26 марты Республикæ Хуссар Ирыстоны Президент Бибылты Анатоли æмбырд ауагъта Республикæ Хуссар Ирыстоны территорийыл коронавирусон инфекци COVID-19 ма апарахат кæныны фарстаты фæдыл.
Æмбырды хайад райстой Хицауады Сæрдар Пухаты Эрик, Президенты Администрацийы къухдариуæггæнæг Козаты Игорь, Генералон прокурор Дзæгъиаты Уырызмæг, Мидхъуыддæгты министр Наниты Игорь, коронавирусон инфекци аиуварс кæныны фæдыл оперативон штабы уæнгтæ.
Уынаффæ цыд арæнгонд мадзæлттыл, кæцытæ хаст æрцæудзысты «Коронавирусон инфекци ма æрбауадзын æмæ ма апарахат кæныны эпидемиологон мадзæлттæ фæкарздæр кæныны тыххæй» Хицауады уынаффæмæ.
Бибылты Анатоли банысан кодта Хицауады уынаффæ æххæст кæныны планыл лæм-бынæгдæр бакусын æмæ йыл контроль кæныны æнæмæнгхъæуындзинад.
* * *
27 марты инфекцион низ республикæмæ ма ‘рбауадзыны фæдыл санитарон-эпидемиологон домæнтæ куыд æххæст хъуамæ æрцæуой æмæ цы мадзæлттæ ист цæудзæн, уый фæдыл ныхас цыд Хицауады рабадты, цыран сæрдариуæг кодта Президент Бибылты Анатоли.
Президент бахатыд Хицауады уæнгтæм, цæмæй республикæйы цæрджытæм хæццæ кæна раст информаци æмæ дам-думтæн бынат ма уа.
«Адæм хъуамæ æмбарой, уавæрæй тæрсын кæй нæ хъæуы. Медицинон нормæтæ æмæ хуымæтæг домæнтæ æххæст кæнын хъæуы низы ныхмæ. Мах цы мадзæлттæ æххæст кæнæм, уыдонæн та сæ нысан у, низ республикæмæ ма ‘руадзын.
Ныры онг цы мадзæлттæ райстам, чизоны уыдоны фæрцы нæй абон республикæйы коронавирусæй фæрынчыны иунæг цау дæр», – банысан кодта уый.
Уый фæстæ Президент бакаст Хицауады барамынды проект, пунктгай, кæцымæ гæсгæ 1-æм апрелæй 10 апрелмæ Республикæ Хуссар Ирыстоны территорийыл конд цæуы карантин.
Проектмæ гæсгæ уæлдай хъусдард здæхт цæудзæн, республикæйы арæнтыл чи хиза, уыдонмæ. Арæныл хизæг æнæмæнг хъуамæ æххæст кæна санитарон-эпидемиологон домæнтæ. Кæд, кæцæйдæр кæй æрцыд, уый тыххæй нæ фе-хъусын кæна «Югосетпотребнадзор»-мæ, уæд уый райсдзæн æфхæрд.
Проекты ис ахæм пункттæ дæр, кæцытæм гæсгæ коронавирусон инфекци COVID-19-ы эпидеми ма апарахат кæныны нысанæн æхгæд æрцæудзысты кафетæ, ресторантæ, базарадон центртæ æмæ спортивон залтæ. Уый нысанæн ма ноджы карантин адарддæр кæндзысты Хуссар Ирыстоны ахуырадон уагдæттæ. Бар нæ уыдзæн культурон-массон мадзæлттæ уадзынæн. Спорты галуан «Олимп» дæр рæстæгмæ æруромдзæн йæ куыст. Уыцы фæдзæхст чи не ‘ххæст кæна, уыдоны бæрндзинадмæ кæндзысты Мидхъуыддæгты органтæ, сæ ныййарджытæ та цæудзысты иваргонд.
Барамындмæ гæсгæ æхгæд æрцæудзысты республикæйы æппæт магазинтæ дæр, фæлхасадон продукттæ, аптекæтæ æмæ сывæллæттæн хæринæгтæ кæм уæй кæнынц, уыдоны йедтæмæ. 1-æм майы онг бар нæ уыдзæн республикæйы территорийыл чындзæхсæвтæ æмæ куывдтæ аразынæн. Зиæнтты рæстæджы та адæм хъуамæ цас гæнæн ис, уыйбæрц сæхи бахизой бирæ адæмимæ контакттæй, санитарон-эпидемиологон нормæтæ хъахъхъæнгæйæ.
Барамынды пункттæ фæрсгæйæ Президент загъта, зæгъгæ, ацæргæ адæмы тыхсын кæны ахæм фарст: хæдзары карантины бадгæйæ куыстмæ бавдисынæн рынчыны гæххæтт кæм ис райсдзæн. Уый фæдыл йæ хъуыды у ахæм: 65 азæй фылдæр кæуыл цæуы, уыдон хъуамæ куыстуаты къухдариуæггæнæг арвита 2 къуырийы æмгъуыдмæ хæдзармæ, фæлæ хъахъхъæд æрцæудзæн сæ куыстмызд. Чысыл сабиты ныййарджытæ дæр сæрибар уыдзысты куыстæй.
Бибылты Анатоли ма банысан кодта, зæгъгæ, мæнмæ раст нæ кæсы ахæм кризисон уавæрты паддзахадон уагдæттæ сæхгæнын æмæ хæдзæрттæй нырыккон информацион-техникон фæрæзты æххуысæй кусын. Ныртæккæ нæ республикæйы нæй иунæг цау дæр, цæмæй ахæм мадзæлттæ исæм. Хуыздæр уыдзæн, цы режимы куыстам, афтæ.
Уазæгты марфа
Comments are closed, but trackbacks and pingbacks are open.