Цхинвалы бирæпрофилон колледжы ахуыргæнинæгтæн ныртæккæ сты кондадон практикæйы. Колледжæн йæхи мидæг ис алыгъуызон дæсныйæдты фæдыл æрмадзтæ. Уыдон иууылдæр ифтонг сты нырыккон ифтонггæрзтæй, инвентарæй.
Кондадон ахуыры фæдыл колледжы директоры хæдивæг Хъуылымбегты Лонда загъта: «Ахуыргæнинæгтæ сентябры райдыдтой теори ахуыр кæнын, ныр æй хъуамæ бафидар кæной пракктикæйæ. Ацы æрмадзтæ арæзт æрцыдысты 2016 азы, уæдмæ та студенттæ практикæйы цыдысты горæты уагдæтты, куы та-иу сæ арвыстой Цæгат Ирыстонмæ дæр. Ныр нæхимæ ис æппæт уавæртæ».
Ахуыры рæстæджы цы зонындзинæдтæ райстой, уыдон практикон æгъдауæй æвдисынцй хæринагаразæг-кондитертæ, хуыйджытæ, электромонтажгæнджытæ, æндадзджытæ. Иууыл фылдæр ахуыргæнинæгтæ ис кондитертæ-хæринаггæнджыты хайады. Сæ ахуыргæнæг Келиты Валентинæ куыд загъта, афтæмæй цалдæр азы размæ дæр ма нæ горæтмæ хæринагаразджытæ хуыдтой Цæгат Ирæй, ныр уыцы проблемæ нал ис, колледжы фæрцы «Нæ хайады æрвылаз дæр вæййы иууыл фылдæр ахуыргæнинæгтæ. Сæ фидæны дæсныйад райсыны тыххæй афтæ фæдзурынц, нæ куыст, зæгъгæ, нæ баззайдзыстæм. Ис нæм лæппутæ дæр. Бирæ хатт уыдон чызджытæй хуыздæр сарæхсынц. Се ‘хсæн вæййы, кусгæ чи кæны, ахæмтæ дæр. Уыдон фæнды сæ зонындзинæдтæ фылдæр кæнын æмæ ма диплом райсын дæр. Махæн нæ программæйы ис национ хæринæгты рецепттæ. Алы ахуыргæнинаг дæр бон саразы иууыл къаддæр æртæ хæринаджы», – загъта Келиты Валентинæ.
Сæ зонындзинæдтæ практикон æгъдауæй æвдисынц хуыйджытæ дæр. Сæ ахуыргæнæг, зынгæ дизайнер Бекъойты Хох зæгъы: «Студенттæн радтон ахæм хæс, хъуамæ алчидæр йæхицæн бахуыйа юбкæ. Йæ сусæгдзинад уый мидæг ис, æмæ уæд лæмбынæгдæрæй бавналдзысты сæ куыстмæ. Афæдзы мидæг сæ алчидæр бахуыйы æртæ дзаума. Уыдонæй иу æнæмæнг хъуамæ баззайа æрмадзы. Ахуыры азы фæстæ ахуыргæнинæгтæ райсынц аккаг зонындзинæдтæ æмæ сæ дæсныйады фæдыл куыстытæ ссарынц. Бирæтæ дзы свæййынц профессионалтæ».
Æмбæлон зонындзинæдтæ æвдыстой кафеларазджытæ дæр. Уыдон ма ноджы уæлæмхас практикæ райсынц республикæйы арæзтадон объектты. Сæ ахуыргæнæг Хаситы Инал зæгъы: «Нæхимæ дæр ис уавæртæ, ифтонг стæм нырыккон ифтонггæрзтæй. Фæлæ сæ хуыздæрæн акæнын арæзтæдтæм. Амонæм сын тротуарон плиткæ куыд æвæрын хъæуы æмæ уый та уынджы æвæрын хъуамæ сахуыр уа. Мæ ахуыргæнинæгтæй абон профессионалон кафелгæнджытæ бирæ ис, раздæр уыдон зын ссарæн уыдысты, ныр ацы проблемæ нал ис. Æхсызгон мын у районтæй дæр нæм кæй æрбацæуы ахуыргæнинæгтæ. Уадз, æмæ алы районы дæр уа аразджытæ, механизатортæ, хуыйджытæ æмæ дæсны хæринагаразджытæ. Нæ колледжы ахуыргæнинæгтæ хайад райсынц конкурсты Цæгат Ирыстоны æмæ бацахсæм призон бынæттæ».
Колледжы ма нын куыд загътой, афтæмæй нæм иууыл къаддæр цæуынц аграрон æмæ механикон хайадтæм. Афтæмæй та, зæгъгæ, иууыл тынгдæр ныртæккæ нæ республикæйы уыцы дæсныйæдтæ хъæуынц. Алы аз дæр колледжы къуыхдариуæгад бацархайы, цæмæй сæм æрбацæуой æрыгон фæлтæр дæсныйæдтæ райсынмæ. Уагъд æрцæуы «Гом дуæртты бон». Уырдæм фæхонынц горæты скъолаты ахуыргæнинæгты, афтæ ма республикæйы районты хистæр кълæсты ахуыргæнинæгты. Уыдон базонгæ кæнынц, цы дæсныйæдтæ сæм райсæн ис, уыдонимæ. Саразынц сын экскурсси куыд æрмадзтæм, афтæ ахуырадон корпусмæ дæр.
Ныртæккæ колледжы ис, фараст дæсныйад райсæн кæм ис, ахæм хайадтæ. Фæлæ алы ног ахуыры аз дæр баконд æрцæуынц, республикæйы абон æмæ сомбон чи бахъæу-дзысты, уыцы дæсныйæдтæ.
УАЗÆГТЫ Марфа
