ИРЫСТОН  ÆРЛÆУУЫД  ДОНБАССЫ  ФАРСМÆ

Цымæ ма мах фæлтæр искуы ахъуыды кодтаид æмæ ма нæ дуджы хæст уыдзæн. Мах хæст зыдтам кинотæ æмæ чингуытæй. Æмæ та йæ ‘рыййæфтам. Уынæм æнæсæрфат, тугкалæн хæст.

Уæрæсе Украинæйы цы сæрмагонд хæстон операци аразы, уым та Ирыстон дæр  æрвылхаттау фæсфæд нæ баззад алы хъуыддаджы дæр. Лигъдæттæн æмбæлон организацитæ рагацау бацæттæ кодтой цæрæн бынæттæ республикæйы санаториты, раиртæстой сын сæ æдасдзинад, техникон уавæр, зынгсирвæзты, уазалы ныхмæ куыд ифтонг сты, уыдæттæ. Ахуырад æмæ Æнæниздзинад хъахъхъæнынады министрадтæ бацархайдтой, цæмæй скъо-ладзау сывæллæттæ ахуырæй фæсте ма баззайой, медицинон лæггæдтæй ма фæцух уой. Скъоладзауты ‘хсæн ис спортсментæ æмæ ныридæгæн тренировкæтæ кæнынц Дзæуджыхъæуы Спорты скъолатæй цалдæры. Кæй фæнды, уыдонæн агурынц куыстытæ. Цæмæй æппæт уыцы лыггæнинаг фарстатæ рæстæгыл аскъуыддзаг уой, уый тыххæй лигъдæтты документтæ цыбыр рæстæгмæ бацæттæ кодта Мидхъуыддæгты министрад.

Бизнесы зындгонд центр «Мой бизнес»-ы бындурыл социалон организаци «Мы Вмес-те» байгом кодта гуманитарон æххуысы пункт. Уырдæм алкæмæн дæр йæ бон у йе ‘ххуысы хай бахæссын. Зæгъæм, дзаумæттæ, сыгъдæгдзинады фæрæзтæ, хъазæнтæ, ахуыргæнæн дзаумæттæ… Ныридæгæн цалдæр уæзласæн машинæ гуманитарон æххуысимæ ацыд Донбассмæ.

Уæдæ хæстон операциты дæр нæ республикæ фæсте нæ баззад. Нæ бæстæйы сæраппонд хæстон операциты рæстæг, сæ цард радтой æмæ хъæбатырæй фæмард сты цалдæр лæппуйы. Фæстаг цыппар боны Ирыстоны дзыллæтæ цæссыгкалгæ фæстаг фæндараст загътой Мысыккаты Черменæн, Дзукъаты Хъазыбегæн, Михаил Скоковæн, Хъæцмæзты Артурæн, Олег Ковальчукæн, Железов Александрæн, Сабанты Æхсарбегæн, Мухтаров Асланæн, Козаты Романæн, Игорь Леоновæн, Дмитрий Феденкойæн, Коцты Эльбрусæн æмæ Кирилл Андреевæн. Уыдонæй сæ мæлæты фæстæ Лæгдзинады орденæй хорзæхджын æрцыдысты Александр Железов, Мысыккаты Чермен, Михаил Скоков, Хъæцмæзты Артур, Олег Ковальчук æмæ Игорь Леонов. Рухсаг ут, хъæбатыртæ! Хуыцау зæгъæд, æмæ иннæтæ дзæбæхæй сæ хæдзæрттыл сæмбæлæд.

 

САБИТЫ  ФÆЛЛАДУАГЪДМÆ – ФЫЛДÆР  ÆРГОМ

Иннæ азтау ныр дæр сывæллæтты сæрдыгон фæлладуагъды фарстатæм республикæйы разамынд се ‘ргом раздæхтой азы райдайæнæй. Ацы аз сывæллæтты сæрдыгон фæлладуагъд æмæ æнæниздзинад ахъазгæнæг мадзæлтты архайынц 144 профилон организацийы. Уыдоны хъуамæ сæ фæллад суадзой æмæ се ‘нæниздзинад фæхуыздæр кæной 18 мин сывæллоны.

РЦИ-Аланийы Хицауады Сæрдары хæдивæг Тугъанаты Ларисæ куыд зæгъы, афтæмæй æнахъомты сæрдыгон фæлладуагъдæн арæзт цæуы алы мадзæлттæ: тематикон сменæтæ, культурон акцитæ, хъомыладон æмæ бæстæзонæн экскурситæ æмæ фембæлдтытæ… Уыдон, кæй зæгъын æй хъæуы, ахъаз сты сывæллæтты æппæт-вæрсыг хъомылад æмæ райрæзтæн.

Тугъанаты Ларисæ ма куыд бафиппайдта, афтæмæй Донбассæй цы адæм ралыгъд, уыдоны сабитæн дæр æппæт социалон уавæртæ арæзт цæуы, фæлæ уый ницы бакъуылымпы кæндзæн Ирыстоны сывæллæтты фæлладуагъды, фæлæ уæвæн ис æмæ пъланмæ чысыл ивддзинæдтæ хаст æрцæуа.  Бæлвырддæр та, гæнæн ис æмæ Донецк æмæ Луганскæй чи рацыд, уыцы сабитæй йе ‘нæниздзинад лæмæгъ кæмæн у, уыдонæй бирæтæн санаториты æмæ лагерты бынæттæ ссарын бахъæудзæн иннæ сывæллæттимæ.

Ахсджиаг ма у, эпидемиологон уавæрты архайгæйæ, санитарон домæнтæ æххæст кæнын. Сывæллæтты фæлладуадзæн бынæтты карз цæстдард ис «Роспотребнадзор»-ы домæнтæ æххæст кæныны хъуыддагмæ. Арæзт цæуы æндæр уæлæмхасæн мадзæлттæ дæр.

Æмбæлгæ ведомствотæ куыд нымайынц, афтæмæй хъæуы санаториты æмæ лагерты инфраструктурæ фæхуыздæр кæнынæн ахъазгæнæг республикон программæ саразын. Абон профцæдисты исбонады бæстыхæйттæн сæ материалон-техникон уавæр æдасдзинады домæнтæн дзуапп нал дæтты. Уымæ гæсгæ сæ материалон-техникон базæ хъæуы сног кæнын æмæ Роспотребнадзоры домæнтæ карзæй æххæст кæнын.

Нæ уацх.