Фӕллой ӕмӕ социалон хъахъхъӕнынады ног сырӕзгӕ министрадӕн знон бӕстӕйы сӕргълӕууӕг Гаглойты Алан базонгӕ кодта йӕ ног къухдариуӕггӕнӕджы. Президенты барамындмӕ гӕсгӕ министрӕй нысан ӕрцыд Гаглойты Олег, кӕцы уымӕй размӕ та къухдариуӕг кодта Юстицийы министрадӕн.
Бӕстӕйы сӕргълӕууӕджы ныхӕстӕм гӕсгӕ ацы фадыг гуырахстджын ӕмӕ вазыгджын у, уымӕн ӕмӕ паддзахадон хъуыддæгтæй бирæтæ комкоммӕ баст сты ацы министрадимӕ. Фӕлӕ, зӕгъгӕ, нӕ дызӕрдыг кӕнын, Гаглойты лӕппу аккагӕй кӕй сарӕхсдзӕн, министрады раз цы ахсджиаг хӕстӕ ис, уыдон æрбӕстон кӕнынæн.
«Хъазуатон куыст уæ бахъæудзæн – министрад йӕ бындурӕй суанг кӕронмӕ у уӕхи аразинаг. Ӕмӕ мӕ ныфс ис, тагъд рӕстӕджы куыст йӕ гаччы кӕй сбаддзӕн», – банысан кодта Президент.
Ныфс бавӕрдта кусджытæн, хицауад дӕр кӕдфӕндыдӕр сӕ фарсмӕ кӕй уыдзӕн ӕмӕ ацы иумæйаг хъуыддагмӕ ӕмбӕлон хъусдард здӕхт уыдзӕн. Зӕрдыл ӕрлӕууын кодта, Фӕллойы министрадмӕ ма лӕвӕрд кӕй ӕрцыдысты раздӕр Ӕнӕниздзинад хъахъхъӕныны министрадмӕ цы социалон фадыджы хӕстӕ ӕмӕ фарстатӕ хауд, уыдон дӕр.
Фӕллой ӕмӕ социалон хъахъхъӕнынады министр Гаглойты Олег банысан кодта, фыццаджыдӕр кӕй ӕрӕвналдзысты организацион фарстатӕ бӕстон кӕнынмӕ – уагдоны штатон структурӕ æмæ уагӕвӕрд сбӕлвырд кӕнынмӕ. Ног ӕрлӕугӕ азӕй та, зӕгъгӕ, ӕрӕвналдзыстӕм министрады раз цы хӕстӕ ис, уыдон бӕстон кӕнынмӕ.
Президент Гаглойты Алан куыд банысан кодта, уымӕ гӕсгӕ ацы фадыджы раздӕры разамонæджы хӕстӕ ӕххӕстгӕнӕг, Лигъдӕтты социалон ӕгъдауӕй хъахъхъӕныны фӕдыл комитеты сӕрдары хӕдивӕг Цоциты Игорь бакодта егъау, вазыгджын ӕмӕ гуырахстджын куыст. Тыхст адӕмимӕ, зӕгъгӕ, ӕнцон кусӕн нӕу, ӕмӕ йын загъта бузныджы ныхӕстӕ. Ныфс бавӕрдта, дарддӕр дӕр кӕрӕдзийы фарсмӕ кӕй балӕудзысты ӕмӕ сыл хицауад цы хӕстӕ ӕмӕ ныфсытӕ ӕвӕры, уыдон иумӕ бӕстон цӕудзысты.
Ног снысангонд министрӕн арфӕйы ӕмӕ ӕнтыстджын куысты фӕндиӕгтӕ бауарзта Президенты Администрацийы сӕргълӕууӕг Мӕргъиты Алан дӕр.
Зӕрдыл лӕууын кӕнынӕн: Фӕллойы ӕмӕ социалон хъахъхъӕныны министрад саразыны Барамындыл паддзахады сӕргълӕууӕг йӕ къух ӕрфыста 23 октябры. Ацы министрад саразыны фӕндон ӕмӕ социалон блок Ӕнӕниздзинад хъахъхъӕныны министрадӕй рахицӕн кӕныны уынаффӕ бӕстӕйы сӕргълӕууӕг фехъусын кодта парламент ӕмӕ адӕммӕ ныстуан аразыны рӕстӕджы.
КЪӔБУЛТЫ Маринæ
