Ацы сæрд лагертæ æмæ курортон уагдæтты сæ фæллад суадздзысты æмæ се ʻнæниздзинад фæфидардæр кæндзысты 42 мин сывæллонæй фылдæр. Уый у фаронæй 30 проценты фылдæр. Уыдонимæ сты Украинæ æмæ Донбассы æнæбары сæ цæрæн бынæттæ чи ныууагътой, уыцы сывæллæттæ дæр.
Ахæм нымæцтæ фехъусын кодта республикæйы фæллой æмæ социалон рæзты министр Айдарты Алинæ.
Министрады разамонæджы ныхасмæ гæсгæ, скъоладзауты сæрдыгон фæлладуагъды кампанимæ цæттæ кæнгæйæ, сæрмагонд æргом здæхт цæуы сывæллæтты æдасдзинады фарстамæ.
«Сæрдыгон лагертæ байгом кæныны агъоммæ бæстон æххæст æрцæудзысты зынгсирвæзтытæ æмæ æндæр æнæнхъæлæджы цаутæй æдасдзинады æппæт домæнтæ дæр. Уымæй уæлдай, лагертæ æмæ иннæ куыстуæтты разамынд æмæ специалисттæн арæзт æрцæудзысты сæрмагонд ахуыртæ зынгирвæзтытæ æмæ æндæр æнæнхъæлæджы цауты рæстæджы архайды фæдыл, стæй террористон фæзындтытæй тасдзинады æууæлтæ иртасыныл. Кæй зæгъын æй хъæуы, барадхъахъхъæнæг органты минæвæртты ʻрдыгæй иудадзыгон цæстдард уыдзæн лагертæ æмæ æндæр фæлладуадзæн-хосгæнæн уагдæтты архайдмæ», — загъта министр.
Уый куыд банысан кодта, афтæмæй республикæйы байгом уыдзæн тематикон лагерь «Медиа Камп». Уым рæзгæ фæлтæр хъуамæ ахуыр кæной журналисты дæсныйадыл, алыхуызон хъæугæ мадзæлттыл.
Уыдæттæ сын зæрдиагæй амондзысты республикон мыхуыры фæрæзты кусджытæ, хæдбар æххуысгæнджытæ, блогертæ…
Тематикон лагеры уыдзысты, 7 азæй 14 азы онг кæуыл цæуы, ахæм 25 сывæллоны. Программæйы ис тематикон тренингтæ, семинартæ, хъазæн мадзæлттæ, конкурстæ. Уыдоны фæрцы хъуамæ фидæны журналисттæ базоной сæ дæсныйады сусæгдзинæдтæ, литературæ, истори, культурæ æмæ бирæ æндæр фæзилæнтæ.
«Фарон Цæгат Ирыстон баиу, нæ бæстæйы Президент Владимир Путин сывæллæттæ æмæ фæсивæды Æппæтуæрæсейон æхсæнадон-паддзахадон змæлд саразын кæмæн бахæс кодта, уыцы организацимæ. Дарддæр куыстытæ цæуынц ахуырадон-методикон центр „Авангард“-ы арæзтады дæр. Центры нысан уыдзæн, рæзгæ фæлтæримæ патриотон-хъомыладон куыст кæнын. Ахсджиаг ма у, сывæллæтты уæлæмхасæн ахуырадон программæтæм здахын дæр. Ныридæгæн скъоладзауты 75 проценты архайынц алыхуызон къордтæ æмæ секциты. Æнæмæнг сын хъæуы уавæртæ аразын сæ интеллектуалон, сфæлдыстадон æмæ физикон рæзтæн», — загъта республикæйы Сæргълæууæг Сергей Меняйло.
Нæ уацх.
