Цхинвалы Тагъд æххуысы станц ногазон бæрæгбонты рæстæджы куыста фæтыхджындæргонд режимы. Уый тыххæй информацион агентад «Рес»-æн фехъусын кодта станцы директоры хæдивæг Хъуылымбегты Эмзар.
Йæ ныхæстæм гæсгæ, 1 январæй 8 январмæ Тагъд æххуысмæ бахатыдысты 360 адæймагæй фылдæр. «Астæуккаг нымадæй суткæйы дæргъы республикæйы æмбæстæгтæ станцы дохтыртæм фæсидтысты 50 хаттæй фылдæр. Ногазон бæрæгбонты фылдæр хатт Тагъд æххуысмæ дзырдтой гипертонион низы, пневмонийы, алкоголон интоксикацийы тыххæй. Уыдис дзы сыгъдхъæстæ газæй фæхъæстæ кæныны цаутæ дæр», – радзырдта Хъуылымбегты Эмзар.
Йæ ныхæстæм гæсгæ, къуырийы дæргъы республикон бирæпрофилон медицинон центрмæ бахаудтой 39 адæймаджы, сæйраджыдæр зæрдæдадзинты низтимæ, пневмони, алыгъуызон цæфтимæ æмæ афтæ дарддæр.
«Тагъд æххуысы станцы сывæллæтты дохтыртæ арæхдæр цыдысты гриппы тыххæй чысыл пациенттæм», – загъта уый. Афтæ ма банысан кодта, зæгъгæ, тагъд æххуысы станцы бригадæтæ радгæсад хастой Цхинвалы ногазон мадзæлттæ кæм уагътой, ахæм бынæтты дæр.
Хъуылымбегты Эмзар ма загъта, зæгъгæ, тагъд æххуысы станц ифтонг у æппæт æнæмæнгхъæуæг хосгæнæн препараттæй, фæлæ хъæуы транспорт сног кæнын. Станцы дохтыр Тедеты Альбинæ фыццаг хатт не ‘мбæлы ногазон бæрæгбæттыл йæ куысты уæлхъус. Йæ ныхæстæм гæсгæ, йæ бинонтæ сахуыр сты йæ радгæсады графикыл.
«31-æм декабрæй 1-æм январмæ нæм фæсидтысты бирæ хæттыты. Мах сæххæст кодтам нæ куыст. Æмбарæм æй, нæ хæс у адæмæн æххуыс кæнын. Бæрæгбонты дæр æмæ æрвылбон дæр медиктæ æххуыс кæнынц не ‘мбæстæгтæн», – банысан кодта Тедеты Альбинæ.
