«Ногдзау»- ы фыццаг номыр

Мыхуыры рацыд ӕмӕ йӕ кӕсджытӕм фӕхӕццӕ журнал «Ногдзау»-ы ацы азы фыццаг номыр. 90 азы сӕххӕст фыццаг ирон сылгоймаг-барӕг, цирчы артисткӕ, дрессировкӕгӕнӕг, Советон Цӕдисы адӕмон артисткӕ Тугъанты Дзерассӕйыл. Уый тыххӕй дзы ис йӕ архайды фӕдыл цыбыр зонӕнтӕ ӕмӕ йӕ къам. Рубрикӕ «Журналы уазӕг»-ы редакцийы фарстатӕн дзуаппытӕ дӕтты ӕвзонг поэт, литературон къорд «Суадон»-ы архайӕг, литературон преми «Булӕмӕргъ»-ы лауреат Бестауты Аланӕ. Дарддӕр «Бӕрӕгбӕттӕ»-йы дзырдӕуы Ног азы тыххӕй, ис ма дзы уац «Ног азы фынг» рубрикӕ «Ӕгъдӕуттӕ»-йы. «Ӕмдзӕвгӕтӕ», зӕгъгӕ, ахӕм рубрикӕйы бын мыхуыр ӕрцыдысты 11-ӕм къласы ахуырдзау Бестауты Аланӕйы ӕмдзӕвгӕ «Тӕху-ды» ӕмӕ Чиколайы фыццаг астӕуккаг скъолайы 4-ӕм къласы ахуырдзау Икъаты Дианӕйы ӕмдзӕвгӕ. Рубрикӕ “Зарӕг”-ы бын та мыхуыр ӕрцыд Цомайты Ростиславы ныхӕстыл зарӕг “Митгӕлӕбу” нотӕтимæ. Рубрикӕ “Ирон этикет”-ы мыхуыр ӕрцыд уац «Уырдыглӕууӕг, уырдыгыстӕг», «Таурӕгъ»-ы – Елхоты 2-ӕм астӕуккаг скъолайы 7-ӕм къласы ахуырдзау Готани Ибрагимы «Дидинджытӕ» æмæ рубрикӕ «Аргъау»-ы та Чиколайы ӕртыккаг астӕуккаг скъолайы 4-ӕм къласы ахуырдзау Дзираты Тамарӕйы «Рувас ӕмӕ уызын».

Рубрикӕ «Иры намыс»-ы кӕсджытӕ базонгӕ уыдзысты ирон адӕмы хъӕбатыр Коцты Бегайы сгуыхтдзинадимӕ. «Ӕфсымӕрон адӕмты сфӕлдыстад»-ы мыхуыр ӕрцыд Республикӕ Дагъыстаны горӕт Хъызлары 7 «а» къласы ахуырдзау Эленӕ Амбарцумяны аргъау «Тырысайы хъару».

Ног азы цытӕн сабитӕн арфӕйы ныхӕстӕ зӕгъынц Республикӕ Цӕгат Ирыстон-Аланийы Сӕргълӕууӕг Битарты Вячеслав, Республикӕ Хуссар Ирыстоны ахуырад ӕмӕ зонады министр Гасситы Натали, Е. Б. Вахтанговы номыл уырыссаг академион театры разамонӕг Владимир Уваров ӕмӕ хуыйджыты ӕрмадз «Liza Gabarati»-йы сӕргълӕууӕг Гӕбӕраты Лизӕ. «Ногдзау»-ы ма цымыдисон ӕрмӕджытӕ бакӕсӕн ис ахӕм рубрикӕты бын, куыд «Аивад», «Радзырд», «Ирон хъӕутӕ», «Ирыстоны зайӕгойтӕ ӕмӕ цӕрӕгойтӕ», «Базон-базонтӕ», «Ахуыр кӕнӕм ирон ӕвзаг», «Ӕмбисӕндтӕ», «Ирон мыггӕгтӕ» (Мамсыратӕ), «Сканворд» ӕмӕ ӕндӕртӕ.

«Ногдзау» аивадон ӕгъдауӕй сфӕлгонц кодтой нывгӕнджытӕ Дзиуаты Земфирӕ, Айларты Владимир ӕмӕ Абайты Аркади.

Хуыбиаты Никъала