Инциденттæ ма æруадзын æмæ сæм хъусдард здахыны фæдыл механизмты формат нымад у ахæм фæзуатыл, цыран дунеон организациты минæвæртты хайадистæй Хуссар Ирыстон æмæ Гуырдзыстоны минæвæрттæн фадат ис сæвзæргæ инциденттæ, паддзахадон арæнты уавæр æмæ æндæр æрцæугæ цаутыл комкоммæ æруынаффæ кæнынæн æмæ сæйраг та – æдасдзинады фарстыл. Бæрæг куыд у, уымæ гæсгæ дæргъвæтин рæстæджы нæ ивы механизмты куысты фæтк. Йæ сæйраг фарст абоны онг дæр у Знауыры районы Уисты хъæуы сæвзæргæ уавæр æмæ æдасдзинады фарстатæ, цыран цалдæр азы размæ гуырдзиаг полициæгты минæвæрттæ сæвæрдтой æнæзакъонон пост æмæ тæссагдзинад хæссы Хуссар Ирыстоны цæрджытæн.
Хуссар Ирыстонæй делегацийы сæргълæууæг, Фæсконконфликтон фарстатæ бæстонкæныны фæдыл РХИ-йы Президенты Æххæстбарджын минæвары хæдивæг Коцты Егор механизмты радон фембæлдæн хатдзæгтæ аразгæйæ банысан кодта, ацы форматы фæлгæтты сæйраг фарст регионы æдасдзинады фарст кæй у, уымæ гæсгæ хуссарирыстойнаг фарс алы фембæлды дæр рæгъмæ хæссы Уисты хъæуы сæвзæргæ уавæр. Ацы фарсты фæдыл Хуссар Ирыстоны позици у æнæаивгæ – Гуырдзыстон хъуамæ аиуварс кæна полицийæгты æнæзакъонон пост æмæ уыцы районы цы хотыхджын баиугæндтæ ис, уыдон уырдыгæй конд æрцæуой. Хуссар Ирыстон æндæргъуызон фадæттæ нæ уыны ацы фарст æрбæстон кæнынæн.
Коцты Егоры ныхæстæм гæсгæ йæ райдианы Хуссар Ирыстон бавдыста фæндæттæ сæвзæргæ уавæр биноныг кæныны тыххæй, фæлæ гуырдзиаг фарс æмбæлон хъусдард нæ аздæхта уавæрмæ. Гуырдзыстоны политикон къухдариуæгад уæд райста æндæр уынаффæ, нæ йæ бафæндыд фарст оперативонæй аскъуыддзаг кæнын.
«Ныртæккæ проблемæ æндæргъуызон у, агурæм фадæттæ йæ аскъуыддзаг кæныны тыххæй. Фæлæ уæддæр æмæ уæддæр Хуссар Ирыстоны позици ацы фарсты фæдыл у æнæаивгæ», – банысан кодта делегацийы сæргълæууæг.
Ацы районы сæвзæргæ уавæр æрбæстон кæныны фæдыл Гуырдзыстоны хъуыды æмæ позицийыл дзырд куы цæуа, уæд ныхасгæнæджы ныхæстæм гæсгæ уыдон конкретон æгъдауæй ницæуыл дзурынц. Æппынæдзух рæгъмæ хæссынц уый, ома ацы посты кæй ис хуымæтæг полициæгтæ хуымæтæг æхсæнгæрзтимæ. Фæлæ æмбарын хъæуы уый, æмæ уыцы полициæгтæ Хуссар Ирыстоны территорийыл кæй сты, æмæ уымæн та гæнæн кæй нæй. Уымæ гæсгæ уыцы æнæзакъонон пост уырдыгæй иуварс хъуамæ æрцæуа.
Эпидемиологон уавæр хуыздæр у
Коцты Егоры ныхæстæм гæсгæ фæстаг рæстæджы форматы хайадисджытæ сæйраг фарстытæй дарддæр уынаффæ кæнынц регионы эпидемиологон уавæрыл дæр. Ныр ацы фарст, æвæццæгæн, ист æрцæудзæн боны фæткæй, уымæн æмæ Хуссар Ирыстоны æмæ Гуырдзыстоны дæр уавæр бæрæг фæхуыздæр ацы фадыджы – коронавирусæй рынчынты нымæц бæрæг къаддæр кæнынц. Коронавирусы пандемийы рапарахаты аххосагмæ гæсгæ информацион фæрæзтæ нæ цыдысты арæнгæрон хъæу Эргнетмæ хæстæг, фембæлды бынатмæ.
