Мæскуыйы горæтон Думæйы байгом Республикæ Хуссар Ирыстоны сгуыхт нывгæнæг Гобозты Владимиры экспозици «Зеркальное прикосновение», кæцы организацигонд æрцыд нывгæнæджы 60 азы юбилейы цытæн.
Равдыст байгом кæныны церемонийы хайад райстой Республикæ Хуссар Ирыстоны Президент Бибылты Анатоли, Уæрæсейы Федерацийы Республикæ Хуссар Ирыстоны Уæлвæткон æмæ Æххæстбарджын минæвар Гасситы Знауыр, Мæскуыйаг ирон общинæйы минæвæрттæ общинæйы сæрдар Абайты Аланы сæргълæудæй, Мæскуыйы горæтон Думæйы Сæрдар Алексей Шапошников.
Равдыст байгом кæныны церемонийы Алексей Шапошников раарфæ кодта мадзалы хайадисджытæн се ‘ппæтæн дæр. Уыимæ иумæ банысан кодта, зæгъгæ, йæхицæн цытыл нымайы, Мæскуыйы горæтон Думæйы Республикæ Хуссар Ирыстоны Президент Бибылты Анатолийы райсын.
«Нæ дуæрттæ кæддæриддæр гом сты не ‘фсымæртæ – ирæттæн. Уырны мæ, разæй нæм кæй æнхъæлмæ кæсынц ног, иумиаг культурон проекттæ», – загъта Мæскуыйы горæтон Думæйы Сæрдар.
Уый бузныджы ныхæстæ загъта равдысты организатортæн, уыцы нымæцы Гасситы Знауырæн, хуссарирыстойнаг нывгæнæджы экспозициимæ сæ кæй базонгæ кодтой, уый сæраппонд.
«Бузныг Республикæ Хуссар Ирыстоны Уæлвæткон æмæ Æххæстбарджын минæвар Гасситы Знауырæн Мæскуыйы парламентон центры бæстыхайы равдыст ауадзыны хъæппæрисы тыххæй. Абон нын фадат ис ирон курдиатджын нывгæнæджы сфæлдыстадимæ базонгæ уæвынæн, Хуссар Ирыстоны алæмæттаджы æрдз банкъарынæн, Кавказы ирд æмæ хурæфсæст хуызтæй бафсæдынæн. Гобозты Владимиры æнæхъуаджы нæ хонынц дæсны нывгæнæг. Уый хорз зындгонд у æрмæст йæ Райгуырæн бæстæйы нæ, фæлæ уымæй дарддæр дæр. Йæ алы нывы дæр бæрæгæй зыны ирон адæмы удыхъæд», – банысан кодта горæтон Думæйы Сæрдар æмæ йæ юбилейы цытæн раарфæ кодта нывгæнæгæн.
Дарддæр ныхасы рацыд Президент Бибылты Анатоли.
Уый загъта:
«Мæскуыйы горæтон Думæйы Сæрдар куыд радзырдта, афтæмæй Мæскуыйы горæтон Думæйы равдыст байгом кæнын ирд культурон цау у нæ нывгæнæгæн дæр æмæ нæ республикæйæн дæр, уыцы нымæцы фæахъаз уыдзæн Уæрæсе æмæ Хуссар Ирыстоны ‘хсæн культурон бастдзинæдтæ æмæ интеграцион процессты рæзтæн дæр». Уый бузныджы ныхæстæ загъта Мæскуыйы парламентæн, зæрдиагæй сæ кæй райста, экспозицийы организацийæн сын кæй баххуыс кодта, уый сæраппонд.
«Уырны мæ, не ‘фсымæрон адæмимæ нын разæй кæй ис бирæ фадæттæ, иумиаг культурон проекттæ. Бирæ æнусты дæргъы мах нæ зæрдæты хæссæм хæларадон æнкъарæнтæ Уæрæсемæ. Ахсджиаг у уыцы æнкъарæнты бахъахъхъæнын, цæмæй нæ ахастытæ фидардæр кæной æмæ рæзой, уый тыххæй», – банысан кодта Шапошников.
Мæскуыйаг ирон общинæйы сæрдар Абайты Аланы ныхæстæм гæсгæ, «Ирыстоны бирæ ис курдиатджын нывгæнджытæ, фæлæ нæм афтæ кæсы, æмæ Гобозты Владимир хæдхуыз нывгæнæг у».
Уый куыд загъта, афтæмæй Мæскуыйаг ирон общинæ кæддæриддæр цæттæ у столицæйы культурон цауты æмæ иумиаггорæтон бæрæгбонты хайад райсынмæ.
Йæ рады Гобозты Владимир йæхæдæг дæр бузныджы ныхæстæ загъта мадзалы организатортæн æмæ радзырдта, йе сфæлдыстад куыд гуыры, уый тыххæй.
«Зеркальное прикосновение»-йы равдысты тыххæй æз равзæрстон алы æмæ алы азты куыстытæ. Æз куы фæныв кæнын, уæд нæ ахъуыды кæнын йæ сюжетыл, баууæндын мæ уды монцтыл. Кусгæ-кусын æй нæ фæзонын, мæ нывæй цы рауайдзæн, уый. Растдæр зæгъгæйæ та æз ныв кæнын адæймагæн йæхи æмæ йæ миддуне. Уый тыххæй алы адæймаг дæр мæ нывты фæуыны йæхицæй цыдæр, уый фæстæ нывтæ цæрынц æнæ авторæй».
Уый ма радзырдта, зæгъгæ, йæ ныв кæнын сахуыр кодта йæ фыд.
«Мæ фыд профессионалон нывгæнæг нæ уыд, ныв кодта йæхи удæхцондзинадæн. Мæ фыццаг фæлгонцтæ баст сты мæ райгуырæн хæдзаримæ. Фæлæ æз акцент не ‘вæрын ирон нюанстыл, мæ нывты фылдæр ис æмбырдгонд моменттæ. Уыдон сты интернационалон. Мах, адæм, иууылдæр иу дунейæ стæм», – банысан кодта Гобозты Владимир.
Comments are closed, but trackbacks and pingbacks are open.