1 февралы Уанеты Захары номыл Хуссар Ирыстоны зонад-иртасæн институты уыдис зонадон конференци, Национ  Зонады боны сæдæазон юбилейы фæдыл. Мадзалы хайад райстой Республикæ Хуссар Ирыстоны Президент Гаглойты Алан, ахуырад æмæ зонады министр Джиоты Арянæ, Хуссар Ирыстоны паддзахадон университеты ректор Тедеты Вадим, республикæйы интеллигенцийы æмæ æхсæнады минæвæрттæ æмæ скъолаты ахуырдзаутæ.

Гаглойты Роберт профессионалон бæрæгбоны цытæн раарфæ кодта зонадон дунейы минæвæрттæн, зонад-иртасæн институты кусджытæ æмæ æрæмбырдуæвджытæн.

Уый куыд банысан кодта, афтæмæй  2022 азы сæдæ азы сæххæст  зонад-иртасæн институты сырæзтыл. Уыцы цауы фæлгæтты афæдзы дæргъы ауагъдæуыд аст зонадон конференцийы. Абоны конференци дæр  уыцы «марафоны»  кæронбæттæн у. Уый фæстæ радзырдта зонад-иртасæн институты сырæзты историйы, йæ бындурæвæрджыты æмæ дзы зонадон куыст чи кодта, уыдоны тыххæй. Банысан ма кодта, цал монографийы, зонадон куысты рауагътой мыхуыры, æппæт уыдæтты.

Мадзалы раныхас кодта Президент Гаглойты Алан. Уый дæр арфæйы ныхæстæ загъта республикæйы зонады кусджытæн.

«Абон у нæ ахуыргæндты профессионалон бæрæгбон – Национ Зонады бон æмæ уын уый цытæн арфæ кæнын.  Нæ Райгуырæн бæстæйы мадæлон æвзаг, нæ истори, нæ культурæ размæ кæй цæуы, уый бæрæг у. Тынг хорз æй хъуыды кæнæм, цы уæззау уавæрты куыстой нæ ахуыргæндтæ, цæмæй нæ адæмы сомбон, нæ Райгуырæн бæстæйы  истори размæ кодтаиккой, уый тыххæй. Абон дæр æй размæ кæнут. Нæ зонад-иртасæн институты бирæ курдиатджын ахуыргæндтæ куыстой æмæ кусынц. Уый тыххæй уын стыр бузныг. Нæ хицауады раз дæр, зонад-иртасæн институты раз дæр стыр хæс ис, цæмæй æвзонг фæлтæр дæр сæ хъус æрдарой зонадон куыстмæ. Цæмæй сæ уыцы хъуыддаг бацымыдис кæна, уый тыххæй  та сын æмбæлон уавæртæ хъуамæ саразæм», –

банысан кодта бæстæйы сæргълæууæг æмæ ныфс бавæрдта, республикæйы къухдариуæгад æмбæлон  æххуыс кæй кæндзæн зонад-иртасæн институтæн.

Зонадон кусджытæн раарфæ кодтой Тыбылты Алыксандры номыл Хуссар Ирыстоны Паддзахадон университеты ректор Тедеты Вадим æмæ Ахуырад  æмæ зонады министр Джиоты Арянæ.

Уый фæстæ Президент Гаглойты Алан Кады орденæй схорзæхджын кодта Уанеты Захары номыл зонад-иртасæн институты, зонадон-иртасæн куыстмæ æмæ зонады рæзтмæ йе стыр хайбавæрды тыххæй. Орден радта зонад-иртасæн институты директор Гаглойты Робертмæ.

Паддзахады сæргълæууæг ма паддзахадон хорзæхтæй схорзæхджын кодта  зонад-иртасæн институты къорд кусæджы.

Осиаты Индира

Ацы æрмæджытæ дæр бакæс:

Битарты Зоя: «Республикæйы къухдариуæгад  дæр æмæ чиновниктæ дæр трибунæтæй иронау куы дзуриккой, уæд уый стыр ахъаз уаид ирон æвзаджы  рæзтæн» Æрымысыдысты зындгонд ахуыргонды ном Зонадон конференци – Зонады бон Ссардтой зынгæ историк Цхуырбаты Иваны рухс ном Æрымысыдысты зындгонд ахуыргонды рухс ном. Бакастысты докладтæ

Comments are closed, but trackbacks and pingbacks are open.