Нæ республикæйы цы ахсджиаг инвестицион проекттæ æххæст æрцыдысты, уыдонæй иууыл ахадгæдæр у хуыйæн фабрикæ БТК-4. Уый уæзгæ хайбавæрд хæссы Хуссар Ирыстоны сæудæджерады размæцыды хъуыддагмæ.

Инвесторты æрбакæнын нæ республикæмæ вазыгджын процесс у. Фæлæ не ‘мзæххон, Уæрæсейы зындгонд амалиуæггæнæг Боллоты Таймураз сразы Хуссар Ирыстоны кондад бакæныныл. Уый æрмæст курдиатджын организатор нæу, фæлæ ма у Ирыстоны æцæг патриот дæр. Боллоты Таймураз йæхи цæвиттонæй фенын кодта, Хуссар Ирыстоны гæнæн кæй ис æмæ куса инвестор. Гуырдзиаг-ирон хъаугъайы райдианæй цы куыстуат «амард», уый раудыгас кæныныл зæрдæбынæй бакусгæйæ, ныр БТК-4 абон нымад у тынг хорз нырыккон куыстуатыл.

Куыстуаты хуыйынц сæрмагонд дарæс. Кусы дзы 609 адæймаджы. Ныр фондз азы дæргъы уый зынгæ фæрæзтæ хæссы нæ паддзахадон бюджетмæ, йæ кусджытæ цы мыздтæ исынц, уымæй сæрибарæй дарынц сæ бинонты.

Фабрикæ йæ куыст ногæй, ног уавæрты кæй райдыдта, уымæ гæсгæ кусджыты ахуыр кæнын хъуыд ног япойнаг хуыйæн машинæтыл. Ныртæккæ уыдон сты сæ куысты дæснытæ.

Ивгъуыд аз та хуыйæн фабрикæ бакодта фирмæйон магазин, йæхи территорийыл. Уым уæй кæнынц нæлгоймаджы хæдæттæ æмæ хæлæфтæ, афтæ ма скъолайы ахуыргæнинæгты дарæс дæр. Фабрикæйы къухдариуæгад хъавы уыцы ассортимент ноджыдæр рауæрæхдæр кæнын.

Ивгъуыд аз ма фабрикæйы царды æрцыд иу ногдзинад. Цхинвалы компани БТК-йы раздæры генералон директор ивд æрцыд æмæ дзы нысан æрцыд ног къухдариуæггæнæг – Базайты Сергей, кæцы архайы, кондад цы продукци уадзы, уымæн йæ ассортимент фæфылдæр кæныныл.

Мах цымыдис кодтам, хуыйæн фабрикæ кусджытæй хъуагдзинад æййафы æви нæ, уымæ. Хуыйджыты дефицит кæд нæй фабрикæйы, уæддæр квалификациджын кадртæй у цух. Зæгъæм, профилон инженертæ фабрикæйы ис цъус. «Ивгъуыд аз мах горæт Шахтæмæ, нæхи филиалмæ арвыстам кусджытæ, цæмæй уым рацыдаиккой практикæйы. Уым сæ квалификаци фæбæрзонддæр кодтой административон персонал, экономисттæ, бухгалтертæ æмæ кадрты хайады кусджытæ. 2019 азы та БТК-4 фæнд кæны УФ территорийыл сын цы кондадтæ ис, уыдонæй искæцымæ кæрдæн цехы мастерты арвитын, хъавæм ма бынаты æрбайгом кæнын техникон кабинет, кæцы архайдзæн æдасдзинады фарстытыл», – зæгъы Базайты Сергей.

Куыд зонæм, афтæмæй БТК-4 фæнд кодта республикæйы районты филиалтæ бакæнынмæ. Уыцы нысанæн районты къухдариуæггæнджытæн хæсгонд æрцыд, цæмæй поселокты агуырд цæуой ахæм бæстыхæйттæ, цыран 100 кусæгæн бынат уа цех саразынæн. Фæлæ уый фæдыл фабрикæйы ныры генералон директор загъта, зæгъгæ, ацы аз БТК-4 нæ хъавы йæ кондад рауæрæхдæр кæнынмæ. Ныртæккæ, дам, нæм кусы æртæ хуыйæн æмæ иу та –  кæрдæн цехтæ. Фабрикæйы территорийыл ис ныккæндтæ, цыран æфснайд сты, хуыйæн цехтæ цы хъуымац æмæ фурнитурæйæ кусынц, уыдоны стыр фæсауæрцтæ. Йæ ныхæстæм гæсгæ фидæны хъавынц кондад рауæрæхдæр кæнын, фæлæ, зæгъгæ, абон фабрикæйы цы хуыйджытæ кусы, уыдонæн сæрибарæй сæ бон у рауадзгæ продукцийы ассортимент фæфылдæр кæнын. Ныртæккæ фабрикæйы базæйыл ахуыр цæуынц 25 хуыйæджы, цæмæй кæдфæндыдæр ифтонг уой резервон кусджытæй.

Генералон директоры ныхæстæм гæсгæ хуыйæн цехы цы машинæтæ æвæрд æрцыд фондз азы размæ, уыдонæй ацы аз бирæты баивдзысты ногтæй.

Уазæгты Марфа

Comments are closed, but trackbacks and pingbacks are open.