Миграцийы фæдыл фарстаты милицийы кусджытæ ауагътой планон рейдон мадзæлттæ æмæ бабæрæг кодтой, нæ республикæмæ куыстагур цы æндæрбæстæгтæ æрцыдысты, уыдоны. Басгæрсты рæстæджы кастысты мигрантты цæрыны уавæртæм, сæ бары гæххæттытæм æмæ ма се ‘ддаг бакастмæ дæр, цæмæй дзы кæд исчи рынчын у, уæд æй сбæлвырд кæной.
Æдæппæт Хуссар Ирыстоны абоны бон ис 260 мигранты бæрц, кæцыты фылдæр хай кусы арæзтадон сферæйы. Фæсарæйнаг æмбæстæгты фылдæр хай сты Таджикистан æмæ Узбекистанæй, ис дзы Азербайджан æмæ Сомихстонæй дæр. Хистæр инспектор Кокойты Павел куыд банысан кодта, афтæмæй мигранттæй 25 адæймаджы бæрц æрцыдысты сæ бинонтимæ.
«Æндæрбæстаг гражданты æрвылкъуырийы бæрæг кæнæм куыд сæ куыстуæтты, афтæ ма, кæм цæрынц, уым дæр. Семæ бакæнæм профилактикон куыст, – сæхи куыд хъуамæ дарой, сæ бары гæххæттытæ куыд хъуамæ йедзаг кæной, эпидеми æмæ карантины рæстæджы куыд хъуамæ архайой. Кæд дзы фæткхалæн цау сбæлвырд кæнæм, уæд æй бафхæрæм, – вæййы афтæ дæр æмæ йын депортаци дæр саразæм. Уымæ гæсгæ сæ алы хатт дæр бафæдзæхсæм, цæмæй истæуыл куы фæтыхсой, уæд махмæ фæбæрæг кæной æмæ проблемон фарст йæ райдианы скъуыддзаг æрцæуа. Рейдон мадзæлттæ уадзæм куыд горæт Цхинвалы, афтæ районты дæр», – загъта Кокойты лæппу.
Ацы рейдон мадзæлтты иу фæткхалæн цау дæр не сбæлвырд кодтой барадхъахъхъæнæг органтæ.
ДЖИОТЫ Александр
Comments are closed, but trackbacks and pingbacks are open.