Цхинвалы хореографион скъола – студийы хъомылгæнинæгтæ хайад райстой 10 æм февралы Самарæйы уагъдцæуæг фестиваль «Аивад – змæлды» æмæ сситы уæлахиздзаутæ.
Уый тыххæй фехъусын кодта студийы къухдариуæггæнæг Хуссар Ирыстон æмæ Абхазы Республикæйы сгуыхт артисткæ Четион Майя. «Фестиваль цыд æртæ боны, хайад дзы райстой Уæрæсейы æндæр æмæ æндæр регионты хореографион коллективтæ. Æдæппæт фестивалы равдыстой 160 номырæй фылдæр. Жюрийы уæнгты иумæйаг хъуыдымæ гæсгæ хайадисджыты ‘хсæн хуыздæрыл нымад æрцыд нæ республикæйы коллективы ралæуд».
Уæлахизуæвджытæ хорзæхджын æрцыдысты фестивалы уæлдæр хорзæх Гран-прийæ афтæ авторон кафт æмæ адæмон кафты номинациты I-аг къæпхæны лауреатты премитæй дæр.
Банысан кæнын хъæуы уый æмæ хореографион скъола-студи бирæ рæстæджы дæргъы фыццаг хатт хайад кæй райста ацы дунеон фестивалы. Æрыгон кафджытæ акафыдысты «Хæххон кафт», «Симд», «Хонгæ», «Рог кафт», «Æхсаргардтимæ кафт» æмæ хореографион композици «Скифаг мотивтæ».
Скъола-студи арæзт æрцыд 1989 азы. Йæ саразыны инициатор уыдис зындгонд ирон хореограф Саулохты Мельс, кæцы схъомыл кодта кафджыты бирæ фæлтæртæ. Йæ царды фæстаг азты скъола нал архайдта бæрæг аххосæгтæм гæсгæ. Ногæй кусын райдыдта 2022 азы.
Хореографион къорд бацæттæ кодтой Джиоты Къоста æмæ Кæркуысты Аленæ.
Comments are closed, but trackbacks and pingbacks are open.