16-æм февралы Республикæ Хуссар Ирыстоны Президент Бибылты Анатоли хайад райста РХИ-йы Ахуырад æмæ зонады министрады коллегийы хыгъдон æмбырды, цыран хатдзæгтæ сарæзтой сæ бакæнгæ куысты тыххæй 2021 азæн. Хыгъдон æмбырды ма хайад райстой Ахуырад æмæ зонады фæдыл парламентон комитеты сæрдар Уырыгаты Инал æмæ РХИ-йы Культурæйы министр Зассеты Жаннæ, афтæ ма скъолаты æмæ скъолайы агъоммæйы ахуырадон уагдæтты къухдариуæггæнджытæ.
Гасситы Натали йæ доклады банысан кодта сæ куысты иууыл нысаниуæгджындæр мадзæлттæ, æнтыстытæ æмæ зындзинæдтæ. Афтæ ма æрдзырдта, æппæт дæр арæзт кæй цæуы, цæмæйдæриддæр нæ республикæйы ахуырдзау фæсивæд цухдзинæдтæ ма æййафа æмæ æмбæлон æмвæзадыл ахуыр-хъомыладон куыст цæуа республикæйы ахуыргæнæн уагдæтты. Уый тыххæй та кæй райсынц сæрмагонд мадзæлттæ паддзахады къухдариуæгадимæ.
Ныртæккæ республикæйы уæвынад кæнынц 49 иумиагахуырадон уагдоны. Ахуырад æмæ зонады министрады дæлведомствæйон уагдæттæм ма хауынц Ленингоры районы сывæллæтты хæдзар, Цхинвалы бирæпрофилон колледж, Колыты Аксойы номыл аивæдты лицей, Цхинвалы скъола-интернат, гимнази «Альбион», республикон сывæллæтты сфæлдыстадон галуан, æрыгон техникты станц, æрыгон натуралистты станц, Ахуырады кусджыты квалификаци фæбæрзонддæр кæныны институт æмæ Ахуырады гъæдæн аргъ кæныны центр.
Гасситы Наталийы ныхæстæм гæсгæ 2021-2022 ахуыры азы райдианы астæуккаг ахуырады системæйы ахуыргæнинæгты нымæц у 7009 бæрц, иумиагахуырадон скъолаты педагогон кусджыты нымæц та у 1332 бæрц æмæ скъолайы агъоммæйы уагдæтты та – 361 хъомылгæнæджы. Гасситы Натали банысан кодта, зæгъгæ, нæм куыстмызд куы фæфылдæр, уæдæй скъолаты æмæ скъолайы агъоммæйы уагдæтты педколлективтæ кæй фæфылдæр сты æрыгон кадртæй. Ахæм æрыгон кусджытæ та сты 122 бæрц.
«Тæссаг коронавирусон инфекци Ковид-19 нæм куы рапарахат, уæд-иу арæх хицæн кълæсты кæнæ та-иу ахуырадон уагдæтты иумиагæй бакодтам карантин. Уыцы карантины рæстæджы-иу дарддæр кодтам ахуыр-хъомыладон процесс дистанцион ахуырадон технологиты руаджы. Хъуыддаг дистанцион ахуырадмæ кæй хызтис, уымæ гæсгæ рæстæгыл, ома, развæлгъау арæзт æрцыдысты ахуырадон программæйы къæлиндарон-тематикон плантæ, кæцыты руаджы ахуыр цыдис скъолаты ахуырадон программæ», – загъта министр.
Уымæй дарддæр ма йæ доклады Гасситы Натали банысан кодта, контролон куыстыты æмæ олимпиадæты фæстиуджыты руаджы кæй сбæрæг сты ахуырады процессы цухдзинæдтæ æмæ уый фæстæ бакуыстæуыд конкретон мадзæлттыл, цæмæйдæриддæр уыдон руаджы фæхуыздæр уыдаиккой ахуыргæнинæгты зонындзинæдты æмæ ахуырады гъæд, цæмæй фæстийæ ма баззадаиккой. «Кæй зæгъын æй хъæуы, къаддæр куыст нæ цæуы, се нæниздзинад нывыл кæмæн нæу, уыцы сывæллæтты ахуыры процессыл. Уæрæсейы Федерацийæ æрхуыдтам специалист-дефектолог, кæцы скъолайы агъоммæйы уагдæтты ахуыргæнджытæн уагъта курсытæ сæ квалификаци фæбæрзонддæр кæныны тыххæй ахæм темæйы фæдыл: «Современные коррекционно-развивающие технологии в обучении и воспитании детей с ОВЗ» æмæ сын нысанмæздæхтæй æххуыс кодта сæ куысты хъуыддаджы сывæллæттимæ», – загъта Гасситы чызг.
