Дæс азы размæ, 1-æм февралы Хуссар Ирыстоны зæрдылдарæн бонты къæлиндармæ хаст æрцыд Зонады бон. Уый цытæн Уанеты Захары номыл зонад-иртасæн институты конференц-залы уыд X-æм зонадон-практикон конференци «Молодые ученые ЮОНИИ». Конференцийы куысты хайад райстой нæ республикæйы зонадон æмæ сфæлдыстадон интеллигенцийы минæвæрттæ, университеты ахуыргæнджытæ.
Бæрæгбоны цытæн зонад-иртасæн институты директор, историон зонæдты кандидат Гаглойты Роберт, фыццаджыдæр, арфæ ракодта йæ коллегæтæн æмæ банысан кодта зонады егъау нысаниуæг æхсæнады царды. Уый ма радзырдта, Хуссар Ирыстоны Зонадон-литературон æхсæнад дæр февралы фыццæгæм бон кæй сырæзт æмæ уæдæй фæстæмæ ацы бон нымад кæй цæуы куыд национ зонады райгуырды боныл. Æрымысыд ацы стыр хъуыддагмæ, ома, зонадæн бындур æрæвæрынмæ йæ хайбавæрд чи бахаста уæды интеллигенцийы минæвæртты нæмттæ. Уый ма йæ раныхасы банысан кодта, дæс азы дæргъы институт цы куыст бакодта æмæ цавæр зонадон мадзæлтты райсынц хайад, уыдæттæ. «Республикæйæн æдтейæ нæ ахуыргæндтæ хайад истой алыгъуызон конференциты æмæ сесситы, афтæ ма институты хайадты уагътам мадзæлттæ, цыран ахуыргæндтæ уынаффæ кодтой сæвзæргæ фарстатыл», – загъта институты директор. Уый ма конференцийы хайадисджыты зæрдыл æрлæууын кодта, куыст кæй цæуы æрыгон специалистты квалификаци фæбæрзонддæр кæныныл. Гаглойты Роберты ныхæстæм гæсгæ ныртæккæ дæр институты рагон истори æмæ археологийы хайады зонадон кусæг йæ квалификаци фæбæрзонддæр кæныны тыххæй стажировкæ цæуы Сомихстоны.
Гаглойты Роберт ма рæгъмæ рахаста институты материалон-техникон базæмæ фылдæр хъусдард аздахын, афтæ ма зонадон кусджыты куыстытæ æмбырдгондæй мыхуыры рауадзыны фарст. «Мах ацы фарсты фæдыл ныхас кодтам нæ республикæйы разамынадимæ æмæ нæ кæрæдзи бамбæрстам», – загъта уый.
Зонадон конференцийы Республикæ Хуссар Ирыстоны Президенты уынаффæгæнæг, историк Коцты Къоста бакаст Гаглойты Аланы арфæйы фыстæг.
«Æппæт рæстæджыты дæр зонад уыдис æмæ у национ хъæздыгдзинады сæйраг æмæ ахсджиаг рахæцæнтæй иу. Хуссар Ирыстоны зонадон архайджытæ сты не ‘хсæнады элитæ æмæ паддзахады цæсгом. Нæ республикæ дунейæн радта зындгонд ахуыргæндты плеядæ, кæцытæ иттæг стыр хайбавæрд бахастой бирæ фундаменталон зонæдты райрæзты хъуыддагмæ», – дзырдæуы арфæйы фыстæджы.
Бæстæйы сæргълæууæг ма йæ арфæйы банысан кодта, зæгъгæ, Уанеты Захары номыл зонад-иртасæн институты ахуыргæндтæ егъау куыст бакодтой мадæлон æвзаг æмæ литературæ бахъахъхъæнын æмæ йæ райрæзты хъуыддаджы. Мах, зæгъгæ, сæрыстыр стæм уыцы иртасджытæй дæр, кæцытæ стыр хайбавæрд бахастой Хуссар Ирыстоны зонадæн бындур æрæвæрыны хъуыддагмæ.
Дарддæр Коцты Къоста Президент Гаглойты Аланы номæй Кады грамотæтæ æмæ ар-фæйы фыстæджытæй схорзæхджын кодта зонад-иртасæн институты цалдæр кусæджы.
Хуссар Ирыстоны Зонады боныл дæс азы сæххæсты цытæн зонады зиууæттæн ма раарфæ кодта нæ республикæйы Ахуырад æмæ зонады министры хæдивæг Галуанты Александр. Хуссарирыстойнаг ахуыргæндтæн йæ цæст бауарзта стыр æнтыстытæ сæ зонадон-иртасæн куыстыты.
Конференцийы докладтæ бакастысты институты фондз æрыгон зонадон кусæджы æндæр æмæ æндæр хайадтæй. «Этапы развития отрицательных конструкций в разносистемных языках» – Дзассохты Л. (ирон æвзаджы хайады зонадон кусæг), «Дыууадæстæнон фæндыр в нартовском эпосе осетин. Об истории создания» – Пæррæстаты И. (этнологийы хайады зонадон кусæг), «Керамика эпохи поздней бронзы из могильников с территории Южной Осетии» – Цхуырбаты С. (Рагон истори æмæ археологийы хайады зонадон кусæг), «Практические вопросы использования маркетинга территории в качестве инструмента повышения инвестиционной привлекательности РЮО» – Гаглойты З. (Социалон-экономикон иртасынæдты хайады зонадон кусæг), «О Юго-Осетинском беженстве 1920-1921 годов: к постоновке проблемы» – Коцты З.(Ног æмæ ногдæр историйы хайады зонадон кусæг).
Докладгæнджытæн институты директоры хæдивæг, экономикон зонæдты кандидат Къæбысты Мария радта сертификаттæ, ома, юбилейон конференцийы кæй архайдтой, уый тыххæй бæлвырдгæнæнтæ. «Ацы сертификаттæ сымахæн уæ зæрдыл лæууын кæндзысты, докладтæ кæй сарæзтат, уый тыххæй. Бузныг уын зæгъын, цымыдисон темæтыл докладтæ кæй бацæттæ кодтат, уый тыххæй æмæ уын арфæ кæнын уæ зонадон куысты архайды», – загъта Къæбысты Мария. Уый ма радзырдта, зонад-иртасæн институты проект «Популярная наука» среализаци кæныны куыст нæ республикæйы скъолаты ахуыргæнинæгты ‘хсæн куыд ацыд æмæ цас æнтыстджын рауад, уый æмæ грамотæтæй схорзæхджын кодта, сывæллæтты ‘хсæн зонад чи парахат кодта, уыдон. Грамотæтæ райстой: зонад-иртасæн институты рагон истори æмæ археологийы хайады гæс, историон зонæдты доктор Дзаттиаты Руслан, зонад-иртасæн институты ногдæр истори æмæ политологийы хайады гæс, философон зонæдты кандидат Дзугаты Къоста, институты библиотекæйы гæс Джиоты Ларисæ æмæ 6-æм астæуккаг скъолайы директор Гæззаты Юринæ.
ЦХУЫРБАТЫ Ларисæ
