ПАРЛАМЕНТЫ СÆРДАР РАВДЫСТА ЙЕ ‘НÆРАЗЫДЗИНАД

Цытджын æмбæстæгтæ!

Республикæ Хуссар Ирыстоны Парламент йæ катайдзинад æвдисы горæты фатерты æмбæстæгтæ хивæндæй кæй бацахсынц, уый фæдыл сæвзæргæ негативон тенденцийы тыххæй.

Цæрæнуатон фарст у актуалон фарстытæй сæ иу æрмæст нæ республикæйы нæ, фæлæ æппæт бæстæты дæр. Нæ бæстæйы къухдариуæгад фæстаг азты ацы фарст активонæй скъуыддзаг кæны, арæзт æмæ эксплуатацимæ лæвæрд цæуынц ног цæрæн корпустæ.

Фæлæ, хъыгагæн, фæстаг рæстæджы фæфылдæр ис цæрæнуæтты хивæндæй бацахсыны цаутæ. Не ‘мбæстæгтæ сæ цæрæн уавæртæ фæхуыздæр кæныны тыххæй халынц закъондæттынад, хивæндæй ног арæзт фатерты æрцæрынц.

Цыфæнды цæрæн фæзуаты хицау гæнæн ис суæвын æрмæстдæр документы бындурыл, кæцы фидар кæны исады бар. Æмбæстæгтæй бирæтæ нымайынц, зæгъгæ, сæ бон у хивæндæй бирæфатерон хæдзары цæрæн фæзуаты æрцæрын. Не ‘мбæстæгтæ иуварс кæнынц иу факт, æнæзакъонæй цæрын, фатеры хивæндæй æрцæрын у ахæм ми, кæцыйы фæдыл хæсдзысты бæрндзинад. Растдæр та, фатеры æнæзакъонæй æмæ хивæндæй æрцæрын суыдзæн тæрхондоны æвзарæн хъуыддаг æмæ гæнæн ис æмæ нысан æрцæуа административон æмæ уголовон æфхæрд закъоны фæлгæтты.

Уыцы æмбæстæгтæ сæ æнæзакъонон архайдтытæй дæлдзиныг кæнынц уыцы æмбæстæгты бартæ, кæцытæ лæууынц цæрæнуат райсыны рады.

Мах сидæм не ‘мбæстæгтæм, цæмæй закъоны фæлгæттæй ма хизой, закъон æххæст кæной æмæ æнхъæлмæ кæсой сæ радмæ.

 

Республикæ Хуссар Ирыстоны

Парламенты Сæрдар

 ТАДТАТЫ Алан