Хуссар Ирыстоны паддзахадон университеты йæ куыст райдыдта VIII Æхсæнадæмон зонадон-практикон конференци «Россия и мир: диалоги – 2024. Силы притяжения».
Мадзалы сæйраг темæ уыд: «Роль частично признанных государств в современном мире. Механизмы развития союзных отношений». Хайад дзы райстой УФ-йы социалон программæты фарсхæцынады национ фонды правленийы сæрдар Андрей Сергеев, зонадон куысты фæдыл Коммуникациты рæзты национ иртасæн институты директоры хæдивæг Валентина Комлева, РХИ-йы УФ-йы уынаффæгæнæг-минæвар Александр Журов, Хуссар Ирыстоны Россотрудничествойы минæварады сæргълæууæг Сергей Комиссаров, ХИПУ-йы ректор Тедеты Вадим, республикæйы зонадон æхсæнады минæвæрттæ. Уымæй уæлдай ма, конференцийы куысты онлайн-форматы хайад райстой Уæрæсе, Абхаз, Приднестровье, Узбекистан æмæ Казахстанæй эксперттæ.
Конференцийы райдианы Президент Гаглойты Аланы арфæйы ныхæстæ бакаст паддзахадон уынаффæгæнæг Коцты Константин.
«Конференцийы тематикæ здæхт у акуталон фарстатæм, кæцытæ ахсджиаг сты Хуссар Ирыстоны æхсæнадæмон позицитæ æмæ Уæрæсейы интерестæ сфидар кæнынæн. Ахæм мадзал фадат дæтты эксперттæн ныхас кæнынæн. Уырны мæ, ацы форумы дискусситæ кæй уыдзысты цымыдисон æмæ продуктивон, бахæсгæ идеятæ æмæ инициативæтæ кæй ахъаз кæндзысты потенциал æмæ æмгуыстады здæхтытæ сбæрæг кæнынæн нæ бæстæты æмæ адæмты хæрзиуæгæн», – дзырдæуы Президенты арфæйы телы.
Йæ рады Сергей Комиссаров банысан кодта, зæгъгæ, мадзалы нысæнттæ сты дунейы зонадон коммуникацитæ размæ кæнын, æмæ æхсæнадæмон диалог æмæ зонадон-экспертон дипломатийы æууæнкдзинады тыххæй рекомендацитæ æмæ фæндтæ бацæттæ кæнын.
«Ацы фарстатæ аскъуыддзаг кæнгæйæ махæн, куыд дипломаттæ æмæ гуманитарон æмгуыстады фадыджы архайджытæн, нæ бон суыдзæн нæ куысты æрмæст тыхджын импульс райсын нæ, фæлæ ма нæ хорз фидæн æрæввахс кæнын. Ацы конференцийы хайад чи исы, уыдон иууылдæр æппæт тыхтæй хъуамæ архайой рæстаг æдас дунеон фæтк аразыны хъуыддагыл. Дуне йæхæдæг нæ ивы, уый ивы æппæт адæмы фæрцы», – загъта уый.
Конференци уагъд цæудзæн дыууæ боны – 19 апрелæй 20 апрелмæ. Мадзалы организатортæ сты, рæзты æхсæнадæмон институт «МИР-МОСТ-ОССЕТИЯ», ХИПУ, УФ-йы социалон программæты фарсхæцынады национ фонд, Коммуникациты рæзты национ иртасæн институт.
