Ног аз æнтыстджынæй райдыдта нæ республикæйы хъæбысæйхæцджытæн. Уыдонæн 6 майдан рамбулын бантыст 16 онг кæуыл цæуы, уыцы спортсменты ‘хсæн Цæгат Ирыстон-Аланийы чемпионаты. Ерысты уæлахиздзаутæ систы Уанеты Дмитри, Санахъоты Ален æмæ Кокойты Денис. Дыккаг ссис Тедеты Артур, æртыккаг бынæттæ та бацахстой Галуанты Арсæмæг æмæ Бекъойты Валери. Уый фæрцы уыдон райстой Цæгат Кавказы Федералон зылды чемпионаты хайад райсыны бар.
Спортсменты бацæттæ кодтой тренертæ Гæджиты Артур, Джиголаты Андрей, Гæззаты Алан æмæ Коцты Тамерлан.
***
Ирон богал Хуыбылты Ален ссис уæгъдибар хъæбысхæстæй Болгарийы чемпионаты уæлахиздзау. Ален хæцыд 125 кг уæзы категорийы. Уый финалы 10:0 хыгъдæй фæуæлахиз Георгий Ивановыл.
ШАХМАТТÆ
Азы райдианы расгуыхтысты хуссарирыстойнаг шахматисттæ дæр. Уыдонæн хорз бæрæггæнæнтæ уыд Сочийы уагъдцæуæг турнир Sochi open-ы. Уым йæ дæлкъорды классикон шахматтæй фыццаг бынат бацахста Уанеты Лера, блицы та ссис дыккаг. Йæ къорды лæппуты ‘хсæн та фæуæлахиз Михаил Логачев. Иууыл тыхджындæр къорды та блицы Михаил Логачев æмæ Бибылты Алан бацахстой 4 æмæ 5 бынæттæ. Сæ архайдæй сын стыр райгондæй баззад «РХИ-йы шахматты федераци»-йы президент Саулохты Георги.
ФУТБОЛ
Дзæуджыхъæуы футболон командæ «Алани» рахызт улæфтæй. Фыццаджыдæр уал командæ арф медицинон басгæрст рацыд Мæскуыйы æмæ ныр абон, 11 январы атæхдзæн Турчы Антальимæ, цыран сын 11 январæй 25 февралмæ уагъд æрцæудзысты æртæ цæттæгæнæн сборы. Уым ма сын уагъд æрцæудзысты æндæр командæтимæ хъæзтытæ.
ХУРИТЫ Батрадз
