1950 азы Иугонд Нациты Организаци рахаста æрвыл аз 1 июны Сывæллæтты хъахъхъæныны дунеон бон бæрæг кæныны тыххæй. Абоны онг дæр уыцы бæрæгбонæн йæ ахадындзинад нæ фæкъаддæр. Нæ бæстæйы разамынд æппæт мадзæлттæ аразы сæ бахъахъхъæнынмæ, паддзахадон æмвæзадыл материалон æххуыс, сæ ахуыры, се ‘нæниздзинады фарстатæ сын лыг кæнынмæ.
Иннæ регионтау Цæгат Ирыстон дæр æрвыл аз 1 июны бæрæг кæны ацы кадджын бон. Бæрæгбоны фæлгæтты уал нæ республикæйы разамонæг Сергей Меняйло æмæ хицауады иннæ уæнгтæ, цалдæр боны раздæр, бабæрæг кодтой курдиатджын сывæллæттæ кæм ахуыр кæнынц, уыцы Физиконматематикон лицей. Уазджытæ фембæлдысты уæлдæр кълæсты ахуырдзаутимæ. Республикæйы разамонæг суинаг зонадон кусджытимæ аныхас кодта, кæмæ сæ цы фæндтæ ис, чи сæ цы проектыл кусы, уыдæтты тыххæй. Уый фæстæ федтой, лицейы æппæт кълæстæ æмæ кабинетты скъоладзаутæн сæ ахуырадон æмæ зонадон архайды рæзтæн цы фадæттæ арæзт цæуы, уый.
Уыцы бон ма хицауады уæнгтæ бабæрæг кодтой, Дзæуджыхъæуы сæрмæ курдиатджын сывæллæттæн цы сæрмагонд центр аразынц, уыцы бынат. Сергей Меняйло аразджытæй бадомдта, цæмæй центр аразыны нысан æмæ проекты хæстæ фæбæлвырддæр кæной.
Хицауады уæнгтæ ма фембæлдысты сывæллæтты хæдзар «Хуры тын»-ы хъомылгæнинæгтимæ дæр. Уазджытæ сывæллæттæн æрбаластой лæвæрттæ æмæ адджинæгтæ. Сывæллæттæ та уазджыты зæрдæтæ барухс кодтой бæрæгбонон концертæй.
Хæрзаудæн центр «Мой бизнес» цы акци скодта, уый фæлгæтты æнæхъæн республикæйы сидзæр сывæллæтты хæдзæрттæ ифтонг æрцыдысты спортивон инвентарæй.
1 июны та, Дзæуджыхъæуы бынæттон администрацийы хъæппæрисæй, бæрæгбоны мадзæлттæ райдыдтой Къостайы номыл фæлладуадзæн парчы 12 сахатыл. Парчы къуымты райтыгътой хиирхæфсæн алыхуызон фæзтæ. Сæрдыгон сценæйæ амонæг бакаст Сергей Меняйлойы арфæйы фыстæг: «Уырны мæ, нæ фидæны фæлтæрыл дзуапдæттæг æмæ бæрнон кæй стæм, уый алчидæр кæй æмбары. Махæй, хистæртæй, аразгæ у нæ кæстæрты амондджын цард æмæ бæстæйы аккаг граждантæ суæвын.
Сæ бæрæгбоны сын мæ зæрдæ зæгъы æнæниздзинад æмæ хурæфсæст цард! Амондджын, æнтыстджын æмæ фæрнджын ут, мæ зынаргъ æмбæстæгтæ!»
Уый фæстæ сценæйыл сæ аивад æвдыстой республикæйы сывæллæтты аивадон коллективтæ. Цалдæр фæзы цыд мастер-класстæ англисаг æвзаг æмæ нывкæнынады аивадæй, техникæйыл архайын æмæ инновацион технологитæ зонынæй, технопарк «Кванториум»-ы космосы сусæгдзинæдтыл ахуыр кæнынæй, адджинæгтæ кæнынæй æмæ афтæ дарддæр.
Спорты национ хуызты федераци дæр бацæттæ кодта рагон ирон хъæстыты ерыстæ: фат æмæ æрдынимæ архайын, дур æхсын, бæндæн ивазын, тыччыйæ хъазын æмæ æндæр хуызтæ.
Фæндæгтыл змæлыны æдас-дзинады инспекци дæр стыр лæвар ракодта сабитæн. Асфальтыл цы нывкæныны конкурс сарæзтой, уымæн йæ темæ уыд «Фæндæгтыл змæлд – сывæллæтты цæстæй». Сывæллæттæ ныв кодтой, уыцы уавæр чи куыд уыдта æмæ æмбæрста, афтæ æмæ уыцы хъазтæй райстой стыр æхцондзинад. Конкурсы фæуæлахиз хæлардзинад.
Сабитæ сæ ныййарджытимæ федтой, къамисæг Дзестелты Маринæ цы фоторавдыст сарæзта, уый.
Бæрæгбоны сывæллæттæ сæ ныййарджытимæ бакастысты парчы æвæрд дынджыр сценæйыл «Родная анимация»-йы фæлгæтты зындгонд мультфильмтæ ирон æвзагмæ тæл-мацгондæй. Уыцы бон ма парчы æппæт аттракционтыл сабитæ сæхи ирхæфстой лæварæй…
Нæ уацхæссæг
Comments are closed, but trackbacks and pingbacks are open.