Хуссар Ирыстоны Анахарсисы номыл национ библиотекæйы арæзт æрцыд равдыст курдиатджын нывгæнæг æмæ дохтыр Тедеты Юрийы нывтæн. Ардæм фæуазæг сты нæ бæстæйы къухдариуæгад Президент Бибылты Анатолийы сæргълæудæй, Донецкы Адæмон Республикæйы сæргълæууæг Денис Пушилин, нывгæнджытæ æмæ ацы дæсныйадæн табугæнджытæ. Ӕрæмбырдуæвджытæ тынг цымыдисæй кастысты нывтæм æмæ æхцондзинад райстой алыхуызон рæсугъд конд фæлгæндзтæй, æрдзы хуызтæй.
Нывгæнджыты цæдисы сæрдар Цхуырбаты Тамерлан куыд банысан кодта, афтæмæй ал-кæцы нывгæнæгæн дæр вæййы бæрæгбон, йæ нывтæн равдыст арæзт куы æрцæуы, йæ дæсныйадæн, йæ фыдæбонæн ын аккаг аргъ куы скæнынц, уæд. «Сымах ам цы нывтæ уынут, уыдоны сырæзтыл бирæ тых бахардз. Кæцыдæртыл дзы ныв-гæнæг бахъуыдис афæдзгæйтты. Равдыстмæ дзы кæцытæ бахаудтой, уыдон хæрзцъус сты, ис ма йын ноджы бирæ аив, рæсугъд конд нывтæ. Стыр бузныг ын зæгъын, ахæм диссаджы равдысты фæдыл», – банысан кодта Цхуырбаты Тамерлан.
Нæ республикæйы Культурæйы министр Зассеты Жаннæ дæр стыр райгондæй баззад ацы равдыстæй æмæ банысан кодта, зæгъгæ, йæ ныфс ис, дарддæр дæр ма кæй уыдзæнис нывгæнæгæн равдыстытæ æмæ та кæй барухс кæндзæн адæмы зæрдæтæ йе сфæлдыстадæй.«Йæ кой йын рагæй хъуыстон, зæгъгæ, диссаджы ныв кæны, æмæ йæм сæрмагондæй хæдзармæ ба-цыдтæн, цыран баййæфтон 170 нывæй фыл-дæр. Йæ диссаджы сфæлдыстадыл ын мæ цæст куы ахастон, уæд æй бамбæрстон, равдыст кæй рауайдзæн цымыдисон æмæ алкæйы зæрдæмæ дæр кæй фæцæудзысты йæ нывтæ. Мæ зæрдæ йын зæгъы, цæмæй йæ хæдзары алыхатт дæр уа амондджын хъуыддæгтæ æмæ дарддæр дæр йæ куыстæй æхцондзинад иса», – загъта Зассеты Жаннæ.
Нывгæнæгæн ма ноджыдæр бирæтæ раарфæ кодтой æмæ йын иууылдæр æппæлыдысты йæ равдыстæй. Банысан ма кодтой уый дæр æмæ Тедеты Юри канд хорз нывгæнæг нæу, фæлæ ма у хорз дохтыр дæр. Йæ адæймагдзинадыл та дызæрдыг дæр нæ кæнынц, хорз æй чи зоны, уыдон.
Нывгæнæг йæхæдæг дæр стыр бузныджы ныхæстæ загъта æрæмбырдуæвджытæн ахæм аргъ ын кæй скодтой йе сфæлдыстадæн æмæ банысан кодта, зæгъгæ, йын тынг æхсызгон у, йæ райгуырæн бæстæйы алкæцы нывгæнæгæн дæр фадат кæй ис хисæрмагонд равдыст саразынæн.
ДЖИОТЫ Александр
Comments are closed, but trackbacks and pingbacks are open.