Делегацийы сæргълæууæджы хъуыдымæ гæсгæ механизмты фæлгæтты радон фембæлд, кæцы нысангонд у 7 июнмæ – уый дæр уагъд æрцæудзæн ахæм форматы æмæ дарддæр гæнæн ис æмæ журналистты фæхоной фембæлд уагъд кæм цæуы, уыцы бынатмæ.
Коцты Егор куыд банысан кодта, уымæ гæсгæ механизмты фæлгæтты фембæлды кæрон гуырдзиаг журналистты руаджы хуссарирыстойнаг фарсæн фадат ис Хуссар Ирыстоны позици гуырдзиаг æмбæстæгтæм хæццæ кæнынæн. Кæд æмæ, зæгъгæ, гуырдзиаг полициæгты минæвæрттæ профилактикон куыст нæ кæнынц, уæд уыцы куыст мах исæм нæхимæ æмæ сæ информацион фæрæзты руаджы нæ хъуыды æмæ цæстæнгас рæгъмæ хæсдзыстæм.
Паддзахадон арæнтыл куыст цæуы иуварсонæй
Бæрæг куыд у, уымæ гæсгæ паддзахадон арæнтæ бирæ æмбæстæгтæ халынц чи нæ зоны арæнтæ кæуылты цæуынц, уымæ гæсгæ, чи та нысанмæздæхтæй. Фылдæр арæнхалджытæм ахасты Хуссар Ирыстон равдисы гуманон ахаст. Æнæрхъуыдыйæ чи фехалы арæнты фæтк, уыдон æнæ иварæй фæстæмæ ахизын кæнынц арæнæй дарддæр. Фæлæ нысанмæздæхт кæнæ цавæрдæрдæр æнæраст хъуыдытимæ хæлд куы æрцæуы арæнты фæтк, уæд уыдон ныхмæ конд æрцæуы уголовон хъуыддæгтæ æмæ дарддæр тæрхондонон мадзæлтты руаджы æййафынц æфхæрд.
Паддзахадон арæнты хахх аразыны тыххæй ныхасгæнæг куыд банысан кодта, уымæ гæсгæ куыст конд цæуы æдзухæй, фæлæ нырма иуфарсонæй. Æмæ цæмæй ацы фарстыл иумиаг куыст æрцæуа, уый фæдыл хъæуы нырма паддзахадон арæнты делимитаци æмæ уый фæстæ та демаркацийы тыххæй сразыдзинадыл къухтæ бафыссын. Æрмæстдæр уый фæстæ æрæвналын хъæуы æппæт куыстытæ бакæнынмæ.
«Иумиагæй сисгæйæ делимитаризаци æмæ демаркацийы процесс у дыууæварсон, фæлæ Гуырдзыстон ацы фарстыл æруынаффæ кæныныл æппындæр нæ разы кæны. Уымæ гæсгæ Хуссар Ирыстон арæнтæ аразы иуварсонæй. Ацы куыстытæ кæронмæ бакæнынæн ма фадат уыдзæн, Гуырдзыстон æдасдзинады гарантиты фæдыл документыл йæ къух куы бафысса, уæд», – банысан кодта уый.
Коцты Егоры ныхæстæм гæсгæ механизмты фæстаг фембæлдæй фæстæмæ арæнтыл уавæр уыд бæрæг сабыр, æнæ фæткхалæн цаутæй. Æгæрыстæмæй, Гуырдзыстоны æдасдзинады службæты руаджы дæр уымæй размæ хынцыд æрцыд арæнты фæткхалæн цаутæ. Ахæм цаутæ фæстаг рæстæджы нæ рабæрæг.
КЪÆБУЛТЫ М.
Comments are closed, but trackbacks and pingbacks are open.