Цхинвалы фæстаг хæрзбон загътой историон зонæдты кандидат, профессор Гаглойты Юрийæн. Уый не ‘хсæнæй фæхъуыд йæ царды 88-æм азы.
Гаглойты Юри уыд Уанеты Захары номыл зонад-иртасæн институты сæйраг зонадон кусæг, Тыбылты Алыксандры номыл Хуссар Ирыстоны паддзахадон университеты зонадон куысты фæдыл проректор, Ирыстоны истори æмæ Кавказзонынады кафедрæйы сæргълæууæг. Зонады къабазы, Республикæ Хуссар Ирыстоны æхсæнадон æмæ паддзахадон царды йæ лæггæдтæ нысан æрцыдысты бæрзонд хорзæхтæ æмæ кадджын нæмттæй, уыдоны нымæцы Хетæгкаты Къостайы номыл Паддзахадон преми, «Республикæ Хуссар Ирыстоны зонæдты сгуыхт архайæг», Кады орден æмæ æндæртæй.
Йе 80 азы юбилеймæ Гаглойты Юри ссис горæт Цхинвалы Кадджын æмбæстаг, фыдыбæстæйон историон зонады рæзты йе стыр лæггæдты æмæ Цхинвалы истори ахуыр кæнынмæ йе стыр бавæрды тыххæй.
Стыр ахуыргонды йæ фæстаг фæндагыл афæндараст кæнынмæ æрбацыдысты Хуссар Ирыстоны разамынад Президент Бибылты Анатолийы сæргълæудæй, йæ коллегæтæ æмæ хæлæрттæ, зонадон æмæ сфæлдыстадон интеллигенцийы минæвæрттæ, студенттæ, республикæйы æхсæнады минæвæрттæ.
Хъайтарты уынджы йæ хæдзары раз цы фыдохы митинг уыдис, уым бирæ ныхæстæ загъдæуыд йæ бирæфарсон адæймагон миниуджыты тыххæй.
Ахуыргонды хиуæттæ æмæ хæстæджытæн хъынцъымы ныхæстæ загъта паддзахады сæргълæууæг дæр.
«Юри Сергейы ацыд стыр зиан у махæн. Не ‘хсæнæй фæхъуыд стыр гоймаг, Ирыстоны историйы æнустæм чи баззайдзæн, ахæм гоймаг. Гаглойты Юри цæвиттон уыд æрыгон фæлтæрæн, стыр историктæн, кæцы йæ цард снывонд кодта ирæтты этногенез иртасыны хъуыддагæн. Ирыстоны зонадон дунейæн ацы зиан баххæстгæнæн нæй. Йæ бирæазон профессионалон архайд кæддæриддæр уыдзæн ирон адæмы интерестæн намысджынæй лæггад кæныны цæвиттон», – загъта Бибылты Анатоли.
Гаглойты Юри ныгæд æрцыд Хуссар Ирыстоны Национ пантеоны.
Comments are closed, but trackbacks and pingbacks are open.