцыд, уынд ӕмӕ кондӕй, стӕй сценӕйы ралӕуды роль сӕххӕст кӕнынмӕ цӕттӕ чи уыд, ахӕмы. Уый та уыд сценӕмӕкӕсджыты уарзон артист Карсанты Донарӕ. Уымӕн йӕ алы ралӕуд дӕр уыд зӕрдӕмӕдзӕугӕ, ӕцӕг профессионалон артистӕй хъауджыдӕр нӕ уыд ӕмӕ уый фӕстиуӕгӕн йӕ аив хъазтӕй йӕхимӕ ӕркӕсын кодта йӕ табугӕнджыты. Уый тыххӕй йын кодтой тыхджын къухӕмдзӕгъд, дидинджытимӕ йӕм театрдзаутӕ цыдысты арфӕтӕ кӕнынмӕ. Уый уыд 1989 азы апрелы мӕйы, коллектив спектакль цалдӕр бынаты равдисыны фӕстӕ, сфӕнд кодта, нӕ горӕты Хетӕгкаты Къостайы номыл паддзахадон драмон театры йӕ равдисын дӕр. Адӕм тынг разӕнгардӕй цыдысты коллективы арӕхстдзинад фенынмӕ ӕмӕ  зал йӕ тӕккӕ дзаг уыд театрдзаутӕй ӕмӕ здӕхгӕ дӕр кодтой хорз тӕлмӕнтимӕ. Областон газет «Сабчъота Осети» ацы цауы тыххӕй ныммыхуыр кодта уац ӕмӕ раппӕлыд, спектаклыл чи бафыдӕбон кодта, сӕ аив хъазтӕй сценӕмӕкӕсджыты чи фӕхайджын кодта, уыдонӕй. Канд Карсаны чызг йӕ хорз хъазтӕй нӕ балхӕдта театрдзауты зӕрдӕ. Спектаклы иннӕ рольтӕ та ӕххӕст кодтой Хацырты Нодар (Наиб), Биазырты Феликс (Джамбулаты роль), Тыджыты Батрадз (Ибрагим), Биазырты Дианӕ (Зарӕ), Хъалӕгаты Нинӕ (Косерхан). Уацы дзырдӕуы, зӕгъгӕ, цалдӕр фразӕ рантыст Багаты Георги ӕмӕ Гуыззыдтаты Таймуразы ралӕудӕй, фӕлӕ сӕ уӕддӕр сӕ аив хъазтӕй сценӕмӕкӕсджытӕ бадардтой сӕ зӕрдыл. Дарддӕр дзы дзырдӕуы, зӕгъгӕ, спектаклы ӕнтыстмӕ сӕхи хайбавӕрд бахастой театрдзауты уарзон артисттӕ Марданты Феликс, Кокойты Эдуард, Тедеты Ирбег, Плиты Анзор, Хуыбиаты Никъала, Хаситы Ленӕ, Плиты Иринӕ.

Ахӕм уыдысты, Къостайыхъӕуы хӕдархайгӕ коллективы артисттӕ «Фатимӕ»-йы уацмысыл куыд цины ӕнкъарӕнтимӕ куыстой ӕмӕ сӕ алы ран дӕр куыд райгонд уыдысты сӕ табугӕнджытӕ, уыцы цаутӕ цыбыртӕй.

ХУЫБИАТЫ Никъала