Зынаргъ æмбæстæгтæ!
Тынг æввахс рæстæджы къæсæрыл æрбалæудзæн 2023 аз. Ног азы æрбалæудмæ зæрдиагæй фенхъæлмæ кæсæм, йемæ баст вæййынц нæ рæсугъддæр бæллицтæ, ныфс нæ вæййы, кæй сæххæст уыдзысты.
Ацæугæ аз махæй алкæмæндæр уыд вазыгджын, бирæ зындзинæдтæ æмæ мæстытæ бавзæрстой нæ адæм. Фæлæ уыимæ иумæ ахсджиаг, æнæмæнгхъæугæ уынаффæтæ дæр хаст æрцыдысты.
Мах иууылдæр æвдисæн стæм дунейы цы фундаменталон, геополитикон ивындзынæдтæ цæуы, уымæн. Ацы уæззау, ныхмæлæууæг рæстæджы мах хъуамæ нæ тыхтæ раттæм, цæмæй Хуссар Ирыстон, куыд бæстæ æмæ республик дарддæр рæза æмæ фидар кæна, цæмæй нæ адæмы цардыхъæд хуыздæр кæна.
Мах, Уæрæсейы адæмимæ иумæ, дарддæр дæр фидар лæууæм нæ иумæйаг Райгуырæн бæстæ Уæрæсейы Федерацийы интересты бахъахъхъæныны вварс. Мах æмбæстæгтæ активон хайад исынц Сæрмагонд хæстон операцийы. Ирыстоны хæстонтæ фидар æмæ хъæбатырæй тох кæнынц Хуссар Ирыстоны сæрвæлтау. Хъыгагæн ныл зиæнттæ æрцыд.
Тæфæрфæс кæнын зианджын бинонтæн, сæ хæстæджытæн æмæ дзырд дæттын, мæнæй аразгæ цы у, уый кæй сараздзынæн, цæмæй не ‘мзæххон хъайтарты нæмттæ рох ма уой æнустæм.
Зынаргъ æмбæстæгтæ!
Зындзинæдтæм æнæкæсгæйæ, фидар æмæ æнувыдæй архайæм нæ националон интерестæ æххæст кæныныл æмæ нæ республикæ æмæ æмбæстæгты æдасдзинад бахъахъхъæныны фæдыл.
Ацæугæ азы нын бантыст бæлвырд æнтыстытæ. Фыццаг уал уый, æмæ тынг зын æмæ вазыгджын æвзæрстытыл рацыдыстæм иумæ. Алчи дæр æй фæхатыд, кæрæдзи фарсмæ куы балæууæм æнгом, уæд цы фæнды зындзинадыл дæр фæтых уыдзыстæм. Кæрæдзи æмбарындзинады, кæрæдзийæн аргъ кæныны, адæмы иудзинады ис нæ тых.
Ацæугæ аз ма равдыста ног вазыгджын хӕслӕвӕрдтæ нæ баххӕст кӕнын кæй хъӕудзæн, — системон ивындзинæдтæ скæнын, ахсджиаг реформæтæ саразын.
Абон уын мæ бон зæгъын у — ацы фарстаты æмæ ма бирæ æндæрты фæдыл куыст цæуы.
Ацы аз мах банысан кодтам Хуссар Ирыстоны историйы ахсджиагдӕр бӕрӕгбонтӕй иу — Хӕдбардзынады Акт райсыны 30-ӕм афӕдзыбон. Дарддæр архайдзыстæм нæ сæйраг стратегион нысанты реализацийыл: республикæйы политикон æнæцудгæдзинад фидаркæныныл æмæ социалон-экономикон райрæзтыл.
Фæнды ма мæ банысан кæнын, кæй нын бантыст иуæй-иу категориты кусджытæн сæ мыздтыл схæцын, æмæ иннæ аз планы ис цалдæр уагдонады мыздты индексаци. Æнтыстджынæй реализацигонд цæуы Хуссар Ирыстоны социалон-экономикон рæзтæн ахъазгæнæг Инвестицион программæ, экономикæйы реалон секторы рæзты принциптæ сфидар кæныны куыст. Афтæ ма, ныфс куыд æвæрдтам, районтæ æмæ хъæуты райрæзтмæ сæрмагонд хъусдард здахæм.
Зæрдиагæй бузныг зæгъын алкæмæндæр йæ куыст, йæ архайд, йе ‘нтыстытæн.
Æрхæссæд нын Нæог аз ног æнтыстытæ, циндзинад æмæ амонд. Æнæниздзинад, фарн æмæ уарзондзинадæй дзаг уæнт уæ хæдзæрттæ! Уадз Ног аз разына рæдау цины цаутыл, æххæст æрцæуой уæ бæллицтæ, æмæ уæ хиуæтты, уæ хæстæджыты, уе ‘ввахс адæмы уарзондзинадæй, хъармдзинадæй æмæ аудындзинадæй дзаг уæнт уæ бонтæ.
Арфæ уын кæнын, Ног 2023 азы хорзæх уæ уæд!
Республикæ Хуссар Ирыстоны Президент ГАГЛОЙТЫ Алан
