РАЙСТОЙ КАНДИДАТТЫ СТАТУС

Украинæ æмæ Молдовæ систы Евроцæдисмæ бацæуыны тыххæй кандидатты статусы хицæуттæ. Ахæм уынаффæ райстæуыд 23-æм июны Брюсселы Евроцæдисы саммиты. «Евросовет райста уынаффæ Евроцæдисы уæнгтæ суæвыны тыххæй Украинæ æмæ Молдовæйæн кандидатты статус радтыны тыххæй», – фехъусын кодта Евросоветы сæргълæууæг Шарль Мишель.

Кандидаты статус райсыны æнхъæл уыд Гуырдзыстон дæр, фæлæ Еврокъамис банымадта, зæгъгæ, бæстæ уымæ цæттæ нæма у. Фæлæ Брюсселы цæттæ сты сæ цæстæнгас фæивынмæ, кæд æмæ бæстæ къорд домæны сæххæст кæна, реформæтæ ауадза, уæд. Гуырдзыстоны премьер-министр Иракли Гарибашвили комментаритæ сарæзта Брюсселæй: «Кæй зæгъын æй хъæуы, æз никæй  æнтыстмæ нæ хæлæг кæнын, фæлæ Гуырдзыстонмæ раздæр æмбæлд кандидаты статус æмæ раст нæ сарæзтой. Æндæр стыр адæмтимæ абаргæйæ, махæн уыд уæлдай контрибуци алы ран дæр: Иракы, Афганистаны, Косовойы, Централон-африкæйаг республикæйы. Мах ацы хæстыты бирæ туг ныккалдтам», – загъта Гарибашвили.

УФ-йы Президент Владимир Путин дзуры, зæгъгæ, Евроцæдисмæ Украинæйы бацæуыны перспективæ тæссагдзинадыл нæ нымайы. «НАТО-йæ хъауджыдæр Евроцæдис нæу хæстон организаци, æфсæддон-политикон блок, уымæ  гæсгæ мах алы хатт дæр дзырдтам æмæ дзурæм, мах не стæм йæ ныхмæ», – загъта уый Санкт-Петербурджы Экономикон форумы. Уыимæ саммиты сæйраг темæ, цыран фехъусын кодтой Украинæ æмæ Молдовæйы уынаффæйы тыххæй, уыд Евроцæдисмæ балкайнаг бæстæты интеграцийы фарст дæр. Бæстæты лидертæ æрцыдысты Брюсселмæ æмæ уыдонæй бирæтæ загътой сæ хъуыдытæ Украинæйы тыххæй. Ацы бæстæтæ дæр сæ рæстæджы райстой кандидатты статус, фæлæ абоны онг дæр не систы Евроцæдисы уæнгтæ. Ныр уыдон æмбарынц уый, æмæ кандидатты нымæц кæй фæфылдæр, уый сын кæй аразы, хъæуæг чи нæ у, ахæм конкуренци.

Ныртæккæ Евроцæдисмæ бацæуыны тыххæй кандидатты статус ис 5 паддзахадæн: Албани, Цæгат Македони, Серби, Черногори æмæ Туркæн. Анкара кандидаты статус райста 1999 азы, фæлæ уæдæйæ фæстæмæ иумиагевропæйаг бинонтæм æрбаввахс уæвыны бæсты, ноджы адарддæр ис уыдонæй. «Мæн уырны, украинæйаг адæм стыр иллюзитæ кæй нæ аразы, уый. Цæгат Македонийæн кандидаты статус ис 17 азы дæргъы, Албанийæн та – 8 азы. Уæдæ, табуафиси, Украинæ!», – загъта Албанийы премьер-министр Эди Рама.

Уыимæ ма  Албанийы премьер Евроцæдисы скондмæ ног уæнгты райсыны процедурæ абарста Сэмюэл Беккеты пьесæ «В ожидании Годо»-имæ. Уацмысы хъайтартæ баззадысты рæстæджы æнæмбæрст бынаты æмæ сæ бахъуыд цахæмдæр Годомæ æнхъæлмæ кæсын, кæцыимæ фембæлды фæстæ, цыма уыдон ссардзысты сæ уæвынады нысаниуæг. Банысан кæнын хъæуы уый дæр, æмæ фæстаг паддзахад кæцыйы Евроцæдис райста йе скондмæ, уыд Хорвати 2013 азы.  Йæ райсыны процедурæ аххæссыд 10 азы.

Уыцы иурæстæджы Евроцæдисы бæстæтæ-хайадисджыты лидертæ дæр бамбарын кодтой, зæгъгæ, абоны æнтыст у æрмæстдæр аванс, цæмæй Киев æмæ Кишинев дарддæр ацæуой. «Уый у ахсджиаг символикон сигнал, фæлæ куыд зыны, афтæмæй Украинæйæн уый уыдзæн даргъ фæндаг егъау реформæтимæ, кæцыты бахъæудзæн бирæ рæстæг», – фехъусын кодта Бельгийы премьер-министр Александр Де Кроо.