19 майы Цхинвалы 5-æм скъолайы ногдзаутæ æмырæй иу минут алæугæйæ скодтой кад, сæрмагонд æфсæддон операцийы чи фæмард, уыцы æмбæстæгтæн æмæ се скъолайы кæрты «Фыдыбæстæ хъахъхъæнджыты» мемориалыл сæвæрдтой дидинджытæ.
Сæ бæрæгбонмæ фæуазæг сты Хуссар Ирыстоны Коммунистон партийы цхинвайлаг горкомы секретарь Гæджиты Ульянæ æмæ Президенты цур сывæллæтты бартыл æвджиддар Джиоты Аэлитæ. «Хорзы дæр æмæ зын сахаты дæр мах, хистæртæ, кæддæриддæр уæ фарс уыдзыстæм. Уе ‘нтыстытæй сæрыстыр уыдзыстæм, куы фæтыхсат, уæд та уæм не ‘ххуысы къух бадаргъ кæндзыстæм. Гæджиты Ульяна раарфæ кодта скъоладзаутæн æмæ загъта, зæгъгæ, советон пионерты рæсугъд æмæ уыимæ зын фæндæгтыл кæй рацыди: «Пионерты рæнхъыты уыдысты сабиты хуыздæртæ. Хастой сæ хъуырыл Уæлахизы сырх Тырысайы хуызæй ахуырст æрттигъон галстук. Сæрыстыр дзы уыдысты уыдон, сымах дæр хъуамæ уæ галстуктæ кадимæ дарат».
5- æм скъолайы директор Туаты Мадинæ йæ раныхасы раарфæ кодта ногдзаутæн: «Амондджын ут æмæ сабыр арвы бын цæрут». Уый фæстæ кады грамотæтæ радта 5-æм скъолайы æвзонг æфсæддонты отряд «Патриоттæ»-йы уæнгтæн, æфсæддон-спортивон хъазт «Зарница»-йы уæлахиздзаутæ кæй систы, уый тыххæй. Конкурсмæ сæ цы педагогтæ бацæттæ кодтой, уыдон дæр хорзæхгонд æрцыдысты кады грамотæтæй.
Цытджын маршы къахдзæфгæнгæйæ, скъолайы 4-æм къласы ахуыргæнинæгтæ пионерты ард бахордтой æмæ афтæмæй ацы цхинвайлаг скъолайы пионертыл бафтыдис ноджы 9 ногдзауы.
Бæрæгбон адард ис концертон программæйæ.
