Ацы къуыри нæ республикæ Ставрополæй лæварæн райста фæткъуыйы талатæ. Уыдон лæвæрд æрцыдысты Хъæууон хæдзарады министрадмæ. «Фæткъуыйы талатæ æдæппæт сты æхсæз мины, сты сæрдыгон фæткъуыйы мыггаг. Уыдон дих æрцыдысты цыппар райо-ныл иугъуызонæй. Районты цы хъæууон администрацитæ ис, уыдонæй уавæртæ кæмæн ис дыргъгуыст кæнынæн, уыдон ахастой, цас сæм æмбæлд, уый бæрц. Министрады базæйы ма цы талатæ баззад, уыдонæй та лæвæрд æрцыд æвзонг фермер Икъаты Ибрагимæн дæр.
Цхинвалы районы Дменисы хъæуы Хъæууон хæдзарады министрад цалдæр азы размæ бындур æрæвæрдта дыргъдонæн. Уый Ибрагим райста арендæйы. Ацы дыргъдон раздæр кæй къухы уыд, уыдон нæ зылдысты дыргътæм, уымæ гæсгæ сæ фылдæр бахус. Ныр сæм уый зилы бæстонæй. Кæцы талатæ бахус сты, уыдон бынаты Ибрагим ныссадздзæн ног талатæ», – зæгъы Хъæууон хæдзарады тала-хъомылкæнынад æмæ механизацийы хайады хистæр Мулдарты Игорь
Хъæууон хæдзарады министрады ма куыд зæгъынц, афтæмæй Ставрополы крайы губернатор Владимир Владимиров нæ республикæйы дыргъгуыстгæнджыты хæрзиуæгæн цы талатæ æрæрвыста, уыдон сты, Хуссар Ирыстоны климаты иттæг хорз чи адаптаци кæны, ахæм хуызтæ. Хæссынц тыллæг æрвылаз дæр, дыргътæ сбæззынц сæрды æмбистæм.
Нæ республикæйы фæстаг рæстæг стыр хъусдард здæхт цæуы дыргъгуыстмæ. Егъау проект «Южный сад», кæцы ис Къостайы хъæуы, ныр цалдæр азы хæссы хъæздыг тыллæг. Се ‘ркæнгæ продукцийы иу хай байуарынц нæ горæты сывæллæтты рæвдауæн-дæттæ, скъолатæ æмæ ма социалон нысаниуæджы объекттыл. Æрвыст дзы æрцæуы экспортмæ дæр. Ис ма нæм ноджыдæр егъау дыргъдон «Сады Ирыстона». Уый дæр арæзт æрцыд цалдæр азы размæ, фыццаг азты йæ дыргътæ уæй цыдысты бынæттон базары, горæты магазинты.
УАЗÆГТЫ Марфа
Comments are closed, but trackbacks and pingbacks are open.