Спортивон галуан «Олимп»-ы уагъд æрцыд дыууæ хатты Олимпион призер Къудухты Бесикы дунеон номарæн турнир уæгъдибар хъæбысхæстæй. Хайад сæ райстой 230 æвзонг богалæй фылдæр. Уыдон уыдысты Абхаз, Дагъыстан, Кæсæг-Балхъар, Ленинграды область, Цæгат Ирыстон-Алани æмæ Хуссар Ирыстонæй.
Ерыстæ уагъд нал æрцыдысты цалдæр азы æмæ ныр банысангонд куыд æрцыд, афтæмæй та сног сты паддзахады сæргълæууæджы алыварсон æххуысы фæрцы.
Ерыстæ официалонæй байгом кæныны церемонийы æрæмбырдуæвджытæн раарфæ кодта РХИ-йы президент Гаглойты Алан.
«Абон уадзæм нæ кæстæр æфсымæр Къудухты Бесикы номарæн турнир. Уый, хъыгагæн, абон немæ нал ис. Наци хъуамæ уа æнæниз, мæнæ ныр Бесикы номыл цы видео-æрмæгмæ бакастыстæм æмæ уым куыд дзырдта, афтæ. Мæ зæрдæ уын зæгъы æнтыстытæ», – банысан кодта паддзахады сæргълæууæг.
Ерысты хайадисджытæн ма раарфæ кодта æмæ турнир ауадзыны тыххæй республикæйы къухдариуæгадæн бузныг загъта Бесикы фыды æфсымæр Къудухты Тамаз. Афтæ ма раныхас кодтой Олимпион хъæзтыты уæлахиздзаутæ Рæмонты Сослан æмæ Шариф Шарифов.
Ерыстæм ма æрбацыдысты Олимпион хъæзтыты æвзист призер Тыджыты Таймураз, дунейы чемпион Фæрниаты Ирбег, дунейы чемпионаты æвзист призер Зассеты Ален, Европæйы чемпион Батырты Альберт, Уæрæсейы чемпион Хуыбецты Къахабер, гауызы дæсныты ‘хсæн Уæрæсейы чемпион Зассеты Алан, РЦИ-Аланийы æмбырдгонд командæйы сæйраг тренер Кцойты Сослан, Азербайджаны командæйы тренер Кокойты Таймураз æмæ УФ-йы фæсивæдон æмбырдгонд командæйы тренер Лалыты Вадим.
Турнир уагъд цыд дыууæ боны дæргъы. Сæ фæстиуджытæм гæсгæ 2009-2010 азты гуырд спортсменты ‘хсæн уæлахиздзаутæ систы: Чилæхсаты Ибрагим (32 кг), Туаты Хетæг (35 кг), Уанеты Дмитри (38 кг), Муртазали Абдулазизов (41 кг), Санахъоты Ален (44 кг), Гергиты Тимур (48 кг), Данил Допуа (52 кг), Кобесты Хетæг (57 кг), Болататы Дзамболат (62 кг), Мухаммад Хириев (68 кг), Кокойты Денис (75 кг) æмæ Махач Алиукаев (85 кг).
2007-2008 азты гуырд богалты ‘хсæн та фæуæлахиз сты: Хуыбиаты Асан (44 кг), Цæрыкъаты Амур (50 кг), Дзаттиаты Альберт (55 кг), Залимхан Гамзаев (60 кг), Мырзаты Ролан (65 кг), Цæбиты Арсен (71 кг), Тыджыты Алан (80 кг), Хуыбылты Тамерлан (92 кг) æмæ Хуыгаты Сæрмæт (110 кг).
ПРЕЗИДЕНТЫ КУБОК
Хъæбатырдзинад æмæ адæмы иудзинады боны цытæн Фæсивæдон политикæ æмæ спорты фæдыл комитет ауагъта спорты æндæр æмæ æндæр хуызтæй ерыстæ Президенты Кубок рамбулыны сæраппонд. Волейболæй ерысты иууыл цæттæдæр разынд гимназ «Альбион»-ы командæ, дыккаг бынат бацахста 5-æм скъола æмæ æртыккагыл та ацыдысты дыккæгæм скъолайы ахуырдзаутæ.
Карз спортивон тохтæ цыдысты баскетболæй ерысты дæр. Хайад сæ райстой 9 командæйы. Уæлдай цымыдисондæр рауад финалон хъазт, цыран фембæлдысты гимназтæ «Альбион» æмæ «Рухс»-ы командæтæ. Банысан кæнын хъæуы уый, æмæ фæстаг азты бынæттон спортуарзджытæ ахæм цымыдисон хъазт кæй никуыуал федтой. Зæгъæн ис афтæ дæр, æмæ ууыл бирæбæрцæй кæй бандæвта уый, æмæ Цхинвалы кусын кæй райдыдтой æвзонг тренертæ баскетболæй, афтæ ма, кæй зæгъын æй хъæуы, сæ физикон культурæйы ахуыргæнджыты хорз куыст дæр. Финалон фембæлды хуыздæр йæхи равдыста æмæ Президенты кубокы уæлахиз-дзау ссис гимназ «Альбион». Дыккаг бынатыл та ацыд гимназ «Рухс»-ы командæ. Æртыккаг та ссис аивæдты лицейы командæ.
Тынг цымыдисон ма рауадысты футболæй ерыстæ дæр. Ам та финалы фембæлдысты 2-æм æмæ 1-æм скъолайы командæтæ. Хуыздæр ахъазыдысты 2-æм скъолайы командæ æмæ ссис Президенты Кубокы уæлахиздзау. Дыккагыл та ацыд 1-æм скъола. Æртыккаг бынат та бацахста гимназ «Альбион»-ы командæ.
Ерысты уæлахиздзауты æмæ призерты схорзæхджын кæныны церемони уагъд æрцыд республикон комплексон спортивон скъолайы. Уым хайад райстой Фæсивæдон политикæ æмæ спорты фæдыл комитеты сæрдар Хубежты Руслан, йæ хæдивæг Гасситы Сослан, Ахуырад æмæ зонады министры хæдивджытæ Галуанты Александр æмæ Карсанты Марат.
Хъæбатырдзинад æмæ адæмы иудзинады боны цытæн ма ерыстæ уагъд æрцыдысты боксæй дæр, афтæ ма скъоладзаутæ сæ цæттæдзинад фæлвæрдтой спорты ахæм хуыз, куыд воркаутæй. Ам та Президенты Кубок рамбылдта 5-æм астæуккаг скъола.
Фæсивæдон политикæ æмæ спорты фæдыл комитеты сæрдар Хубежты Руслан куыд банысан кодта, афтæмæй ацы ерыстæ суыдзысты æрвылазон.
ХУРИТЫ Батрадз
