Рынчын зæрдæтæм ары фæндаг

Дохтыры ном бӕрзонд чи хӕссы, уыцы адӕймӕгтӕн алы бон дæр бузныджы ӕмӕ арфӕйы ныхӕстӕ куы дзурӕм, уӕддӕр фаг нӕ уыдзӕн уыдонӕн сӕ куыстӕн аргъ скӕнынӕн.

Фӕлӕ сӕйраг у, тыхст рынчын йӕ дохтыры хъусдард ӕмӕ аудындзинад куы фенкъары, куы  фæзоны, йе ‘нӕниздзинад ӕмӕ йӕ цард аккаг дохтыры къухты кӕй сты, уый. Ӕмӕ ма уӕд дохтырӕн дӕр уымӕй ӕхсызгондӕр цы хъуамӕ уа? Æвӕццӕгӕн, ницы.

Рынчынтӕ кӕй ныфсӕй цӕрынц, сӕ ирвӕзынгӕнӕг кӕй хонынц, уыцы дохтыр Мӕлдзыгаты Азӕ Юрийы чызг ӕрвылбон дæр ис рынчынты фарсмӕ, аразы сын ӕппӕт дӕр, цӕмӕй ӕнӕниз уой.

Алы бон дӕр сӕумӕрайсомӕй дохтыр-кардиолог Азӕйы кусӕн хатӕны раз  рады фӕлӕууынц бирӕ адӕм. Уыдон се ‘ппӕт дӕр хæларзæрдæ дохтыры бæрны бакӕнынц организмы иууыл ахсджиагдӕр орган – зӕрдӕйы. Рады лӕугӕйӕ, уыцы адӕм кӕд се ’ппӕт кӕрӕдзийӕн зонгӕ нӕ вӕййынц, уӕддӕр фӕдзурынц, Азӕ куыд хорз адӕй-маг ӕмӕ дохтыр у, уый тыххæй.

Ӕмӕ, ӕцӕгдӕр, дохтырӕн сӕйраг у йӕ фӕлмӕн ныхас ӕмӕ ахаст рынчынмӕ. Ахӕм у Мӕлдзыгаты Азӕ дӕр. Уый ныр бирӕ азты кусы  Цхинвалы горæтон поликлиникӕйы зӕрдӕйы дохтырӕй. Райгонд дзы сты рынчынтӕ. Бирӕтӕ дзы афтӕ дӕр фӕзӕгъынц, зӕгъгӕ, Азӕ мын куынӕ уаид, уӕд, зæгъ, афонмӕ удӕгас дӕр нал уаин.

Рынчынтӕм лӕмбынӕг байхъусгӕйӕ, уый саразы ӕппӕт дӕр, цӕмӕй рынчын сдзӕбӕх уа ӕмӕ та дзы царды ныфс бацӕуа. Азӕ кӕд боны дӕргъы бирӕ рынчынтӕ райсы, уӕддӕр ыл йӕ фӕллад никуы разыны, алы рынчынмӕ дӕр равдисы ӕмбӕлон хъусдард. Йæ пациенты рынчын зӕрдӕ дзӕбӕх кӕны канд хостӕй нӕ, фӕлӕ дзыхы ныхасӕй дæр. Уымӕн ӕй уарзынц уыдон  дӕр.

Мӕлдзыгаты чызг нырма ӕвзонг у, фӕлӕ алы рынчыны зӕрдӕмӕ дæр арæхсы ссарын фæндаг. Фӕлмӕн мидбылхудгӕйӕ, алы рынчыны дӕр ӕхсызгонӕй райсы ӕмӕ  йӕ бон цы вӕййы, уый йын саразы.

 Йӕ зӕрдӕйӕ чи фӕхъӕрзы, уыдон алыгъуызон уӕззау уавӕрты бахауынц дохтыры къухтӕм, вӕййы дзы ахӕм рынчынтӕ, кӕцытӕ фӕтох кӕнынц цардӕй мӕлӕты ‘хсӕн, фӕлӕ Азӕ алкӕмӕн дӕр бавӕры ныфс, алкӕй дӕр барӕвдауы йӕ дзыхы дзырдӕй, уыимӕ иумӕ, куыд дохтыр, афтӕ бӕстонӕй бамбарын кӕны, цас уӕззау у рынчыны уавӕр ӕмӕ ӕвӕстиатӕй цы хъӕуы саразын, уый тыххæй. Уый та ууыл дзурӕг у, ӕмӕ Азӕ цы дӕсныйад равзӕрста, уым кӕй у цӕсгомджын ӕмӕ йӕ рынчынтыл иузӕрдион.

Куыстӕн ӕдтейӕ йын цы сӕрибар рӕстӕг вӕййы, уый дӕр Азӕ бахардз кӕны йӕ рынчынтыл. Рынчынтӕ сӕ низӕй куы стыхсынц, уӕд ӕм бадзурынц телефоны ӕмӕ йын радзурынц сӕ тыхст уавӕры тыххӕй, уый дӕр та сын ӕвæстиатæй бакæны ӕмбӕлон амындтытӕ ӕмӕ та рынчынтӕн дӕр бирӕ фенцондӕр вӕййы.

Азӕйӕн нӕ зӕрдӕ зӕгъы, ноджыдӕр бирӕ азты цы лӕггад кӕна адӕмӕн, рынчынтӕ та йын йӕ фыдӕбон цы ӕмбарой ӕмӕ дзы кӕддӕриддӕр райгонд цы уой, уыцы фæндиæгтæ. Стыр хӕрзиуӕгон куыст кӕны ӕмӕ йӕхӕдӕг дӕр царды ӕппӕт хӕрзиуджытӕй хайджын уӕт. 

  КЪÆБЫСТЫ Зæринӕ