Ирон адæмæн Хуыцау цы бирæ курдиатджын адæймæгты радта, уыдонæй сæ иу у зынгæ ирон фæндырдзæгъдæг, композитор æмæ дирижер Гæздæнты Булат. Уый райгуырдис 22 июны 1936 азы Цæгат Ирыстоны Ольгинскы хъæуы. Музыкæмæ æвзыгъд кæй уыд, уый бæрæг уыдис хæрз чысыл лæппуйæ. Уымæ гæсгæ астæуккаг скъола каст фæуыны фæстæ 1952 азы ахуыр кæнынмæ бацыд Дзæуджыхъæуы музыкалон ахуыргæнæндонмæ. Уыцы иу рæстæджы дзы ахуыр кодта æртæ хайады. 1967 азы йæ ахуыр адарддæр кодта Гнесины номыл Паддзахадон музыкалон-педагогон институты. 1959 азы та кусын райдыдта Цæгат Ирыстоны радиокомитеты оркестры, уыцы азты ма куыста ирон театры дæр.

Æвзонг лæппу уæвгæйæ Булаты бафæндыдис дохтыры дæсныйад райсын дæр æмæ бацыдис медицинон институтмæ ахуыр кæнынмæ. Фæлæ йын æрдз йæ уды музыкæмæ арæхстдзинад æмæ уарзондзинад афтæ арф ахъарын кодта æмæ йæ ахуыр æрдæгыл ныууагъта.

Абон мах Гæздæнты Булаты зонæм, куыд зынгæ фæндырдзæгъдæг, курдиатджын дирижер æмæ композитор. Уый ма æххæст кæны зарджытæ дæр, кæны аивады фæдыздæхты зонадон-иртасæн куыстытæ, фæсивæдæн та у сæ уарзон ахуыргæнæг. Гæздæнты Булат музыкæ æрмæст уарзгæ нæ кæны æмæ йæ кæстæртæн нæ амоны, фæлæ ма æмбырд кæны ирон национ музыкалон фольклор. Уый ма у ахуыргæнæн чиныг «Школа игры на осетинской гормошке для 1-2 классов музыкальной школы» æмæ «Сборник пьес для осетинской гармоники»-йы автор.

Гæздæнты Булаты цардыл нæ цæст рахæсгæйæ, уынæм, уый йæ цард кæй снывонд кодта ирон адæмон музыкæйæн, уымæ гæсгæ дыууæ Ирыстонæн у уарзон хистæр адæймаг.

Ацы аз июны мæйы нæ уарзон фæндырдзæгъдæг Гæздæнты Булатыл сæххæст ис 80 азы. Йæ юбилей йын цытджын æгъдауæй банысан кодтой  Цæгат Ирыстоны. Хайад дзы райстой нæ республикæйы паддзахадон делегаци æмæ йæ аивадæн табугæнджытæ. Йæ юбилейон мадзалы нæ республикæйы минæвæрттæ бирæ арфæйы ныхæстæ зæгъыны фæстæ РХИ-йы Культурæйы министр Остъаты Мадинæ загъта йæ фæндон, цæмæй йе 80 азы юбилей нысан æрцæуа хуссар хайы дæр. Афтæ, æмæ юбиляры Хуссар Ирыстонмæ æрхуыдтой 15 июлы. Йæ юбилейон мадзал уагъд æрцыд киноконцертон зал «Чермен»-ы.

Гæздæнты Булатæн йе 80 азы цытæн арфæ кæнынмæ æрбацыдысты нæ республикæйы къухдариуæггæнджытæ — Президент Тыбылты Леонид, Хицауады Сæрдар Хъуылымбегты Доменти, Парламенты Сæрдар Бибылты Анатоли, Хицауад æмæ Парламенты иннæ уæнгтæ, афтæ ма Булаты сфæлдыстадæн табугæнджытæ æмæ æхсæнады минæ-вæрттæ.

Юбилеймæ æрбацæуæг адæм сæ цины æнкъарæнтæ æвдисгæ-йæ, хъæлдзæг къухæмдзæгъди-мæ сæмбæлдысты Гæздæнты Булатыл. Мадзал байгом кодта нæ горæты администрацийы культурæйы управленийы дæлбар-уæвæг адæмон инструменттты паддзахадон оркестр «Айзæлд».

Ацы рæсугъд бæрæгбонон изæры цы музыкалон уацмыстæ хъуыстысты, уыдонæн сæ фылдæр уыдысты Гæздæнты Булаты фыст æмæ æххæстгонд цыдысты йæ юбилейы цытæн. Юбилейон изæры иууылдæр хъуыстысты ирон национ кæлæнгæнæг музыкæйы зæлтæ, уымæ гæсгæ ма мадзал рахуыдтой ирон национ музыкæйы бæрæгбон дæр.

Цытджын юбилейон изæры мадзаламонæг уыдис Дзуццаты Тамерлан. Уый стыр ирон музыканты тыххæй загъта, зæгъгæ, йæ номимæ æнусы дæргъы баст у ирон национ музыкæ æмæ культурæ. Дыууæ Ирæн та Булат у иумиаг  —  загътаТамерлан.

Бæрæгбонон мадзалы бирæ хъарм ныхæстæ загъд æрцыдис Гæздæнты Булаты тыххæй. Нæ республикæйы адæмон артисткæ Галуанты Людæ мадзалмæ æрбацæуджытæн радзырдта, зæгъгæ, уый Булатимæ базонгæ ис, Мæскуыйы куы ахуыр кодтой алчи йæхи дæсныйады фæдыл, уæд. Уæдæй абонмæ сты стыр хæлæрттæ, æгæрыстæмæй, йæ æфсымæры бынаты дæр æвæры. Банысан ма кодта, зæгъгæ, Булат у нырыккон ирон фæндыры «фыд» мæ йын æз йæ сфæлдыстадон арæхстдзинадæн мæ сæрæй кувын ныллæг, ахæм стыр адæймæгтæн хъæуы аргъ кæнын, зæгъта йæ раныхасы Галуанты Людмилæ.

