Бабæрæг кодтой мигрантты

Миграцийы фарстаты фæдыл милицийы управленийы кусджытæ бабæрæг кодтой нæ республикæйы уæвæг æндæрбæстаг гоймæгты. Басгæрсты рæстæджы сын æркуырдтой сæ гæххæттытæ, федтой сын сæ цæрæнуæттæ. Уæлдай хъусдард здахынц санитарон уавæрмæ, уымæн æмæ алыгъуызон низтæй хи бахизыны тыххæй мадзæлттæ исын фæхъæуы. Бакодтой ма семæ профилактикон куыст дæр æмæ сын бамбарын кодтой, цæмæй ма халой æхсæнадон фæтк, ма пайда кæной наркотиктæй æмæ карз нозтытæй. Хистæр инспектор Цхуырбаты Тимур куыд хъусын кæны, афтæмæй рейдон мадзæлтты рæстæджы бæлвырд куы æрцæуы фæткхалæн цау, уæд æвæстиатæй фæткхалæджы бæрндзинадмæ æркæнынц.

«Ӕрæджы Таджикистаны æмбæстаг спайда кодта наркотикон буарад марихуанайæ æмæ йын тæрхондон рахаста депортацийы тæрхон. Нæ республикæмæ куы æрцæуынц æндæрбæстæгтæ, уæд сæ мах бафæдзæхсæм, цæмæй сæхи дарой куыд æмбæлы, афтæ, ма хизой бынæттон закъæтты сæрты æмæ сæ бары гæххæттытæ та æдзух уой бæстон конд. Кæд сæм исты фарстатæ фæзыны, уæд æнæмæнг махмæ æрбахатынц æмæ сын сæ проблемон фарст аскъуыддзаг кæнæм. Ныры басгæрстыты рæстæджы нырма не сбæлвырд кодтам фæткхалæн цаутæ», — зæгъы Цхуырбаты Тимур.

Нæ республикæйы территорийыл ныртæккæ ис 456 æндæрбæстаг адæймаджы, кæцыты фылдæр хай æрцыдысты куыстагур. Иууыл фылдæр сты Таджикистанæй — 287 адæймаджы, стæй та Узбекистанæй — 104 адæймаджы. 37 адæймаг нæм ис Сомихстонæй æмæ 28 адæймаджы та — Азербайджанæй. Ис се ’хсæн ахæмтæ дæр, кæцытæ æрцыдысты бинонтимæ, уыдонæн сæ сывæллæтты нымæц у 34. Иумийагæй сисгæйæ, фæсарæйнаг æмбæстæгты уагахаст у æмбæлон, сæхи хизынц фæткхалæн цаутæй æмæ закъоны фæлгæтты рæстæгыл регистраци фæцæуынц æмбæлон службæтæм. Кæд дзы исчи фæрынчын вæййы, уæд фехъусын кæнынц милицийы кусджытæн æмæ сæм æвæстиатæй фæкæсынц, цæмæй æмбæлон медицинон æххуыс райсой.

Коронавирусон низ апарахаты рæстæджы бæрæг фæкъаддæр ис æндæрбæстæгты нымæц нæ республикæйы, фæлæ та фæстаг рæстæджыты сæ нымæц сындæггай фылдæр кæны.

Миграцийы фарстаты фæдыл инспекци контроль кæны нæ республикæмæ æрбацæуджыты æмæ ацæуджыты, кæцытæ хауынц мигранттæм. Куы сын басгарынц сæ гæххæттытæ, уæд сын лæвæрд æрцæуынц миграцион картæтæ æмæ æртæ боны æмгъуыдмæ регистраци саразынц паспортон-визæйон службæйы. Куыстагур дзы чи æрцæуы, уыдон та уый фæстæ бахатынц, цæмæй сын кусыны тыххæй бары гæххæттытæ дæр радтой.

ДЖИОТЫ Алыксандр