Спутникы пресс-центры уагъд æрцыд брифинг, цыран хайад райстой РХИ-йы Генералон прокуратурæйы цур æхсæнадон советы сæрдар, политолог Гобозты Вячеслав æмæ Æхсæнадон советы уæнг, историон зонæдты кандидат Тадтаты Таймураз.
Гобозты Вячеслав куыд радзырдта, афтæмæй Хуссар Ирыстоны хицауиуæгад æмæ æхсæнады ‘хсæн дыууæрдæм бастдзинæдтæ арæзт кæй не ‘рцыдысты, уый аххосæй республикæ иу политикон кризисæй хизы иннæмæ. Йæ ныхæстæм гæсгæ, йæхæдæг цы советæн сæрдариуæг кæны, уый бацархайдзæн хицауиуæгад æмæ æхсæнады ‘хсæн диалог саразыны тыххæй.
«Мах нæ хъус дардзыстæм, æхсæнадон резонанс цы уголовон хъуыддæгтæ сæвзæрын кæнынц, уыдонæй се ‘ппæтмæ дæр. Дзырд нæ цæуы фæдысгарæн мадзæлтты хи хæццæ кæныныл, фæлæ – уголовон хъуыддæгтæ цæмæй объективонæй æвзæрст цæуой, ууыл, цæмæй æхсæнад иса максималонæй объективон æмæ æххæст информаци прокуратурæйы куысты фæдыл», – загъта уый.
Йæ ныхæстæм гæсгæ, совет рекомендацитæ æмæ фæндæттæ размæ кæндзæн иу кæнæ иннæ фарстаты фæдыл.
«Уыцы рекомендацитæм сæ хъус куынæ дарой, уæд мах исдзыстæм конструктивон дзуаппытæ ахæм фарстатæн: нæ фæндон царды цæй тыххæй нæ цæуы биноныг? Куыдфæндыйæ дæр диалог хъуамæ уа æмæ уа конструктивон. Ацы механизм куы куса, уæд дзы спайдагæнæн уыдзæн хицауиуæгады æндæр органты ‘хсæн æмархайды дæр», – банысан кодта Гобозты Вячеслав.
Уый куыд загъта, афтæмæй æрмæст кæронмæ арæзт не ‘рцæудзæн советы уæнгты сконд, фæлæ ма æрцæудзæн мыхуыр дæр.
«Алы адæймагæн дæр йæ бон у бахата советы уæнгтæм, Генералон прокуратурæйы архайдмæ цы фарстатæ хауы, уыдоны фæдыл. Мах цы механизм хъуамæ скусын кæнæм, уый махæн ног у. Дыууæ-æртæ мæйы фæстæ гæнæн уыдзæн уыцы органы тыххæй æмæ уыцы эксперимент куыд рауайдзæн, уый тыххæй бæстондæр дзурын», – загъта уый.
Уый куыд банысан кодта, афтæмæй, советы фыццаг рабадты цы фæндæттæ загъдæуыд, уыдонæй сæ иу хауд Генералон прокуратурæйы закъонмæ.
«Мæнæн радикалон цæстæнгас ис цæстдарæг ведомствойы архайдмæ. Мæ зæрдæмæ нæ цæуы, цæстдард æмæ фæдысгæрст иу органмæ кæй хауынц, уый. Генпрокуратурæйы закъоны хъæуы тынг серьезон оптимизаци. Бæрæг этапы, дыккаг Президенты рæстæджы дæр, закъонмæ хаст æрцыд ахæм ивындзинæдтæ, кæцытæ ведомствойы бæрны бакодтой бирæ уæлдай хæслæвæрдтæ. Уымæй дæр, хъыгагæн, ацы закъонмæ хаст æрцыдысты ахæм уагæвæрдтæ, кæцытæ слæмæгъ кодтой ацы органыл паддзахадон æмæ æхсæнадон контоль», – загъта политолог.
Йæ рады Тадтаты Таймураз банысан кодта, зæгъгæ, ацы совет арæзт æрцыд генералон прокуроры хæстæ æххæстгæнæн Битеты Сергейы инициативæйæ.
«Советы сконды сты æхсæнадон организациты æмæ æндæр институтты минæвæрттæ. Советы сконд нырма æххæст нæу, дарддæр æххæст цæудзæн. Æппæт фарстатæ дæр размæ кæндзыстæм æргомæй. Адæмы проблемæты прокуратурæ хъуамæ фехъуса, йæ хъус цасдæрбæрцæй хъуамæ æрдара советы саразгæ рекомендацитæм. Совет саразыны идея раразмæ кодта генпрокуроры хæстæ æххæстгæнæг, цæмæй фæзына ахæм фæзуат, цыран иумæ уынаффæ кæной, дзурой, исой уынаффæтæ, цæмæй адæм æмæ æхсæнад феной æмæ зоной, прокуратурæ цы аразы, уый, цæмæй ма уа æхгæд дуæрттæ, хъуыддæгтæ куыд æвзæрст цæуынц, уый хъуамæ æмбæрстгонд уа», – банысан кодта уый.
Тадтаты Таймуразы ныхæстæм гæсгæ, советы арæзт уыд раст æмæ хъæуæг къахдзæф.
«Нæ хæс уый мидæг уыдзæн, цæмæй ныхас кæнæм алы фадгуыты архайæг æхсæнадимæ, адæмимæ, гæнæнуæвгæйæ цæуой районтæм, цæмæй байхъусой, адæм цæуыл тыхсынц, цы проблемæтæ сын ис, уыдæттæм», – банысан кодта советы уæнг.
Comments are closed, but trackbacks and pingbacks are open.