Кæд фæстаг азты криминалон хабæрттæ стæмдæр хæттыты фехъусæм æмæ нæм фыдракæндтæ дæр арæх нал æрцæуы, уæддæр фæндагон-транспортон цаутæн вæййæм æвдисæн. Афтæ зæгъæн нæй æмæ рейдон мадзæлттæ уагъд нæ цæуынц, фæткхалджыты нæ кæныц бæрндзинадмæ, кæнæ нозтджын шофыртæ æфхæрд не ‘ййафынц. Фæлæ уæддæр аваритæ æрцæуы æрвыл къуыри дæр.

Фæндагон змæлды æдасдзинады инспектортæ æмæ ма милицийы сæрмагонд къордтæ алы бон дæр уадзынц рейдон мадзæлттæ, æгæрыстæмæй ма æнæхъæн æхсæв дæр вæййынц патрулон азылдтыты куыд горæты, афтæ районты фæндæгтыл дæр. Фæндагон змæлды æдас-дзинады батальоны командир Коцты Алим куыд банысан кодта, афтæмæй шофыртæм арæх нæ вæййы бары гæххæттытæ, фæцæуынц стыр тагъдадæй, сæ машинæтæ бауромынц æнæмбæлон рæтты æмæ ма ахизынц светофоры сырх рухсыл.

«Ацы аз нæм, фароны азимæ абаргæйæ, къаддæр фæткхалæн цаутæ æрцыдис. Уый та ууыл дзурæг у æмæ шофыртæ сæ машинæтæ скъæргæйæ фылдæр хъусдард здахынц сæ алыварс сæвзæргæ уавæрмæ. Зæгъæм, фарон июлы мæйы 157 шофыры фæивар кодтам светофоры сырх рухсыл кæй ахызтысты, уый тыххæй. Ацы аз та нæм ахæм фæткхалджытæ уыдысты æрмæстдæр 81. Фæлæ, хъыгагæн фæфылдæр ис нозтджын шофырты нымæц. Фарон ацафон æрцахстам 19 нозтджын шофыры, ивгъуыд мæй та уыдысты 47. Ныры рейдон мадзæлттæ, фыццаджыдæр, здæхт сты нозтджын шофырты рабæрæг кæнынмæ», – зæгъы Коцты Алим.

Авариты фылдæр нымæц æрцæуы горæт Цхинвалы æмæ статистикæ хынцгæйæ зæгъæн ис æмæ сæ фылдæр хайы шофыр разыны æвæлтæрд. Уый та ууыл дзурæг у æмæ шофыр машинæ скъæрыны гæххæттытæ кæй райста æрæджы æмæ нырма рæстмæ кæй нæ арæхсы машинæ скъæрынмæ. Бирæтæ автоскъола хорз нысæнттыл фæуыны фæстæ сæхимæ фæкæсынц шофыртæ, фæлæ аварион ситуацийы рæстæджы нал фæцарæхсынц сæхи фыдбылызæй бахизын. Афтæмæй та цас фылдæр рæстæг скъæрай машинæ, уыййас хуыздæр кæндзæнис дæ фæлтæрддзинад. Уымæ гæсгæ æвæлтæрд шофыр йæхи хъуамæ хиза интенсивон змæлд цы уынгтыл ис, уыдоныл цæуынæй.

Цæмæй аваритæ фæкъаддæр уой, уый тыххæй ныр дыууæ азы дæргъы Мидхъуыддæгты министры уынаффæмæ гæсгæ æрвылбон дæр уагъд цæуынц рейдон мадзæлттæ. Фæндагон змæлды æдасдзинады инспектортæ ма рейдты рæстæджы профилактикон куыст фæкæнынц бæлццæттимæ æмæ велосипед скъæрджытимæ, цæмæй уыдон дæр зоной фæндагон змæлды фæткойтæ æмæ сæхи хизой.

ДЖИОТЫ Александр

Comments are closed, but trackbacks and pingbacks are open.