Нæ республикæйы 27-æм июнæй фæстæмæ кусын райдыдта аппаратон-программон комплекс «Ӕдас горæт».
Уæдæй абоны онг ацы фиксацийы камерæты фæрцы бæлвырд æрцыдис 4 минæй фылдæр фæткхалæджы æмæ сæм нæ республикæйы посты службæйы кусджытæ хæдзæрттæм бахастой административон фæткхалыны фæдыл суагъæтæ. «Ӕдас горæт»-ы комплексмæ йæ хъус чи дары, уыцы хайады сæргълæууæг Бабаты Михаил куыд æмбарын кæны, афтæмæй фæстаг дыууæ къуырийы æртæ хатты фæ-къаддæр сты фæткхалæн цаутæ.
«Рæстæг куыд цæуы, афтæ бæрæг къаддæр кæны фæткхалæн цауты нымæц. Шофыртæ, æвæццæгæн, сæрæй ахуыр нæ уыдысты ахæм ногдзинадыл, фæлæ ныридæгæн сæ хъус тынгдæр дарынц фæндагон фæткойтæм – æрныллæг кæнынц сæ тагъдад, æнæгъдау скъæрд нал кæнынц. Кæмдæриддæр æвæрд æрцыдысты фото æмæ видеоафыссæн камерæтæ, уымыты фæндагон фæткойтæ фехалынц стæм хатт, кæнæ та сæ нымæц бæрæг фæкъаддæр ис. Зæгъæм, Знауыры районы Фарны хъæуы раздæр кæд боныдæргъы 150 хатты хæлд цыдысты фæндагон фæткойтæ, уæд дзы ныр та 50 фæткхалæн цау дæр нал вæййы», – зæгъы Бабаты Михаил.
Аппаратон-программон комплекс «Ӕдас горæт»-ы уал ныридæгæн кусынц 30 фото æмæ видеоафыссæн камерæйы бæрц, фæлæ азы кæронмæ сæ нымæц хъуамæ схиза 86.
Ацы хъуыддаг хорзæрдæм бандавдзæнис фæндагон змæлды æдасдзинадмæ, фæкъаддæр уыдзысты аваритæ æмæ ма нæм бирæ шофыртæ сахуыр уыдзысты фæткмæ гæсгæ скъæрын дæр. Ӕниу нæм æнæгъдау шофыртæ нырма дзæвгар ис, фæлæ уыдонæн дæр исты амал уыдзæнис. Ӕвæццæгæн райсын бахъæудзæнис ахæм закъон, кæцыйы фæлгæтты æфхæрд цæудзысты æнæсæттон шофыртæ, суанг ахæстоны сбадын кæныны онг.
Нæ уацх.
Comments are closed, but trackbacks and pingbacks are open.