Мæнæ ацы нывы сымах уынут, Ленингоры районы Ксаны дон куыд раивылд, уый. Йæ разæй рахаста цъыфзæй. Доны бын фесты Ахмадз æмæ Ларгвисмæ хъæуты фæндæгтæ. Разиан кодта хидтæн дæр. Хъæуы цæрджытæй бирæтæм бацæуæн нал ис.
Ленингоры районы хъæуты донивылд арæх бахъыгдары. Стæй æрмæст ацы районы нæ, фæлæ ма тæрккъæвдатæ æгас республикæйы дæр æвыдæй нæ ныууадзынц.
Фыдбылызтæй бахизыны нысанæн цавæр мадзæлттæ райсы районы къухдариуæгад, уый тыххæй Ленингоры цæрæнуатонкоммуналон хæдзарады сæргълæууæг Битарты Витали афтæ радзырдта: «Цæмæй нæ ахæм æрдзон фыдбылызтæ æдзæттæйæ ма æййафой, уый тыххæй районты къухдариуæгад донивылдты сезоны размæ рагуалдзæджы сæххæст кæны сæрмагонд мадзæлттæ. Ивгъуыд аз Ленингоры цæрæнуатон-коммуналон кусджытæ ныссыгъдæг кодтой Чысаны цæугæдоны ставд бырæттæй, ранæй-рæтты донывæд дæр фæивтам. Донивылдæй тæссаг кæм уыд, уыцы хъæутæм, фæндæгтæ фæфидар кодтам, фæсвæд фæндæгтæ дæр сæм сарæзтам. Хидтæм цыд уæлдай хъусдард, нæ бон куыд уыд, афтæ сæм базылдыстæм. Æрвылаз дæр ахæм цаутæ кæй вæййы, уый хынцгæйæ хъæуты цæрджыты бафæдзæхсæм, цæмæй сæхи бацæттæ кæной хæлцадон продуктты фæсауæрцтæй. Сæрмагонд техникæйæ бынтон рæвдз не стæм, уымæ гæсгæ дзæвгар рæстæг бахъæуы дон цы фæндæгтæ бахæры, уыдон афоныл сцалцæг кæныныл. Ныр дæр та æнхъæлмæ кæсæм тæрккъæвдатæ кæд фæлæудзысты æмæ дон кæд фæкъаддæр уыдзæнис. Фæндæгтæ уал асыгъдæг хъæудзæн сыджыт зæйтæй, уыцы куыстытæ ныридæгæн дæр кæнæм, фæлæ нырма æгас районыл не ‘ххæссæм. Боныгъæдтæ фæхуыздæр уыдзысты æмæ алкæцы хъæумæ дæр сырæздзысты фæндæгтæ.
Тæрккъæвдатæ ацы къуыри фæлæудзысты, афтæ амонынц синоптиктæ. Фæлæ хæхты мит кæй тайы, уымæ гæсгæ нырма тæссаг у донивылдтытæй.
УАЗÆГТЫ Марфа
