Хуссар Ирыстоны Хетæгкаты Къостайы номыл паддзахадон драмон театры цытджын æгъдауæй байгом сты Абхазы Республикæйы культурæйы бонтæ. Мадзал байгом кодтой æмæ сценæмæкæсджытæн арфæйы ныхæстæ загътой мадзаламонджытæ Дзуццаты Тамерлан æмæ Саппиаты Зæлинæ. Уый фæстæ ныхасы бар лæвæрд æрцыдис Хуссар Ирыстоны Абхазы Республикæйы минæвар Елбачиты Аланæн. Уый банысан кодта, зæгъгæ, Абхазы Республикæйы бонтæ кæй райдыдтой, уый абхазаг æмæ ирон адæмæн у ахсджиаг культурон цау. Уымæн æмæ ахæм мадзæлттæ ахъаз сты æфсымæрон ахастытæ æнгом кæнынæн.
Уый фæстæ раныхас кодта Хуссар Ирыстоны Культурæйы министр Зæгъойты Радæ æмæ банысан кодта, зæгъгæ, ацы бонты мæ зæрдæ тынгдæр барухс, Абхазы минæвæрттæм цы лозунг федтон, «Из дома в дом», уымæй. Уый у не ‘цæг æфсымæрдзинады нысан, загъта Культурæйы министр.
Йæ раныхасы Абхазы Культурæйы министр Кове Даур дæр банысан кодта мадзалы ахсджиагдзинад æмæ бакаст Хуссар Ирыстоны Президент Гаглойты Алан æмæ ирон адæммæ Аслан Бжания цы арфæйы фыстæг æрæрвыста, уый.
Залыуæвджытæн æвдыст æрцыдис абхазаг адæмон фыссæг Шалодиа Аджинджалы радзырдты мотивтæм гæсгæ æвæрд спектакль «Третий день войны».
Гæззаты Иван
