Нал ис машинæтæ давыны цаутæ

90-ӕм азты нӕ адӕмы сабыр, ӕнӕмӕт цард хӕстон архайдтыты фӕстиуӕгӕн бынтон мӕгуырау уавӕрмӕ ӕрхаудта. Уыимæ Уӕрӕсейы Федерацийы политикон царды ӕрцыдис бындурон ивындзинӕдтӕ, кӕцытӕ ӕвзӕрырдӕм бандӕвтой хуымӕтӕг адӕмы цардыл. Сарӕх сты давыны, марыны цаутӕ. Фыдгӕнджытӕн «макӕ» зӕгъӕг нал уыд ӕмӕ адӕм ӕппынӕдзух тасы мидӕг цардысты.

Уӕды рӕстӕджы нӕ ӕрыгон республикӕйы фӕндӕгтыл фенӕн уыдис бирӕ давд машинӕтӕ ӕмӕ сыл дис дӕр ничиуал кодта. Ӕгӕрыстӕмӕй ма барадхъахъхъӕнӕг органты кусджытӕ сӕхӕдӕг дӕр ахӕм машинӕтыл цыдысты. Уыцы машинӕты нӕ бӕстӕмӕ кодтой алы рӕттӕй. Уӕд ма нын Гуырдзыстонимӕ автомобилон бастдзинад уыд ӕмӕ уырдыгӕй дӕр къӕрныхтӕ кодтой машинӕтӕ. Фӕлӕ уӕддӕр давд машинӕты фылдӕр хай уыдис Уӕрӕсейӕ. Не ‘мбӕстӕгтӕ ацы машинӕты уымӕн ӕлхӕдтой ӕмӕ сӕ аргъ бӕрӕг къаддӕр уыдис официалонæй æлхæд машинӕтӕм абаргӕйӕ. Ӕмӕ дӕ куы ничи хъыг дара ахæм машинӕ эксплуатаци кӕнгӕйӕ, уӕд ма уӕлдай ӕхцатӕ цӕмӕ фидыс. Ӕнӕуый дӕр цыбыркъух уыдысты не ‘мбӕстӕгтӕ уӕды рӕстӕджы ӕмӕ уавӕрӕй пайда кодтой.

Уыцы давд машинӕты эксплуатаци кодтой ӕрмӕстдӕр нӕ республикӕйы территорийыл ӕмӕ сын арӕнтӕй ахизӕн нӕ уыд. Рӕстӕг цыд ӕмӕ Уӕрӕсейы Федераци дӕр Владимир Путины сӕргълӕудӕй фӕфидар, ӕрӕвӕрдтой фӕтк барадхъахъхъӕнӕг органты куысты, райдыдтой ахсын фыдгӕнджыты ӕмӕ адӕм чысылгай хизын райдыдтой сабыр, æдас цардмӕ. Кӕй зӕгъын ӕй хъӕуы, фӕкъаддӕр сты машинӕты давыны цаутӕ дӕр. Зӕрӕмӕгы хъӕуы цы арӕнхъахъхъӕнӕн пост ис, уым ӕмбӕлон фӕтк ӕрӕвӕрыны фӕстиуӕгӕн къӕрныхтӕн нал уыдис фадат нӕ республикӕмӕ давд машинӕтӕ ӕркӕнынӕн.

Уыимӕ ма иумӕ 21-ӕм ӕнусы райдианы Гуырдзыстоны дӕр слӕууыд ног къухдариуӕгад. Михаил Саакашвили цы адӕймаг у ӕмӕ цы фыдракӕндтӕ сарӕзта, ууыл нал дзурдзыстӕм, фӕлӕ йӕ бӕстӕйы барадхъахъхъӕнӕг органты куысты фӕтк кӕй ӕрӕвӕрдта, уый дызӕрдыггаг нӕу. Фӕлӕ, хъыгагӕн, фӕстӕдӕр гуырдзиӕгтӕ ныллӕууыдысты терроры фӕндагыл, сарӕх сты террористон акттӕ, кӕцыты фӕстиуӕгӕн фӕмар-дысты не ‘мбӕстӕгтӕ. Уыцы ӕнамонд цаутӕн сӕ фылдӕр хай баст уыдис давд машинӕтимӕ ӕмӕ адӕм се ‘лхӕнын нал уӕндыдысты. Уыимӕ ма ноджы Гуырдзыстонимӕ ногӕй райдыдтой хӕстон архайдтытӕ, бастдзинад нын нал уыд, арӕнтыл ӕдӕрсгӕ ахизӕн нал уыд. Куыд фӕзӕгъынц, зӕгъгӕ, ӕвзӕр хабӕртты дӕр цыдӕр хӕрзиуӕг вӕййы. Ӕмӕ кӕд бирӕ зындзинӕдтӕ бавзӕрстам, уӕддӕр арӕнты сӕхгӕд хорзӕрдӕм бандӕвта нӕ республикӕйы сабырадыл. Ныр нӕ бынтондӕр ницыуал иу кӕны нӕ сыхӕгтимӕ ӕмӕ нӕм фыдракӕндтӕ дӕр сты бӕрӕг къаддӕр.

Абоны бон зӕгъӕн ис ӕмӕ нӕ республикӕйы ныр цалдӕр азы дӕргъы нал уыд машинӕ адавыны цау. Ӕмӕ йӕ куы адавай, уӕддӕр ӕй цы хъуамӕ фӕкӕнай? Уӕрӕсеимӕ нӕ иу кӕны ӕрмӕстдӕр иу фӕндаг. Нӕ сыхаг бӕстӕ Гуырдзыстонимӕ та арӕнтӕ ӕхгӕд сты. Иу чидӕр куыд загъта, – мах, дам, цӕрӕм зӕххы кӕрон, – ӕрцыдтӕ иу фӕндагыл ӕмӕ дын фӕстӕмӕ дӕр ис ӕрмӕстдӕр иу фӕндаг.

ДЖИОТЫ Александр