Хыгъдон доклады ма Гасситы Натали цыбыртæй æрдзырдта министрад цы проектыл бакуыста æмæ сæ среализаци кодта, уыдон фæдыл æмæ дзы сæрмагондæй та рахицæн кодта Национ ахуырады хайады специалистты куыст, кæцытæ хайад райстой Паддзахадон программæ «Сохранение, развитие и изучение осетинского языка на 2022-2024 годы»-йы проектыл. «Нæ республикæйы ирон æвзаг æмæ литературæйы хуыздæр ахуыргæнджытæ хайад райстой æхсæнадæмон зонадон-практикон конференци: «Коста Хетагуров в контексте современного образования»-йы, кæцы уагъд цыдис Къостайы райгуырдыл 162 азы сæххæсты боны цытæн æмæ дзы æнтыстджынæй адæмы рæгъмæ рахастой цымыдисон докладтæ», – банысан кодта Ахуырад æмæ зонады министр.
Хыгъдон доклады ма банысангонд æрцыд уый дæр æмæ Ахуырады министрад стыр хъусдард кæй здахы нæ ахуырдзау фæсивæды хъомылады фарстмæ дæр, афтæ ма министрад ныр цалдæр азы кæй реализаци кæны рæзгæ фæлтæры духовон-хæрзæгъдауон хъомылады программæ. Гасситы Натали бахынцыдта, зæгъгæ, уæлæмхас ахуырады уагдæттæ стыр ахъаз сты рæзгæ фæлтæры курдиæттæ раргом æмæ райрæзыны хъуыд-даджы. «Ахæм уагдæттыл дзырд куы цæуа, уæд, фыццаджыдæр, банысан кæндзынæн Сывæллæтты сфæлдыстадон галуан, афтæ ма æрыгон натуралистты æмæ æрыгон техникты станцæтæ. Ныридæгæн Уæрæсейы Федерацийы нæ коллегæтимæ нæ республикæйы къухдариуæгады æххуысæй, куыст цæуы, Æрыгон техникты станцæйы базæйыл сы-вæллæтты технопарк Кванториум сорганизаци кæныны фарстыл.
Банысан кæнын ма мæ фæнды иу ахсджиаг хъуыддаг: ацы аз Уæрæсейы Федерацийы Хицауады æххуысы руаджы нæ республикæйы ахуыргæнинæгтæ 1 кълæстæй 11-æм кълæсты онг кæй райстой ног ахуыргæнæн чингуытæ æппæт предметтæй дæр, кæцытæ рæстæгыл уæрст æрцыдысты æппæт скъолатыл дæр.
Министр ма йæ хыгъдон доклады банысан кодта, Ахуырад æмæ зонады министрад сæрмагонд хъусдард кæй здахы сидзæр сывæллæттæм, афтæ ма ныййарджытæй æнæхъусдард чи баззайы æмæ царды зын уавæрты чи бахауы, уыдоны сывæллæттæм. Фæстаг дыууæ азы мидæг скъола-интернаты цыппар рауагъдоны райстой фатертæ, йе ‘нæниздзинад мæгуырау кæмæн у, ахæм рауагъдоны та бакодтой пансионат «Забота»-мæ æмæ йæ паддзахад дары.
Республикæ Хуссар Ирыстоны Президент Бибылты Анатоли хыгъдон докладмæ байхъусыны фæстæ, фыццаджыдæр, бузныджы ныхæстæ загъта педагогон коллективæн сæ хæрзиуæгон æмæ удуæлдай куысты тыххæй. «Ацы цард æмæ дуджы идеалон ницы у. Кæй зæгъын æй хъæуы, ис бæрæг проблемæтæ, кæцытæ фылдæрбæрцæй министрады куыстимæ не сты баст, фæлæ гъæдджын куыст ифтонг кæнынимæ. Æз афтæ хъуыды кæнын, æмæ ацы фадæттæ рауæрæхдæр кæныны фæдыл нæ разы цы хæстæ сæвæрдтам, уыдон реализаци кæндзыстæм. Æз афтæ нымайын, æмæ нын кæй бантыст бирæ саразын, уыдоны нымæцы – нæ горæты 3-аг астæуккаг скъолайы арæзтад. Мах хъуамæ кæддæриддæр бузныг уæм Уæрæсейы Федерацийæ йе стыр æмæ иузæрдион æххуысы тыххæй ахуырады къабазы дæр», – банысан кодта Бибылты Анатоли.
Кæронбæттæны ма нæ бæстæйы сæргълæууæг ноджыдæр арфæ æмæ бузныджы ныхæстæ загъта педагогон коллективы адресыл æмæ сын йæ цæст бауарзта фидар æнæниздзинад æмæ хæрзиуджытæ. «Стыр бузныг уын зæгъын уæ куыст æмæ быхсынады тыххæй, нæ сомбоны рæзты хъуыддаджы стыр бæрндзинад кæй хæссут æмæ сывæллæтты размæ кæй кæнут, уый тыххæй. Нæ сомбон та махæн сты нæ сывæллæттæ, кæцытыл хъæуы аудын», – загъта Республикæ Хуссар Ирыстоны Президент Бибылты Анатоли.
ЦХУЫРБАТЫ Ларисæ
Comments are closed, but trackbacks and pingbacks are open.