Милицийы сæрмагонд нысаниуæджы къордыл 4-æм февралы сæххæст 17 азы. Цытджын рæнхълæуды спецкъорды кусджытæн зæрдиаг арфæйы ныхæстæ загътой Мидхъуыддæгты министр Наниты Игорь, министры фыццаг хæдивæг Цхуырбаты Андрей, министры хæдивджытæ Пухаты Мераб æмæ Дзабиты Æхсар, РХИ-йы Арæнхъахъхъæнæн службæйы минæвæрттæ æмæ ма хицауады æндæр бæрнон кусджытæ.
«Сымахæн уæ куыст уæззау æмæ вазыгджын у. Уæ тых, уæ хъару дæттут адæмы сабыр цардæн, хъахъхъæнут сын сæ æдасдзинад, фыдгæнджытæй сæ хизут, æмæ афтæмæй уæхи цард та фылдæр хатт вæййы тæссаг уавæры. Фæлæ зындзинæдтæм æнæкæсгæйæ сымах кæддæриддæр цæсгомджынæй æххæст кæнут уæ разылæууæг хæстæ. Мæ зæрдæ уын зæгъы фидар æнæниздзинад, æнтыстытæ æмæ би-нонты цардамонд. Кæддæриддæр-иу уæ хæдзарттыл сæрæгасæй куыд æмбæлат, уыцы арфæ уæ уæд», – банысан кодта Наниты Игорь.
Ведомствæйы сæргълæууæг ма ОМСН-ы кусджытæн раарфæ кодта нæ бæстæйы Президент Бибылты Анатолийы номæй дæр, кæцыйæн фадат нæ фæцис сæрмагондæй æрбацæуынæн.
«Нæ бæстæйы Президент Бибылты Анатоли мæнæн бахæс кодта, цæмæй уын йæ номæй раарфæ кæнон. Стыр бузныг æмæ уæ сæрыстыр у Президент, уæ Райгуырæн бæстæйæн аккаг лæггад кæй кæнут æмæ уæ службæйон хæстæ намысджынæй кæй æххæст кæнут, уый тыххæй», – загъта Министр.
Министры фыццаг хæдивæг Цхуырбаты Андрей дæр йæ арфæйы ныхæсты банысан кодта, зæгъгæ, ацы къорды саразынмæ егъау хайбавæрд чи бахаста, уыдон рох макуы хъуамæ уой.
«Йæ сырæзтæй фæстæмæ ацы къорды абоны онг чи кусы, уыдон бирæ нал сты æмæ æрыгон кусджытæн хъуамæ уой цæвиттойнаг се ‘рвылбонон куысты. Уыдон бирæ азты дæргъы цæсгомджынæй лæггад кæнынц Хуссар Ирыстоны цæрджытæн æмæ се ‘нтыстджын куысты фæрцы абон мах цæрæм сабыр дуджы», – банысан кодта Цхуырбаты Андрей.
Сæ службæйон хæстæ цæсгомджынæй кæй æххæст кæнынц æмæ ма милицийы Cæрмагонд нысаниуæджы къордыл 17 азы кæй сæххæст, уый фæдыл Наниты Игорь схорзæхджын кодта къорд кусæджы майдантæ æмæ премитæй. Балæвар ма сын кодта специалон нысанæн дзаума дæр, кæцы сын фæахъаз уыдзæн се ‘рвылбонон куысты рæстæджы.
Официалон церемони фæуы-ны фæстæ ОМСН-ы кусджытæ æрæмбырдуæвджытæн рав-дыстой сæ профессионалон арæхстдзинад цалдæр номырæй.
Джиоты Александр
Comments are closed, but trackbacks and pingbacks are open.