Зындгонд ирон æхсæнадон архайæг, ахуыргонд, университеты бындурæвæрджытæй сæ иу Тыбылты Алыксандры гуырæн боны цытæн Хуссар Ирыстоны паддзахадон университеты уыд фыццаг Æхсæнадæмон зонадон-практикон конференци «Тыбылы фырты бакастытæ». Хайад дзы истой æввахс æмæ дард фæсарæйнаг 5 бæстæйæ æмæ 7 регионæй, 18 университет æмæ æртæ колледжæй, Ирыстон, Уæрæсе æмæ Индийæ ахуыргонд лингвисттæ, æдæппæт 96 ахуыргонды.
Конференци бакодта филологи, æхсæнадæмон журналистикæ æмæ фæсарæйнаг æвзæгты факультеты декан Бекъойты Иринæ. Уый банысан кодта, зæгъгæ, форум цæуы хæццæ форматы æмæ æрбаиу кодта алы бæстæты ахуыргæндты. Йæ хайадисджыты масштаб уæрæх кæй у, уый тыххæй фæахъаз уыдзæн актуалон проблемæтыл æруынаффæ кæнынæн.
Бекъойты Иринæ бузныг загъта Хуссар Ирыстоны Президент Гаглойты Аланæн æмæ Хуссар Ирыстоны Уæрæсейы Федерацийы минæварадæн, мадзалмæ цæттæгæнæн куыстыты сын кæй баххуыс кодтой, уый тыххæй.
Цалынмæ мадзал нæ райдыдта, уæдмæ Фæсарæйнаг хъуыддæгты министр Джиоты Æхсар бакаст Президент Гаглойты Аланы арфæйы фыстæг, цыран бæстæйы сæргълæууæг банысан кодта Хуссар Ирыстоны ахуырады рæзты Тыбылты Алыксандры ахсджиаг роль: «Тыбылты Алыксандр уыд национ интеллигенцийы ирддæр минæвæрттæй сæ иу. Уый уыд курдиатджын ахуыргонд, йæ адæмы сæрибардзинады сæрыл активон тохгæнæг. 1918 азы Тыбылты Алыксандры хъæппæрисæй Хуссар Ирыстоны баконд æрцыд фыццаг гимназ, фæстæдæр та – педтехникум. Алыксандр уыд журнал «Фидиуæг»-ы æмæ газет «Хурзæрин»-ы бындурæвæрджытæй сæ иу».
ХИПУ-йы ректор Тедеты Вадим банысан кодта фыццаг Æхсæнадæмон зонадон-практикон конференцийы стыр нысаниуæг, форумы географи, бузныджы ныхæстæ загъта мадзалы хайадисджытæн.
«Хуссар Ирыстоны паддзахадон университет у Кавказы уæлдæр ахуыргæнæндæттæй сæ рагондæр. Тыбылты Алыксандр уыд Хуссар Ирыстоны уæлдæр скъолайы бындурæвæрæг.
Фæнды мæ банысан кæнын абоны зонадон конференцийы географи. Ам сты нæ коллегæтæ Уæрæсейæ, Цæгат Ирыстонæй, Кæсæг-Балхъарæй, Санкт-Петербургæй, Донбассæй, Абхазæй, Приднестровьейæ, Индийæ», – загъта Тедейы фырт æмæ банысан кодта, зæгъгæ, ХИПУ стыр нысаниуæг дæтты æхсæнадæмон архайдæн. Сразыдзинæдтæ арæзт цæуы раздæры Уæрæсейы уæлдæр ахуыргæнæндæттимæ, Советон Цæдисы республикæтимæ æмæ дард фæсарæны бæстæтимæ.
«Абон не ‘хсæн ис Джавахарлал Неруйы номыл Индийы университеты минæвæрттæ. Мæн фæнды уыцы университетимæ бастдзинад саразын», – загъта Тедеты Вадим.
Конференцийы минæвæрттæн дистанционæй раарфæ кодтой Цæгат Кавказы Хæххон металлургион институты ректор Хъамболты Дзамболат, Джавахарлал Неруйы номыл Индийы университеты доцент, уырыссаг æвзаг æмæ литературæйы ахуыргæнджыты Индиаг ассоциацийы нымæрдар Мину Бхатнагар; Кæсæг-Балхъары паддзахадон университеты профессор Кучукова Зухра æмæ æндæртæ.
Арфæйы ныхæсты фæстæ пленарон сесси байгом кодта ХИПУ-йы Англисаг æвзаджы кафедрæйы профессор, филологон зонæдты кандидат Цхуырбаты Мира. Йæ доклады темæ уыд «Æвзаджы уавæр æмæ Республикæ Хуссар Ирыстоны ирон æвзаджы барадон статус».
Дистанционæй доклад сарæзта Педагогон зонæдты кандидат, Цæгат Кавказы Хæххон металлургион институты фæсарæйнаг æвзæгты кафедрæйы сæргълæууæг Баликъоти Марта.
Докладтæ ма сарæзтой филологон зонæдты доктор, профессор, Абайты Вассойы номыл Цæгат Ирыстоны гуманитарон æмæ социалон иртасæнты институты ирон æвзагзонынады хайады сæйраг зонадон кусæг Бесолты Еленæ; Филологон зонæдты доктор, профессор, лингвистикæ, тæлмац æмæ æхсæн – культурон коммуникациты фæсарæйнаг æвзæгты æмæ Михаил Ломоносовы номыл Мæскуыйы паддзахадон университеты регионалон зонынады кафедрæйы профессор Ливицкий Андрей; филологон зонæдты доктор, Мæскуыйы горæтон педагогон университеты, УФ-йы фæсарæйнаг æвзæгты институты профессор Абайты Евгения æмæ æндæртæ.
Докладты фæстæ конференци адарддæр хайадтыл. Зонадон конференци уыд æртæ хайыл дих.
ОСИАТЫ Индирæ
