Президент Гаглойты Алан йæхимæ райста Генералон прокурор Собаты Григорийы. Уый йын фехъусын кодта Абхазмæ РХИ-йы Генералон прокуратурæйы делегацийы балцы фæстиуджыты тыххæй.
14-16 апрелы Хуссар Ирыстоны Генпрокуратурæйы минæвæрттæ хайад райстой Абхазы прокуратурæйы органты сырæзтыл 30 азы сæххæсты цытæн мадзæлтты.
Генералон прокурор радзырдта абхазаг фарсы хæларадон æмæ хъарм химæрайсты тыххæй.
«Хуссарирыстойнаг официалон химæрайсты рæстæджы, æмархайд сфидар кæнын æмæ æнгом æмгуыстады тыххæй Абхазы Генералон прокурор фæндон бахаста æрвылаз дæр Æмгуыстады программæ фидар кæнын, фæлтæрддзинад æмæ информаци кæрæдзийæн дæттыны фæдыл иумæйаг мадзæлттæ план кæнын. Мах хорзыл банымадтам уыцы фæндон æмæ бадзырдтам ацы фарстыл лæмбынæг æрныхас кæнын», – загъта Собаты Григори.
Уымæй уæлдай ма уый Президентæн фехъусын кодта иуæй-иу резонансон уголовон хъуыддæгты фæдыл фæдагуырды тыххæй.
Йæ ныхæстæм гæсгæ, фæуыны стадийы ис Мамиты Ричарды æмæ Цæголты Сергейы амарыны фактты фæдыл уголовон хъуыддæгты фæдагуырд.
Президентæн ма фехъусын кодта, Генпрокуратурæйы слестгæнæн управленийы цы æндæр уголовон хъуыддæгтæ ис, афтæ ма цæстдарæн ведомство цы басгæрстытæ уадзы, уыдон тыххæй дæр.