РХИ-йы Фысджыты Цæдисы сæрдар Хъазиты Мелитон та æрдзырдта Булатимæ сæ хъарм ахастытæ æмæ фембæлдтыты тыххæй. Йе сфæлдыстадон архайды тыххæй та афтæ зæ-гъы: «Абон Булаты тыххæй мах цы фæдзырдтам, уыдон цъус сты, уымæн æмæ ахæм адæймæгтæ, нацийы бæрзæндтæм чи схизынц, уыдон вæййынц тынг цъус, фæлæ Булат дæр ис сæ нымæцы. Йæ фæндырдзагъдмæ кæнæ йæ зарджытæм куы фæхъусæм, уæд адæймагмæ афтæ фæкæсы, цыма зæххон цардæй нал цæры, уæлдайдæр ын йæ цагъдмæ куы фæхъусæм, уæд фæндыримæ цыма иу уд вæййынц, афтæ нæм фæкæсы».

Нæ республикæйы Президент Тыбылты Леонид дæр цытджын юбилярæн загъта зæрдиаг арфæйы ныхæстæ:

— Абон Ирыстоны мах нысан кæнæм стыр бæрæгбон — нæ зынаргъ Булаты 80 азы юбилей. Абон æй мах кæд фæхуыдтам, цæмæй йын йæ райгуырæн бон банысан кæнæм, уæддæр нын уый йæхæдæг йæ диссаджы оркестримæ сæ алæмæттаг музыкалон зæлтæй æрхастой æхцондзинад,. Æз дын уе стыр куысты тыххæй зæгъын стыр бузныг, ныллæг дын кувын мæ сæрæй, бирæ хæрзиуджытæ ма цы хæссай нæ иумиаг Ирыстонæн, уыцы амонд дæ уæт!. Булат, ды лæггад кæныс дæ радтæг адæмæн, кæмфæнды куы вæййынц, уæддæр. Иу рæстæджы нын Турчы цæрæг ирæттимæ уыдис фембæлд æмæ уым дæр дæ хорзы кой фæкодтой. Уæлдайдæр дæ ирон фæндыр цы æвзонг лæппуйæн балæвар кодтай, уый нын æнæ-хъæн изæр цагъта уыцы фæндырыл. Уæдæ нын ноджыдæр бирæ азты æнæниз æмæ æнæ-мастæй нæ зæрдæтæ рухс кæн!.

Цытджын юбиляры Президент Тыбылыты Леонид схорзæх-джын кодта Кады орденæй йæ оркестры та Кады грамотæйæ.

Гæздæнты Булат бузныджы ныхæстæ загъта нæ республи-кæйы разамонджытæн æмæ мадзалмæ æрбацæуджытæн.

— Бузныг уын, мæ зынаргъ адæм! Адæймагæн æрдз цы курдиат радты, уый ма хъуамæ хæлæг кæна йæ адæмæн, фæлæ йæ лæвар кæна йæ адæмæн. Æз дæр мæ адæмæн лæвар кæнын, мæ курдиаты руаджы мæ къухы цы арæхст-дзинад æфты, уый.

Мæн ма фидарæй зæгъын фæнды уый æмæ мах кæй стæм иу адæм, иу бинонты хуызæн стæм æмæ Ирыстоны дих кæнын кæй нæ хъæуы. Мæ мыггагджы æрвадæлтæ дæр цæ-рынц Хуссары — Чилæхсатæ æмæ Дзугатæ. Æз уæдæ Хуссар Ирыстонмæ цы зæрдæ дарын, уый мæ уды уæнт!

Юбиляры номыл бацæттæгонд концертон программæйы айзæлдысты, куыд хуссарирыстойнаг, афтæ цæгатирыстойнаг музыкантты æххæстгонд мелодитæ æмæ зарджытæ: нæ горæты администрацийы культурæйы управленийы дæлбаруæвæг адæмон инструментты оркестр «Айзæлд», Цæгат Ирыстоны националон адæмон инструментты паддзахадон оркестр, зарджытæ та æххæст кодтой Æлборты Инал, Хаситы Сослан, Дыгъуызты Маринæ, Къæбысты Сæрмæт, Хуссар Ирыстоны Паддзахадон драмон театры сыл-гоймæгты зарæггæнджыты къорд, Дауыраты Эдуард, Куымæридтаты Тенгиз, Дуаты Дзамболат, Чысиаты Лейла æмæ бирæ æндæртæ.

Нæ юбиляр Гæздæнты Булат у Уæрæсейы Федерацийы, Цæгат Ирыстон æмæ Хуссар Ирыстоны адæмон артист, Хетæгкаты Къостайы æмæ «Нарты фæткъуы»-йы премиты лауреат, цыппор азы бæрц та у Цæгат Ирыстон-Аланийы адæмон инструмент-ты национ оркестры иузæрдион аивадон къухдариуæггæнæг.

Газет «Хурзæрин»-ы коллектив дæр нæ цытджын юбилярæн кæны зæрдæбын арфæтæ. Би-рæ азты дæргъы дæ аивадуарзджытæн æнæниз æмæ æнæ-мастæй сæ зæрдæтæ рухс кæн!

Туаты Ларисæ

Comments are closed, but trackbacks and pingbacks are open.