Цхинвайлаг кафты ансамбль «Сæрмæт» хайад райста 16 мартæй 19 мартмæ горæт Казаны IX-æм федералон грантон фестиваль «Алые паруса»-йы фæлгæтты аивадон конкурс «Уалдзыгон фембæлдтытæ»-йы.
Ансамблы къухдариуæггæнæг Тедеты Ацæмæз куыд загъта, афтæмæй фестивалы хайад райстой 30 республикæйæ 90-мæ æввахс аивадон коллективы. «Мах акафыдыстæм æртæ кафты: «Авайраг», «Хæххон кафт» æмæ «Симд». Фестивалы æндæр республикæтæй хайадисджытæн сæ цæттæдзинад уыд бæрзонд æмвæзадыл, уыдис нын тыхджын ныхмæлæуджытæ, фæлæ уæддæр нæ къухты бафтыд æнтыст», – загъта Ацæмæз.
Æрыгон артисттæ номинаци «Адæмон кафт»-ы акафыдысты «Симд» æмæ сын жюри саккаг кодта I-аг къæпхæны преми, «Авайраг» æмæ «Хæххон кафт»-æн та сын радтой II-аг къæпхæны премийы лауреатты ном.
«Кæй зæгъын æй хъæуы, хуыздæр æнтыстытæм тырныдтам. Нæ къухты цы бафтыд, уымæй иттæг райгонд не стæм, фæлæ дарддæр нæхиуыл кусдзыстæм æмæ нæ ныфс ис хуыздæр æнтыстытæй», – загъта ансамблы къухдариуæггæнæг.
Фестивалы фæлгæтты «Сæрмæт» хуынд æрцыд 2022-2023 ахуыры азы хуыздæр аивадон коллективты грантон конкурс «Уæлахиздзауты кубок»-мæ. Конкурсы призон фонд у 1 000 000 сомы.
Тедеты Ацæмæз бузныг загъта республикæйы Президент Гаглойты Аланæн, афтæ ма Культурæйы министрад, Фæсивæды спорт æмæ политикæйы ко-митет, ансамбль «Симд»-ы къухдариуæгад, æрыгон кафджыты ныййарджытæ æмæ сæрмагонд амалиуæггæнæг Хуыбиаты Альбертæн, сæ балцы тыххæй сын кæй баххуыс кодтой, уый тыххæй.
Ансамблы кафджытæ сæ балцæй райстой стыр æхцондзинады тæлмæнтæ: «Фестиваль нын радта ноджы стырдæр стимул нæхиуыл фылдæр кусынæн. Федтам æндæр коллективты рахызтытæ, ссардтам ног æмгæрттæ, тырндзыстæм, цæмæй нæ радон рахызтытæ уой æнтыстджындæр», – загъта ансамблы кафæг Гæбæраты Арианнæ.
Æрыгон артисттæ ма бафиппайдтой, сценæмæкæсджытæ æмæ жюрийы уæнгты зæрдæмæ кæй фæцыдысты кафджыты дарæс æмæ «Симд» -ы рæсугъддзинад.
ХУЫГАТЫ Миленæ
Comments are closed, but trackbacks and pingbacks are open.