«Ногдзау» мыхуыр кæны

Мыхуыры рацыд сабиты журнал «Ногдзау»-ы ацы азы дыккаг номыр. Сæххæст 165 азы поэт, прозаик, ирон æвзагыл фыст аивадон прозæйы бындурæвæрæг Гæдиаты Куыцырийы фырт Секъайы райгуырдыл æмæ йын журнал дзуры цыбыртæй йæ царды тыххæй, ис дзы йæ къам дæр. Рубрикæ «Журналы уазæг»-ы редакцийы фарстатæн дзуапп кæны Дзæуджыхъæуы А. Пушкины  номыл æвдæм скъолайы ахуырдзау Хынцæгты Хетæг. Рубрикæ «Бæрæгбæттæ»-йы та журнал йæ чысыл кæсджыты зонгæ кæны сылгоймæгты бæрæгбон – Рæстмæйы бонимæ. Ирон адæммæ бирæ хорз æгъдæуттæ ис æмæ уыдонæй сæ иуы дзырдæуы «Уазæгуаты хи дарын»-ы фæдыл. «Ногдзау» нæ чысыл хурты у æмæ кæддæриддæр фæндаг дæтты, сфæлдыстадон тых кæй уæнгты змæлы, уыцы кæстæртæн. Ацы номыры дæр рубрикæ «Æмдзæвгæтæ»-йы мыхуыр æрцыдысты Дзæуджыхъæуы скъола-интернаты ахуыргæнинаг Бекъойты Агуындæ æмæ Алайнаг гимназы 2-æм къласы ахуыргæнинаг Битарты Георгийы æмдзæвгæтæ «Мады арфæтæ» æмæ «Куырттаты ком», сты дзы сæ къамтæ дæр. «Зарæг»-ы рубрикæйы мыхуыр æрцыд «Уалдзæг, ныхæсты автор у Гæджынаты-Хабæты Риммæ, музыкæ та йын ныффыста Евгений Воложанин. «Ирон этикет»-ы та нæ чысыл хуртæ базонгæ уыдзысты «Фынджы æгъдæуттимæ». Рубрикæ «Таурæгъ»-ы  Беслæны 7-æм скъолайы 4-æм къласы ахуырдзау Къуыллыты Чермен уацмыс хуыйны «Сырхауты Цæрайы æххуыс». «Аргъау»-ы та мыхуыр æрцыд Дзæуджыхъæуы 43-æм скъолайы 5-æм «г» къласы ахуыргæнинаг Джыккайты Беллæйы «Рæстдзинады аргъау» æмæ ацы скъолайы 4-æм «в» къласы ахуырдзау Пухаты Ацæмæзы нывафыст.

 Рубрикæ «Хистæры сфæлдыстад сабитæн»-ы Сабанты Козеттæ сабитæн балæвар кодта æмдзæвгæ «Гæды æмæ мыст». Ирыстонæн кад æмæ ном чи скодта, уыдонæй иу уыд адæмы раздзог Алыккаты Хазби, уымæн йæ лæгдзинад æмæ хъæбатырдзинадæн кад кæнынц йæ радтæг адæм. «Ногдзау» уый тыххæй дзуры рубрикæ «Иры намыс»-ы. «Æфсымæрон адæмты сфæлдыстад», зæгъгæ, ахæм рубрикæйы бын æвзонг кæсджытæ æхсызгонæн бакæсдзысты Кæсæг-Балхъары республикæйы горæт Налцыккæй 13-аздзыд Сабанчиева Раминæйы æмдзæвгæтæ «Сказочный сон», «Весна», «Букет из слов». «Ирон хъæутæ»-йы та Елхоты хъæуы тыххæй фыссы ацы хъæуы 2-æм астæуккаг скъолайы 9-æм къласы ахуырдзау Дзебойты Алисæ. «Ирон мыггæгтæ»-йы та йæ мыггаджы тыххæй фыссы Красногоры хъæуккаг Мæргъиты Элинæ. «Ногдзау»-ы ма цымыдисон æмæ æнæмæнгхъæуæг æрмæджытæ мыхуыр æрцыдысты ахæм рубрикæты бын, куыд «Аивад», «Худæджы нывтæ», «Ирыстоны зайæгойтæ æмæ цæрæгойтæ», Базон-базонтæ», «Ахуыр кæнæм ирон æвзаг», «Æмбисæндтæ», сканворд æмæ   дзырдбыд.

 «Ногдзау» аивадон æгъдауæй сфæлгонц кæныныл хорз бакуыстой нывгæнджытæ  Айларты Владимир, Мамсыраты Хасан æмæ Абайты Аркади.

ХУЫБИАТЫ Никъала