Тыбылты Алан: «Парламентон фидиуæджы» программæ эфиры кæй нæ рацыд, уымæн ис мидпарламентон аххосæгтæ»

23 январы Хуссар Ирыстоны Парламенты сайтыл æвæрд æрцыд Бибылты Анатолийы видео хъусынгæнинаг, цыран Парламенты спикер дзырдта «Парламентон фидиуæджы» фæстаг программæ ПТРК «Ир»-ы эфиры кæй нæ рацыд, уый фæдыл. Бибылты Анатолийы хъуыдымæ гæсгæ программæ ПТРК «Ир»-ы эфиры нæ рацыд разамонæг органты фæндæй. Сæвзæргæ уавæры фæдыл йæ хъуыдытæ загъта Хуссар Ирыстоны Инофрмаци æмæ мыхуыры комитеты Сæрдар Тыбылты Алан.

«Кæй зæгъын æй хъæуы, Комитеты ‘рдыгæй «Парламентон фидиуæджы» рацыды ныхмæ цæлхдурæн йæ кой дæр нæ уыд. Уымæ гæсгæ, Бибылты Анатоли цы «цæлхдурты» кой кæны, уый фæдыл æз ницы зæгъинаг дæн. ПТРК «Ир»-ы къухдариуæгад цы фæндон рахаста, уый баст у Информаци æмæ мыхуыры комитетмæ Парламенты æртæ партийы разамонджытæй ивгъуыд майрæнбоны цы зонæнтæ æрбацыд, уыимæ. Партитæ «Адæмы иудзинад», «Ныхас» æмæ «Адæмон парти» æрбахатыдысты махмæ ахæм куырдиатимæ, цæмæй телевизион эфиры ма рауадзæм «Парламентон фидиуæджы» программæтæ. Уыдон ныхæстæм гæсгæ, парламентон чысылдæр хай иппæрд сты «Парламентон фидиуæджы» хайад исынæй. Анатоли Ильяйы фырт кæй кой кæны йæ видео хъусынгæнинаджы æмæ Хуссар Ирыстоны 2017 азы паддзахадон бюджет æнæ райсыны тыххæй дзырд кæм цæуы, уыцы фæстаг программæйы дæр æвдыст у æрмæст иунæг парти «Иугонд Ирыстон»-ы хъуыды. Иннæ парламентон партиты хъуыды ницæмæ æрдардæуыд, æмæ уый та сæвзæрын кодта уыдон æрдыгæй æмбæлон ахаст.

Аив нæ уаид, æз, Парламенты цы вазыгджын уавæр сæвзæрд, уый фæдыл куы ныхас кæнин, уæд, фæлæ комитетæн йæ бон нæу депутатты ахæм куырдиæттæ æнæхъусдардæй ныууадзын. Уымæ гæсгæ «Парламентон фидиуæджы» программæ эфиры кæй нæ рацыд, уымæн ис мидпарламентон аххосæгтæ», – загъта Тыбылты Алан.

Информаци æмæ мыхуыры паддзахадон комитеты сæрдар ма бæлвырдæй загъта, зæгъгæ, «Иугонд Ирыстон»-æй ницавæр куырдиат æрбацыд «Парламентон фидиуæджы» охыл.

«Парламентон фидиуæджы» радон рауагъд эфиры кæй нæ рацыд, уый фæдыл РХИ-йы Парламенты Сæрдар Бибылты Анатоли цы хъусынгæнинаг апарахат кодта, уый тыххæй мыхуыр кæнæм æртæ парламентон парти «Адæмы иудзинад», «Адæмон парти» æмæ «Ныхас»-ы куырдиат. Уый æрбцыд Информаци æмæ мыхуыры къухдариуæгады номыл, æмæ сси ПТРК «Ир»-ы эфиры «Парламентон фидиуæг» рæстæгмæ уагъд кæй не ‘рцыд, уый аххосаг, цалынмæ уавæр бæлвырд æрцæуа, уæдмæ:

РХИ-йы Информаци æмæ мыхуыры паддзахадон комитеты Сæрдар Тыбылты А.Т.

Цытджын Алан Таймуразы фырт!

Телеалæвæрд «Парламентон фидиуæг» алы хатт дæр йæ рæстæгыл рацæуы эфиры, куыд Республикæ Хуссар Ирыстоны Парламенты комитеттæ æмæ къамисты куысты фæстиуджыты тыххæй информацион-рухстауæн программæ, афтæ.

РХИ-йы Парламент у коллегиалон орган, цыран æппæт депутаттæн дæр ис æмхуызон бартæ. Фæлæ уæддæр телеалæвæрд «Парламентон фидиуæг» æвдисы иу парти «Иугонд Ирыстон»-ы позици. Æхсæнадон-политикон царды ахсджиагдæр æрмæджытæ цæттæ-гæнгæйæ интервьютæ æмæ раныхæстæ лæвæрд цæуынц иунæг партийы ‘рдыгæй. Уый аххосæй Республикæ Хуссар Ирыстоны æмбæстæгтæм хæццæ кæны иувæрсыг, объективон чи нæ у, ахæм зонæнтæ, æртæ парламентон парти «Адæмы иудзинад», «Адæмон парти» æмæ «Ныхас»-ы депутаттæ та цух сты сæ хъуыдытæ зæгъыны фадатæй.

Уæлдæр загъд цы уыд, уымæ гæсгæ дæ курæг стæм, цæмæй  Республикæ Хуссар Ирыстоны закъонлæвæрд дзыллон информацион фæрæзты, телеуынынад æмæ радиоалæвæрдты фадыджы куыд æххæст цæуы, уымæ Комитеты хъусдарыны æххæстбарты фæлгæтты бахæсгонд æрцæуа ПТРК «Ир»-æн, цæмæй эфир дихгонд æрцæуа 4 хайыл æмæ уæрст æрцæуа цыппар парламентон партийыл. Ахæм хуызы РХИ-йы æмбæстæгтæм хæццæ кæнид раст æмæ алывæрсыг зонæнтæ. Науæд та урæд æрцæуæд «Парламентон фидиуæджы» эфиры уадзыны хъуыддаг, уымæн æмæ уый не ‘вдисы æппæт парламентон фракцитæ æмæ депутатон иугæндты хъуыды.

 

РХИ-йы Политикон парти «Адæмы

иудзинад»-ы Сæрдар Чилæхсаты В.С.

РХИ-йы Адæмон партийы

Сæрдар Плиты А.М.

Республикæйы Политикон парти

«Ныхас»-ы депутатон иугæнды къухдариуæггæнæг Бесаты З.Г.

 

2017 азы 20 январь