Скуыста паддзахадон унитарон куыстуат-хойрагыссæн комплекс. Ацы куыстуат нæ куыста 2018 азæй фæстæмæ, паддзахады бюджеты раз ыл стыр хæстæ кæй уыд, уый аххосæй. Уавæр рараст кæныныл рагæй архайдта Хъæууон хæдзарады министрад. Уымæн æмæ хъæууон лæгæн ахсджиаг у куырой. Нæ республикæйы цæрæг арендатортæ сæ нæмыгон культурæтæй райсгæ тыллæг, кæм среализаци кодтаиккой, уый сын нæ уыд хойрагыссæн завод кæй нæ куыста, уый аххосæй. Уыдис ахæм рæстæг, æмæ-иу нæхи æркæнгæ мæнæу куы ссадтам. Уыцы кæрдзыны хæрздæф-иу уыд спецификон, дардмæ-иу калд æмæ зыдта алчидæр бынæттон ссадæй конд кæй у. Фермертæ дæр сæ фосæн комбихоллаг ссадтой ацы куыстуаты. Уыцы-иу рæстæг-иу æрыссадтой цалдæр хуыз хойраг, кæрæдзимæ сæ хæц-цæ кодтой æмæ уыцы компоненттæй арæзтой фосæн комбихоллаг.
Хойрагыссæн завод скуыста Хицауады уынаффæмæ гæсгæ æмæ ныр æххуыс уыдзæн хъæууон хæдзарады райрæзтæн.
«Скусын кодтам хойрагыссæн комплекс. Ныр нæ бон уыдзæн комбихоллаг уадзын. Ныртæккæ уал куыстуаты хъомыс у иу сахат дыууæ тоннæ комбихоллаг уадзын. Ныр фæсарæйнаг бæстæтæй комбихоллаг нал ласдзысты нæ фермертæ, нæхимæ уагъд продукцийæ пайда кæныны уавæр сын уыдзæн.
Нартхор, хъæбæрхор, мæнæу æмæ сысджы æлхæндзысты бынæттон арендатортæй. Æрмæст сæм уыдзæн иу домæн, цæмæй нын уæй кæной хæрзгъæд хойраг. Уымæй уæлдай ма заводы сæвæрдтам чысыл куырой дæр. Уый та уадздзæнис 1,8 мин килограмм суткæйы, фыццаг æмæ уæлдæр сорты ссад», – зæгъы ацы куыстуаты директор Къудухты Давид.
Куыстуат цы комбихоллаг уадза, уый гъæд бæрæг кæндзысты лабораторийы. Цæстдард уыдзæн ссадмæ дæр, сæйраг уыдзæн йæ хæрзгъæддзинад. Æппæт бæрæггæнæнтæ та нысан цæудзысты компьютерыл.
УАЗÆГТЫ Марфа
