Æнæниз адæймаг Хуыцауæй арфæгонд у, – зæгъы æмбисонд. Уый та дзурæг у, царды æппæты ахсджиагдæр æнæниздзинад кæй у. Бирæтæ райгуырынц æнæнизæй, фæлæ, хъыгагæн, уыцы амонд алкæмæ нæ фæкæсы, ахæмтæ та а-дунемæ фæзынынц цавæрдæр низыхаттимæ. Ис ма ахæмтæ, царды цыдимæ алыгъуызон низтæ кæмæ фæзыны. Се ‘ппæтæн дæр цæмæй æмбæлон хос æрцæуа, уый тыххæй æнæмæнгхъæуæг у, сæ низыхатт раст базонын, уый фæстæ та – æмбæлон хос скæнын.
Æрæджы нæ горæты цы бирæпрофилон медицинон центр байгом, уым ис медицион æххуыс бакæнынæн æппæт нырыккон уавæртæ дæр, ифтонг у алыгъуызон хъæуæг инвентарæй. Фæлæ, ам ис аскъуыдздзаг кæнинаг фарстатæ дæр. Уыдонæй сæ иу у, медицинон центры фæлгæтты паддзахадон бындурыл нырыккон домæнтæн дзуаппдæттæг биолабораторитæ кæй нæй, уый. Уыдон кæд нырма медицинон центры не сты, уæддæр сты нæ республикæйы территорийыл æмæ не ‘мбæстæгты, раздæрау, нал хъæуы республикæйæн æддæмæ ацæуын. Ахæм хисæрмагонд лабораторион хайад – КДЛ, баконд æрцыд 2018 азы октябры мæйы нæ горæты Санитарон эпидемиологон станцы агъуысты. Лабораторийы администратор Тыджыты Иринæ нын куыд радзырдта, афтæмæй ам медицинон-лабораторион лæггæдтæ сты фидгæйæ. «Алы анализæн дæр ис йæхи аргъ. Анализты биоæрмæг ист æрцæуы ам, бынаты, стæй сæрмагонд мигæнæнты æрвыст æрцæуы Мæскуымæ. Уырдыгæй, фæстæмæ мæ анализ-ты хатдзæгтæ, интернет-ресурсты руаджы радæттынц бынæттон лабораторимæ. Пациенттæн сæ бон у, райсой сæ, куыд лабораторимæ æрбацæугæйæ, афтæ электронон постæй дæр».
Хъыгагæн, фылдæрæй фылдæр кæны йе ‘нæниздзинад лæмæгъ кæмæн у, ахæм адæмы нымæц. Уымæ гæсгæ æнгæс лабораториты лæггæдтæ æхсæнадæн сты æнæмæнгхъæуæг. Ацы лабораторийы пациентты æрвылбонон нымæц у алыгъуызон, уыдон сты, куыд рынчындоны уæвæг рынчынтæ, афтæ йе ‘нæниздзинад басгарын кæй фæфæнды, ахæмтæ дæр. Уыдон æнæ дохтыры амындæй æрбацæуынц æмæ саразынц лабораторион басгæрст.
Нырыонг нæ республикæйы цæрджытæ цæмæй ахæм басгæрст са-рæзтаиккой, уый тыххæй сæ хъуыд республикæйæн æддæмæ, æппын къаддæр, Цæгат Ирыстонмæ ацæуын. Уый та, кæй зæгъын æй хъæуы, домдта финансон хæрдзтæ. Уый тыххæй бирæтæ æвзæрстой зындзинæдтæ. Ныр уавæр фæхуыздæр. Фæзынд нæм цалдæр хисæрмагонд лабораторийы, кæд фидгæйæ сты, уæддæр æмбæстæгты бахъæуы къаддæр финанстæ.
«Ме’нæниздзинадимæ мын арæх вæййы проблемæтæ. Арæх мæ ба-хъæуы анализтæ радтын. Хуссар Ирыстоны ахæм лабораторитæ кæй нæ уыд, уый тыххæй-иу ацыдтæн Дзæуджыхъæумæ. Уый, кæй зæгъын æй хъæуы, домдта куыд лабораторион лæггæдтæн фидын, афтæ фæндаджы хæрдзтæ дæр. Ныр мæ фæнды бузныг зæгъын, ацы лаборатори байгом кæныныл чидæриддæр бакуыста, уыдонæн», – зæгъы пациент Джиголаты Динарæ.
Лабораторийы администратор ма куыд загъта, афтæмæй уыдон æвæрæз рынчынтæм ацæуынц хæдзæрттæм дæр æмæ сын уым сисынц биоæрмæг.
Фæнды ма мæ банысан кæнын, лаборатори ифтонг кæй у нырыккон домæнтæн дзуаппдæттæг ивентарæй, æххæстбæрцæй дзы хъахъхъæд цæуынц санитарон нормæтæ æмæ пациенттæ та, кæддæриддæр, райгонд сты басгæрсты хатдзæгтæй.
ХУЫЫГАТЫ Милена
Comments are closed, but trackbacks and pingbacks are open.