Кæд раздæры азтæм абаргæйæ, нæ республикæйы фæкъаддæр сты æндæрбæстаг æмбæстæгтæ, кæцытæн сæ фылдæр æрцæуынц куыстагур Астæуккаг Азийы бæстæтæй, уæддæр ма дзы чи баззадис, уыдоны æдзух хъæуы контроль кæнын. Уымæ гæсгæ, милицийы Миграцийы фæдыл фарстаты управленийы кусджытæ æрвылкъуыри фæуадзынц рейдтæ.
Мигранттæм бацæуынц изæры 8 сахатæй фæстæмæ, цæмæй сæ куысты фæстæ сæ цæрæнуæтты баййафой. Басгарынц сын сæ документтæ æмæ сын кусыны тыххæй цы бары гæххæттытæ раттынц, ома патенттæ, уыдон. Уымæй уæлдай ма инспектортæ сæ хъус дарынц, цæмæй сæ рынчын мачи разына æмæ сын бамбарын кæнынц, зæгъгæ уæ кæд искæмæн йе ‘нæниздзинад цуды, уæд уын баххуыс кæндзыстæм æмæ-иу уæ рынчыны хабар ма бамбæхсут. Рейдтæ фæуадзынц куыд горæт Цхинвалы, афтæ районты дæр, уымæн æмæ мигранттæ фæкусынц районты дæр. Хистæр инспектор Цхуырбаты Тимуры ныхæстæм гæсгæ, ахæм басгæрстытæ уадзынц, цæмæй æндæрбæстаг граждантæ хатой хъусдард æмæ дзы кæд искæмæ исты хъуыдытæ фæзына фæтк кæнæ закъон фехалыны фæдыл, уæд ма бауæнда.
«Æндæрбæстаг æмбæстæгтæн сæ фылдæр кусынц арæзтадон сферæйы куыд егъау компаниты, афтæ не ‘мбæстæгты хисæрмагонд арæзтæдты. Мах семæ профилактикон хуызы фæныхас кæнæм, фæамонæм сын сæ документтæ раст куыд аразгæ сты, стæй не ‘хсæнады сæхи куыд хъуамæ дарой, цахæм уагахасты тыххæй æрцæудзысты æфхæрд. Бафæдзæхсæм сæ, цæмæй сын исты проблемæтæ куы уа, уæд фехъусын кæной махмæ. Рейдты рæстæджы кæд исты фæткхалæн цаутæ сбæлвырд кæнæм, уæд сæ бафхæрæм. Кæд-дæрты вæййы афтæ дæр æмæ сæ бынтондæр арвитæм нæ республикæйæ», – зæгъы Цхуырбаты Тимур.
Æндæрбæстаг гражданин нæ республикæмæ куы æрцæуы, уæд ын арæнхъахъхъæнæн службæйы посты раттынц миграцион картæ, кæцы æртæ боны æмгъуыдмæ хъуамæ бахæсса паспортон-визæйон службæмæ æмæ дзы йæхи срегистраци кæна. Уый фæстæ йæ кæд кусын фæнды, уæд бацæуы милицийы Миграцийы фæдыл фарстаты управленимæ æмæ йын уым раттынц кусыны фæдыл бары гæххæттытæ. Ныридæгæн нæм куыстагур мигранттæ иууыл фылдæр ис Таджикистанæй, стæй та Узбекистан, Азербайджан æмæ Сомихстонæй.
ДЖИОТЫ Алыксандр
Comments are closed, but trackbacks and pingbacks are open.